Ibrani
Nimiag Yesus Sembe
Tibin Nenero Wembahiogha
El nenerop yubu palilamap
Ibrani nimiag tibin nenero wembahiog yubu ene mome toro pibog nimina, nu olog ekon uro wamap. Nimi nhonneri Paulusti mome toro pibog sembanep aghana, nhonneri Lukasti to, Apolosti to, Barnabasti to mome toro pibog sembanep. Nimi etneri mome toro pibogne nu olog ekon aghana, sin Yahudi nimiri Kristusag wana palilamek nimi sembe yubu ene mome toro pibog. Yahudi nimiap Ibrani nimiap nik nimi wamek. Sin Ibrani nimi pogto Kristusag wana palilamekpa, Ibrani yog nimiri sinag walamsiekti, yubu toraplamsiek. Yubu torapto walamsiekpa, Kristusag wana palirop nimi tanekori, “Kristus lilobi agha Musari yubu nen samoro saelbaukap to, kom to,” aro wanaag haildalamek. Yubu ene mome toro pibogne enekori sin wenero, “Allah Yubu ni Yesus Kristusag tiptangkamlaba, Kristus lipseng kom,” aro wana mikip nenero ambarelamsiog.
Yubu tam wilindi abeneag, “Kristus lipseng kom,” aro wenero ambatsiog. Yubu tam selek nena, Yesus Kristus Allah Elme ya'ag uropne wamlange poneko wana khapto seklelamog. Seklelamogne toman agha Allah Yubu sunsunum uro ul piropne sembe el talamog. Yesus Kristus Allah Elme wamla ane sembe, sin samenag Allah yubu silimu tiplamek nimiap, Allah arukna imagnang malaikatap, Musa ponekoap ni phelektopne wamlari, paliagne mo wamla. Yubu tam phendep nena, sin memnang samenag Allah sembe pairopnang wamek aghana, Allah Eldamneri Yesus sekelilamogti, “Phelektopne wamlari, Na Allah sembe memne pail anepne ya'ag uropne wamla,” aro lag nenero ambatsiog. Yubu tam wilindip nena, samenag Allahri Yahudi nimiag salag lekto paliropneap, Allah sembe pham domba oro paliropneap ni abeneko Yesus anam mangaptan komag el amik yanepne sembe likipto ambatsiog. Yesusna, Memne Allah sembe ya'ag uro pail pairopne Nubunge nhonog wamla ane sembe, nu mog so'oag nimiri Yesusag wana palilamapne toman agha Yesusti nu saelbamsildi, nuri malia uropneap, log seneropneap, teptopneap ni anekoag agha pelepto talulamsil.
Mome toro palilamog nimi enekorina, samenag wamek nimiri Allahag wana palilamekne sembe pasal ko'olomneag mome toro ambatsiog. Ambatsiogti pasal aongeag, “Seklelapmunneag Kristusag sae limna koma elag tiro wana palilamlulom,” aro ambatsiog. Mome komobanebag sin wenehirop yubu komopto mome toro pibog.
Ibrani nimiag Yesus sembe tibin nenero wembahiog yubu lomag wamlange
“Nimi taluro wendog nimi nembahilul,” aro Allahri Yesus webogne sembe (1:1-2:4)
Musaap Yosuaap Allah arukna wamdek aghana, Yesus agha sin phelekto Allah Elme wamlange sembe (2:5-4:13)
Yesusna, Memne Allah sembe pairopne Paliag sirikne wamlange sembe (4:14-6:12)
Yesus Eldamneri nong Allah sembe piptaogne pere agha salag wendogne alnibaogne sembe (6:13-10:39)
Samenag agha babe wene babe Allahag wana paliropne pere agha Eldi kelmabo me tanepne sembe (11:1-13:25)