“Taulbahinep yubu sae lipmunag,” aro wembahiogha
2
1 Ane sembe, “Sa'a-sa'ari nu kiliro weag nembahileag,” aro nuri ka'elamobo yubu eneko nuri nen ma'aro mikip uro saelbanepneog wamla. 2 Saelbanepneog wamla sennena, tam nene sembe. Samenag Allah arukna imagnang malaikat tanekori yubu poa ambatsiekne toman Allahri aruksiog yubu pibog. Allahri yubu eneko nimiri ingisaplobekneap, phiro ulamekneap ni sunsunum uro sinag tam ikinne a'ero-a'ero paliropne yabalamog. 3-4 Samenag Allah arukna malaikatti yubu poa ambatsiek aghana, wene nu taulbahinep yubu wali phelektop yubu eneko nu Saelba Uhiropneri alniro ambatsiogpa, Eldi yubu ka'elamek nimi tanekori tipto nunag ambarelamsiek. Taulbahinep yubu eneko ambarelamsiekpa, Allahri seneropne sunsunum uro Eldamne Yame Walingeri mikipne sinag a'ero-a'ero palilamsiogpa, nimiri uanep komne ulamekpa, “Yaghe! Allah mikipne sin pere agha ulamla,” senenne kekneba ulamekti ambarelamsiek. Allahri sinag mikipne palilamsiogneag agha, “Yubu sikne ambarelamsiang,” aro lag nembatsiog. Samenag nimiri Allah yubu malaikatti ambatsiek yubu ingisaplobekne sembe tam ikinne paliropne sinag uro yabalamog. Undop pagha tanena, wene nu taulbahinep yubu wali phelektop yubu wamlaba, nuri teba'en aro limnep tanena, nunag ikinne tanepneog wamla.Yesusti nimi taulbahinep ina yarebatsiogha
5 Wene aro lelamap nena, nu mog so'oag nimi amik wamnebag Allahri El arukna imagnang malaikatti saeag pibog kom. 6 Aghana Allah Yubu nhonag nimi nhondi Allahag mome toro ambarelamogti,
“Mog so'oag nimi undo wamap aghana, Andi nu sembe seneraglamsilam.
El mog so'oag nimi taogne poneko undo wamla aghana, kemero o'olamlam.
7 El mog so'oag uropne sesog sembe imagnang malaikat olog umag wamla.
Paliag nembalumdi, kwiria elektoba kipnange el usoghag elekitlumdi,
8 nia mangkina el yan mombolag nembalum,”
aro mome toro pibog. Wene, “Nia mangkina el yan mombolag nembalum,” seog nena, nhondi babe elag kipto koma wamnep kom. Aghana wene wamabag, nia mangkinari mog so'oag nimi kiptopne nene ililamap kom. 9 Ot wene nuri iro el tanep nena, Yesus paliag wamla. Samenag El sesog sembe Allah arukna imagnang malaikat olog umag wamog nena, Allahri nimiag wana yororo, “Nimi ni sembe lunuro tebalul,” sembaogneag agha Yesus seklero tebaog. Seklero tebaog ane sembe, kamag nenero paliag nembaogti, El kipto kwiria usoghag elekirog.
10 Allahri wana nunag yororo seneraglamog nena, “Sin nimi taneko taulbahinep ina yarebatsinepne poneko sekleropne toman agha el nong ningki wana whi talul,” aro wali sembaog. Taulbahinep ina yarebatsiogneag agha Allahri kelmabo me maikno imang warerobag poa yalamsil. Nia mangkina Allahri sumbahiogpa, nia mangkina ot El mo sembe wamla. 11 Allah whingag yanep nimi nembarelamsilne ponekoap, Allah whingag yanep nimi tanekoap ni ot nhonag agha wamang. Ane sembe Yesusti sin Allah whingag yanep nenelamsil nimi taneko ali semban koma, “Nangkabo,” aro engelamsil. 12 Nangkabo aro engelamsil nimi taneko sembe,
“Andi si lag phoro nangkaboag ambatsineri,
sin winiptangtoba nusamag An omekto seplamnun,”
seog.
13 Nen nhonna,
“Allahag wana palina ulamnun,”
seogti tipto lelamog nena,
“Na tane wamnaba, Allahri kelmabo me nanag tatnel nimiap nhon wamap,”
seog.
14-15 Kelmabo me Elag tarog nimi tanekona sindi nong sop eneng wamekti, tebanepne sembe log lelem seneropne nenekori wana sao kauplamsiog. Wana sao kauplamsiogti, sin kamag wamekneag babe arukna saog nenelamsiog. Ane sembe, El babe sindi nong sop eneng wamekne saog taog. Nong sop eneng saog taog andarina, El tebanne pere agha, “Tepna mikipne saelbamlange neneko luknubaneri, sin tebanepne sembe log lelem wana sao kaupsirop nimi lopsinun,” aro tebaog. Tepna mikipne saelbamlange neneko phia sikini nubunge sembe lemna. 16 Tam nene sembe sik uro lelamnangena, Allah arukna imagnang malaikat sae kiliro yeplamsil kom aghana, Abrahamdi likna likto piog nimi sae kiliro yeplamsil. 17 Yeplamsil nena, yareag seneropneag agha, “Memne Allah sembe pairop nimi sikini nubunge saog tahaneri, Allahri awe sol wali uro tolamseneri, nimi tanekori malia ulamangne wailag nembatsisene,” senelamog. Wene senelamogne sembe Elkabo nong sop eneng wamek saogne ni elag tanepneog wamla. 18 Eldi nimi yepsinep nena, Elag babe samenag seklenne mipto yambaog. Ane sembe, ora nimi babe sinag miplamsin abeneko pere Elag yopseng tanena, El mikipti yebelahinep.