Musa Yesus umag wamogha
3
1 Nangkabo a'un Imagne ponekori nu wepsiogti yopsiog yubuag nelepto sae tiptangtop nimi wamlom. Imagneri Yesus wepto poghogpa, nuri salelamap yubu sikne ene poa yaog. Elna, Memne Allah sembe pairop nimi sikini nubunge saog wamlari, nu yepsinep ane sembe, Elag seneraglamlulom. 2 El sekirogne ponekoag Yesusti wali neleplamog. Musari babe samenag ae lomag yeptop nimi saog uro awe wali uro tolamog. Wali tolamog saog uro Yesusti babe sol wali uro sikne ulamog. 3 Ot Yesusna, Musa phelekto mo paliagne wamla. Ae walinge nhon wamnaba, ae aneko wali senep aghana, ae soropne poneko nen paliag nenero kimnepneog wamla.a Ane saog uro, Musa kimnepne olog umag wamleba, Yesus mo paliag nenero kiplamukapne sunsunum wamla. 4 Nimiri ae ni wamlange nimiri ae soropne wamla. Ot nia mangkina wamlange Allahri sobaogne wamla. 5 Musa ponekori sol wali uro Allahri ae lom nimi ni sik uro yeplamsiogpa, nuri amik ka'ebanep yubu ene sembe Musari anamag sikne aro lag nembatsiog. 6 Aghana yandome ngai tandi, ae lom nhon saelbamla saog uro Kristus ponekona nu Allahri ae lom nimi saelbamlange wamla. Nu Allahri ae lom nimi wamap nena, nuri wana awi uro tiro nang-nangaropne log lelem sae limna koma saelbamebeba, Eldi ae lom nimi wamapne lag talul.“Allahri Kristus poghogne wail ibare agha lipseng kom,” aro wembahiogha
7 Ane sembe Eldamne Yame Walingeri yubu lelamogne sunsunum uro,
“Allahri yubu lilim sumene ka'elapmun tanena,
8 a'un samenag pai aldesag wamlumdi,
a'undi wana kas tangom agha Na mipnelumne toman
Nari yubu ingisaploplum saog uro ka'elopseng kom.
9 Pai aldesag taneko a'unisagyabori Na sunuro mipneekpa,
hengkun taibuka taubuka ulamogha teng nhon epto naualbare uro yabalamogpa
Nari ulamsinge ililamek.
10 Ane sembe Nari sin wamek nimi tanekoag wana mali tahiri,
yubu lelamsiri, ‘Sindi wana sop-sop kiliptangto ekel inaag palamangdi,
Nari ina yarebatsinne ekon wamang,’ sehi.
11 Ane sembe Nari wana yo senenne agha yubu so'opto salag lelamsiri,
‘Tektek paptoba Nari sumbatsinneag wa'aikagti,’ sehi,”
aro Yame Walingeri wene seogne mome toro pibog.
12 Nangkabo, a'un nimiri wanaag malinge wamleagti, Allah Kamag Uropne ponekoag wana pimna koma wail ibarelapmunag aro yae uptangkamlulom. 13 Aghana “Allahri yubu lilim sumene ka'elapmun,” seogne sunsunum uro ka'elamlom tanena, “Malia uahane,” seneropneri a'un nimi nhon babe kilbahileag aro a'un mamun sop-sop wana mikip neneptangkamlulom. 14 Nu samenag alniro wana khapto seneraglamubunge tipto salelamebea kekman komoptop sum tale tanena, Kristusap sae tiptangtop nimi tangkamubunge kekneptalul. 15 Yubu lelamog nena,
“Allahri yubu lilim sumene ka'elapmun tanena,
a'undi wana kas tangom agha
Eldi yubu ingisaploplum saog uro ka'elopseng kom,”
seog.
16 Sindi wana kas tangom agha Allahri yubu ka'elobekti ingisaplobek nimi tanekona, et nimi sembe lebog? Sin nimi tanekona, ot sin Musa ponekori Mesir so'oag agha menangaro pabahiog nimi ni sembe lebog. 17 Et nimiag hengkun taibuka taubuka ulamogha teng nhon epto naualbare uro yabalamogpa, Allahri wana mali talamog? Sin tanekona, malia ulamekti, sindi nong tepto pai aldesag teplalaghek. 18 Apna et nimi sembe Eldi yubu so'opto salag lelamog nena, “Tektek papsineba Nari sumbatsinneag wa'ukang kom,” aro lebog? Ot Eldi yubu ka'elobek nimi sembe lebog. 19 Wene kemelamap nena, sindi Elag wana palilamek komne sembe wa'inep koma wamek.