6
1 Ane sembe Kristus yubu samenag ambatsibu yubu enekona, nimi wana khapsinne wamlaba, me ologne sabatsilo saog uro nen sap sarikto ambatsukap kom. Wenena, sabatsin koma, nimi wana whi nenehiropne sembe tipto lelamukap. Malia uropneri nimi teplopsinep ane sembe liamlulom aro ambatsinep aghana, tam nene sembe sarikto amoro ambatsukap kom. Allahag wana pimnepne sembe babe nen sap lemnun kom. 2 Maghag pelengero a'elehinneap, nimiri usoghag sae palihinneap, teptop nimi kamag tanepneap, ya'ag uro tam karebatsinepneap sembe ambatsirop yubu nen sap lemnun kom. 3 Allahri wali seleba, wana whi nembahinep yubu tipto lelamukap.4 Wana whi nembahinep yubu ka'eamnep nimina, sin nimi taneko tibin nenero ambatsinepba, el tanep. Imagne ponekori tatsiropne el tanne agha nimi tanekori salero wali senepti, Allah Eldamne Yame Walingeag nelepto sae tiptangkamnep. 5 Allah yubu walinge babe salero ka'elamnaba, amik uro yabilulne mikipne babe sin whingag olog lag tanep. 6 Sin nimi taneko undo wamnep aghana, ni aneko sae liro laplobik tanena, sindam nimiri Allah Elme nen kalag sipto oploa saog uro nimi whingag ali nenelamukang. Undo Kristus liagha ulamik pagha tanena, sin nimi tanekori nen sap Allahri seneropne samoro saelbanep komdi, nen seneragna wendogne tanep kom.
7 Tam nene sembe sumbatsinun. So'o nhonagna, mag sop-sop tero sukuplamlaba, nimiri meroba pongolamnaba, wero merop nimi enekori babe yongoro tenep. Allahri so'o aneko wali sukuptale seneropne agha nimiri yongoro tenep. 8 Aghana so'o nhonag ot werengkel alog kal agha pongkanep tanena, nimiri loba aro so'o aneko yo'obanep. Komoptobag amik aukti telul.
9 Wene aro lemna aghana, nangkabo a'un sembe loba nimi sembahin koma nuri senelamsiap nena, “Allahri taulbahiog nimiri ulamnepne sunsunum uro nimi yepsinepne agha ulamlulom,” aro sik senelamap. 10 A'undi samenag agha Allahri wepsiog kelmabo me wene babe yeplamsilomne sembe Allah wana sengkwanektop komne ponekori a'un ekon tahinep kom. A'undi yepto ulamsilomne neneko, “Allah si paliag nenelamukap,” aro o'ona senelamlomne agha yeplamsilom. 11 A'un nimi a'erori ulamsom senelamap nena, “Sol wali uro ulamlomne nene keknep talul aro tipto ulapmunne kekman, komobanep sum yaleba, nuri tiro nang-nang alamapne sik uro yabilul,” senelamap. 12 A'undi tiro nang-nang alamlomne agha ulapmun tanena, sol mali tahinep kom. Ot sin Allahri, “Tatsinun,” aro salag pibogneag wana palirop nimiri wana khapto uropne toman, “Tatsinun,” seogne tolamang saog uro, a'undi babe nelepto ul palamlulom.
Allahri salag pibogne sik uro yabinepneog wamlange sembe
13 Tam nene sembe sunumna nhonna, Allahri Abrahamag salag pibogne wamla. Salag palilamogne toman Allahrina, “Salag mikip nembanun aghana Na phelektopne nen nhon babe wamla kom,” sembamog. Ane sembe Eldamne siag yubu mikip nenero salag palilamogti, 14 “Nari an sik uro mikip nembagheneba, andi mangarobari mangkahyikne maikno nembahinun,” seog. 15 Wene seogpa, Abrahamdi wana khapto nang-nang aro Allahri salag pibogne neneko saelbamog.
16 Sunumna sumbatsinun. Mog so'oag nimiri tam piptangto leldalamangneag nimi nhondi yubu mikip nenero nubu phelektopne siag lelamnari, “Orolenange lemneba nubu phelektopneri na omnelul,” aro lemnep. Nimiri undo lerop tanena, ka'erop nimiri, “Sikne lepla,” aro nen yubu nepnep kom. 17 Ane saog uro Allahri seneraglamogti, “Nari kelmabo meag, ‘Tatsinun,’ aro salag pairop yubu ene anganep komne lag taleba, sik uro yabilulne el taukang,” aro yubu mikip nenero salag pibog. 18 Allahri orolenange lemnep komne ponekori anganep kom ina phende toman salag pibogneap, yubu mikip neneropneap abeneag agha yubu ambarog. Ane sembe Eldi salag pibog yubu enekoag wana paliro tilamuburi, “Taulbahilul,” aro merero nelebaburi, wana mikip nenehirop yubu ene salelamap. 19 Eldi salag pibogneag tiro wana palilamap yubu enekona, nu nong ningki loba tanebag kilbahileag aro kirik meptangto lebe senep kom kirikag kerektangkamloa saog uro yubu enekoag kerektangkamap. Nuri tiro wana palilamap yubu enekona, Allahri Mem Ae lom wilniro siliplengerop ag nubunge phiro wa'ina Allah ua urop ae lomag kerektangkamla. 20 Nu sembe ina yarebatsiropne poneko Yesus Allah ua urobag wa'iog. Melkisedekti samenag wamog saog uro Yesus memne Allah sembe pairop nimi sikini ya'ag uropne taog.