Memne Allah sembe pairopne Melkisedek sembe
7
1 Wene Melkisedek aro lemnange ponekona, Salem nimi sembe yubu sia leropne wamogti, memne Allah Paliag Sirik wamlange poneko sembe pairopne wamog. Abrahamdi ora yubu sia leropnang oro luknubahiogti, samoro yalamogpa, Melkisedek ponekoap haiptarek. Haiptarekti, “Allahri wali yeplangkelul,” aro Abraham kibog. 2 Abrahamdi saeag agha wamogne taneko ni palu sa'obare wimbaogti, Melkisedek palu nhon tarog. Melkisedek poneko el sina, “Yubu sia lenne wana porogne,” aro engero yabiog. Nen nhonna, “Salem nimi sembe yubu sia lenne,” aro engero yabiog. “Salem” aro lemnepne anekona, ma'asinne sembe lerop ane sembe elna, “Ma'asinne sembe yubu sia leropne,” aro seneragnep. 3 Ili ilinap sembe ekon uro wamap. Etneri likna piropne agha mangaptaogne babe nu ekon. El mangaptaog sum babe, tebaog sum babe nu ekon. Allah Elme komobanep kom wamla saog uro Melkisedek ponekona, papna koma ya'ag uro memne Allah sembe pairopne wamla.4 Melkisedek nubu sirik wamlange seneragto el tahut! Nuni nubu sirikne Abraham ponekori babe taluro tobogne palu sa'obare wimbi agha palu paliagne nhon elag tarog. 5 Musari aruksiog yubu sunsunum uro sin memnang Lewiri mangaroba mangarobari mangkahiek nimiri babe sikinkabo saeag agha tolamangdi, Allah sembe pogto palilamang. Sikinkabo Abrahamdi likna piogne agha mangaptangtop nimi wamang aghana, sikinkabori saeag uropne palu sa'obare wimbi agha palu nhon Lewi nimiri saeag nembanepneog wamla. 6 Ot Melkisedek ponekona Lewiri mangaroba mangarobari mangkahiek nimi wamog kom. Lewi nimi kom aghana, Abrahamdi saeag uropne palu sa'obare wimbaogti, palu nhon elag tarogpa tobog. Apna Allahri samenag Abrahamag nubu nenero salag pibog aghana, Melkisedekti amik sum Abrahamag, “Allahri mikip nembaghelul,” aro kibog. 7 “Allahri mikip nembaghelul,” aro yubu lebog nena, ot paliag urop nimiri umag urop nimiag lemnep yubu lebog. Tam nenena, saekag lemnepneog wamla. 8 Wene nimiri saeag uropne palu sa'obare wimbi agha Lewi nimi tebanep nimi tanekori palu nhon tolamang. Aghana Melkisedekna, el kamag uropne sembe mo lag nenero mome toro paibatsiog. 9-10 Nen nhon lemnep nena, Lewi anam mangaptan koma ilisag Abrahamdi Melkisedekag tarog sumeneko Lewi Abrahamdi eneng agha mangaptanepne mo wamog. Aghana ilisag Abrahamdi tarogne toman agha ilisag Lewi eldamneri babe palu sa'obare wimbi agha nhon tatloa saog uro Melkisedek ponekoag tarog senep.
Yesusna Memne Allah sembe pairopne paliagne taogha
11 Musari samenag Ibrani nimiag aruksirop yubu ambatsiog nena, “Lewi nimi Harun eldi maboap memnang taikti, nimiri saeag agha Allah sembe paibarelamsukang,” aro o'omne nenero aruktop yubu ambatsiog. Lewi nimiri pairo yeplamsiekne toman agha nia mangkina komopto wali nembahinep tanena, nen nhon lag talulne sembe teko wamnep kom. Teko orog tanena, amikag nen nhon Melkisedek saog urop memne Allah sembe pairopne nhon lag talul aro ambatsinep kom. 12 “Lewi nimi mo memnang taukang,” aro aruktop yubu ambatsiog ane sembe, ora nimi Lewi kom nimi memne Allah sembe pairopne tanep tanena, aruksirop yubu orange babe umag tanepneog wamla. 13-14 Wene aro lemnangena tam nene sembe. Allahri Yubu sunsunum uro lag taogne ponekona, nimi sisa Lewinge agha mangaptaog kom. Nu Saelba Uhiropne poneko tibin uro nimi sisa Yehuda nimi agha mangaptaog. Musari samenag, “Yehuda nimiri Allah sembe aukag taro pairobag yepsinep,” aro lebog kom ane sembe, Yehuda nimi nhon babe Allah sembe pairopne wamog kom. 15-16 Wene nimi nhon wamla aghana, “Nimi sisa eneko Memne Allah sembe pairopne talul,” aro Musari aruksiog yubu sunsunum uro nimi eneko sekitnep kom. Aruksiog yubu sunsunum uro sekitnep kom aghana, Allahri nimi eneko, “Memne Allah sembe pairopne Melkisedek wamog saogne waelbalul,” aro sekirog. Allahri mikipneag agha ya'ag tebanep komne nembaogti sekirog tanena, aruktop yubu yogne umag tanepne nene tibin sirik taog. 17 Tam nene sembe sik uro ambarog nena,
“Melkisedekti samenag ulamog saog uro
An memne Allah sembe pairopne ya'ag uropne wamlam,”
aro ambarog.
18 Wene aro ambarog aghana, samenag aruksiog yubu ene mikip komdi nimi yepsinep kom. Ane sembe, aruksiog yubu ene abolag nembaog. 19 Aruksiog yubu neneri ni wali nembahinep kom aghana, nimiri nang-nang aro tilamnepne wali phelektopne aruksiog yubu neneri nunag el nenero ambatsiog. Wali phelektop ina ane toman nu Allah peramag yalamap.
20 Yog nimi memnang Allah sembe pairopnang talamek nimi tanekona, Allahri sin sembe salag pimna kom aghana memnang talamek. Ot Yesus memne Allah sembe pairopne taogne ponekona, Allahri salag lebogneag agha memne taog. 21 Allahri salag pibogne toman agha yubu lelamogti,
“Imap So'oap Ngainge ponekori salag lekto pibogti,
seneragna wendogne seneraglamlul kom.
‘An memne Allah sembe pairopne ya'ag uropne wamlam,’ seog,”
aro mome toro pibog.
22 Salag pibogne sunsunum uro Yesus ponekona, “Allahap nimiap saekag yubu nikne wali phelektopne sik uro yabalamlul,” senenne kekneba taog.
23 Sin samenag memnang Allah sembe pairopnang taek nimina, tebanep nimi ya'ag wamnep kom nimi wamek. Ane sembe nimi maikno memnang Allah sembe pairopnang taek. 24 Aghana Yesus ya'ag uro wamle paghabog wamlul ane sembe, ya'ag uro memne wamleri, Eldi Allah sembe paia uro ulamogha ulamla aneko komobalul kom. 25 El ya'ag uro kamag wamle andarina, Elag yalamang nimi sembe Allahag molbarelamsilul. Ane sembe El mikipti, El pere agha Allahag yalamang nimi ya'ag uro nhin wali nembahinepne wamla.
26 El memne Allah sembe pairopne nubunge ponekori nunag teko ulamsilne sunsunum uro yeplamsinep. Elna Allahringe sol wali uro toropne, malinge orogne, sembenga kaolban komne wamla. Malia urop nimi agha a'eptangka El mo imag paliagne taog. 27 Ora memnang sikiniyabo saog wamla kom. Sin ora memnang sikiniyabori sop-sop ulamnepneog wamlangnena, sindam nimiri malia uropne, “Wailag nembalul,” aro Allah sembe samenag pimna taneogna, ora nimiri malia uropne sembe amik Allah sembe pimnep. Aghana Yesusna, malia uaog komdi, teko orogti, Eldamne sembe pimna koma ora nimiri malia uropne, “Kom talul,” aro ik nhonog Eldamne Allah sembe piptaog. 28 Musari samenag aruksirop yubu ambatsiogne toman mog so'oag nimi haing pesa uro wamap nimi nusamag agha wepto, “Memnang Allah sembe pairopnang sikini talul,” aro sekililamsiog. Aghana aruksirop yubu ambatsiogpa, amik sum Allahri yubu salag pibog yubu toman Elme sekirogpa, El wali uro sunsunuptangto ya'agne taog.