Paulusti yubu elkae
Filemon
sembe mome toro pibogha
Paulusti Filemonag kipto mome toro pibogha (1-3)
1
1-2 Nangkabo! Na Paulus mome nene agha a'un kiplamsin. Na Paulusti nimiag ambarelamsinnena, Yesus Kristusa poneko sembe ambarelamsin aghana, nimiri karongdi na sae kaupto kop aeag piamneongba, mome nene a'un sembe palilamna. Nanap nungkae Yesusag “Sikne” aro wana paliropne Timotiusap wamnamdi kiplamsinam. A'un kiplamsinam nimina, an Filemon sembe, “Nu babe awe nikne torop nimi wamap,” aro wanaagne wamlamba kiplangkenam. Allah Elmabo andi aeag winildalamang nimiap sembe babe kiplamsinam. Apna Yesusag “Sikne” aro wana palirop kel Apfia sembe “Nunipsa'el,” aro kiplamnam. Nungkae Arkhipus sembe, “Awe nikne wel tongolamapba, aisa neneptangtop nangdi nu malia ulamsiangba, nik nimi wamap” aro kiplamnam. 3 Nuri Allahag mobarelamsinamne, “Nuni Allah nuringeap, Yesus Kristus nu Saelbamsilne ponekoapti wana a'unag yorolamsirikti, a'un wana aingnilamsirikpa, wali wamlulom,” aro molbarelamsinam.Allah omekaogha (4-7)
4-5 Nari sop-sop Allahag molona mololamnari, an si lero Nani Allah kipto omeklamna. Nari an sembe ka'ebanoba, “Filemon ponekori Yesus nia mangkina Salelamsilne ponekoag wana palilamlari, Allah Eldamneri weptop mabo o'ona senelamsildi yeplamsil,” seongba ka'ebano. Ane sembe Allahag mololamnange abeneko pere andi ulamlamne sembe seneragto, “Naniong wali uro yeplamlamba ulamla,” aro Nuni Allah kipto omeklamna. 6 Nari Allahag an sembe molona molbarelangken nena, andi el talapmenba, Yesus Kristus ponekoap ma'ap tangtopneag agha nunag wali-walia ulamsilne sembe ni el talulam. An sembe Allahag molbarelangken nena, Nuni Allahri an yepkele andarina, el talapmenne pere agha Yesusag wana palilamlamne sembe tibin uro nimiag yubu ambarelamsululam. 7 Filemon naba nangkae. Andi Allah Eldamneri weptop mabo ni o'ona senelamsilamdi, yeplamsilamne neneri Allah Elmabo maikno wana mikip nenelamsilam. O'ona senero yeplamsilamne nene yubu ka'ebanori, wana awi yeng maikno uaneoba, nari babe ul panne mikip nembaneo.
Paulusti Filemonag, “An arukna Onesimus waban koma topsom,” aro molbaogha (8-22)
8 Ane sembe, na Yesus Kristusti wepto pogneogne wamnari sangsanga, “Andi undo unuanepneog wamlaba ualulam,” aro yubu mikip uro anag ambatnep. 9 “Unualulam,” senep aghana o'ona senehinne pere agha nari anag molona agha Onesimus sembe mololangken. Na wene sabal wamna aghana, Yesus Kristus poneko sembe ulamnaba, nimiri salero na sae kaupto kop aeag tobongkimneongba wamna. 10 Na sae kaupto kop aeag ane wamnoag anea Onesimus pone sembe Yesusag wana paliro seneraghoba, Onesimus ili saog tano. Ili saog tano ane sembe, wene nari name Onesimus sembe mologhenne nhon mololangken. 11 Samenag el andi ae lomag awe toropne arukna sol malinge wamoba, el sembe teba'en senelamom. Samen undo wamo agha wenena, wana wendogneag agha ulamlange neneri na sembe babe, an sembe babe wali yepsinep. 12-14 El poneko nari anag sae lipsene kom senelamna. Na Yesus yubu walinge ambatsinne sembe wene kop aeag tobongkiamneong aeag wamna. Undo wamnari, “Nangkae Filemon wamsenemeri yepneho,” senelamnange agha, “Onesimus poneko nangkae Filemon lunumna wamnep,” senelamna. Undo senelamna aghana, anam andi sae saekag lemna komag nari yubu karebanep kom. Na wana yengnena anba andi, “Uanun,” senenne agha undo tanep. Nari anag, “Unualulam,” senun kom. Ane sembe el nimi na wanaag sirikne neneko anag samoro pogholaneba, “Andi ae lomag awe toplul, to, nen nanag pogholalulam, to,” aro anba, andi ualulam.
15 Wene abene Onesimus anap a'eptangto wamtom. Aghana, nari seneraglamnange nene, “Eldi samenag anag agha koloptaromba, Allahri yepsiori Elba, ‘Anag Onesimus samoro yaleba, a'un ya'ag ma'aptangto wamturom,’ aro koloptaromne nene Allahri libo,” aro seneraglamna. 16 Onesimus poneko samen an arukna wamo aghana, saombale sumeneko an arukna aghabog sembanep kom saog wamlaba, eldi Yesusag wana palilamlange sembe, “Naba nangkae walinge wanaagne,” sembalulam. Elna na Paulus sembe wanaag sirikne wamla aghana, an sembe walinge phelektopne wamla. Wene el wamlangena, an yepsirop nimi aghabog kom aghana, eldi Yesusag wana paliropne sembe anipsae taptopne wamloa saog wamla. 17 Nangkae, andi na sembe, “Nu Yesusag wana palirop nimiri awe nikne tolamnam,” sembanelam tanena, Onesimus nen anag samoro yaleba, na salero tomnohom saog uro, Onesimus yaleba toplulam. 18 Eldi anag loba uaori, andinge kamna wamo agha laploa yao tanena, eldi kamna samoro tatkenne ni ane sembe nanag timbalul. 19 Andinge kamna el sa'oag kareploroba tatkenepne wamla tanena, “Nari lumbanun,” aro na Paulus saeri mome ane anag palilamna. “Nari lumbanun,” aro salag palilangken aghana, nari yubu pere agha samenag Yesusag “Sikne” aro wana palilamomdi, wene babe Elag seneraglamlamdi, an nong ningki nanag tanepne sembe, “Hae tatnululam,” senun kom. 20 Ane sembe, Yesus Kristus nu talulamsildi, salelamsilne ponekoag agha, nu naro naipsae neneldalamapti, na yepto wana yeng nembanululam. “Onesimus yaleba, opna koma wali uro toplulam,” aro mololangken. 21 Nari mome ane palilamnange nene, “Nari wanaag babe kembaleri ualul tiog,” sembamnari palilamna. Apna na el wamnangena, “Na molbaghen komne babe, nen phelekto walinge aghabog ualulam,” sembamna.
22 Nene sembe undo piamnarina, na kop aeag wamnange sembe, nangkabo a'undi molona Allahag mololamlomba, sae lopneleri, andi aeag poa yanele sum eneko anag yanun. Ane sembe andi aeag na sembe ae lom nhon kolbamlulam.
Komoptobag kipsiogne (23-25)
23 Nungkae Epafras ponekori Yesus Kristus nu Talulamsildi Saelbamsilneag wanaag paliro seneraglamlange sembe nimiri kop aeag tobongkibongpa, nanap nhon wamnam. Eldi babe a'unag, “Nangkabo,” aro kiplamsil. 24-25 Na nangkabori awe nikne tolamap nimiri a'un sembe kiplamsiang nimina: Markusap, Aristarkhusap, Demasap, Lukasapti kiplamsiap. “Yesus Kristus nu Salelamsilne ponekori wana a'unag yorolamsileri, a'un nong ninkgi yepsilul,” aro kiplamsiap. Na Paulusti kiplamsindi palilamna.
Abenda.