Titus
Sembe
Paulusti Mome Toro Pibogha
El nenerop yubu palilamap
Titus ponekona, Yunani nimi wamogti, kere kon karepto kon teptop kom nimi wamogti, Kristusag wana palilamog. Kristusag wana palilamogpa, Paulusti Yesus Yubu Walinge ambatto tongolamogpa, Titus elap ma'aptangto ambatto tongolamek (Galatia 2:1-3). Yubu ambatto tongolamekti, Paulusti Titus poghogpa, as Korintus piogti, yubu ambarelamsiog (2 Korintus 7:6, 13-15; 8:6, 16-24).
Paulusti Titus sembe yubu ene mome toro pibog sum enekona, Titus mag kanero longorop mog so'o Kreta wamogpa, Paulusti yubu ene mome toro pibog. Anamag Paulusap Titusap Kreta so'oag yubu ambatto tongolamsirekti, Paulusti Titusag, “Na pineba, wapmendi as ni Kreta mog so'oag ubu pilamlange sunsunum uro Kristusag seneragtop nimi ambatto wembahinep nimi ebahimendi, toro seki-seki yabihilulam,” aro Paulus Kreta so'oag agha laploa piog (Titus 1:5). Mome ene Titus sembe mome toro pibog aghana, “Yesusag wana paliro winiptangtop nimi niri yubu ene ka'ebaukang,” aro mome toro pibog.
Paulusti Titus sembe mome toro pibog yubu eneagna, sin samenag wamek nimiri sam Kristusag wana paliro winiptangtop nimiri tam nubunge sin mamun haildalamek tam sembe yubu wenelamsiog. Sin mamun haildalamek tam nenena, Kristusag wana paliro winiptangtop nimi saelba ulamsinep nimi sembe, Kristusag wana palirop nimiri ulamnepne sembe sin mamun haildalamekpa, wenero ambatsiog. Paulusti Titusag wenelamogti, “Sa'a-sa'a ulapmenag, ‘Sindi imnikti nelepto uakang,’ senenne agha walinge agahabog ulamlulam,” aro wembaog. Kreta nimi a'ero-a'ero wamek nimina, sabal saog taek nimiap, kaubuniap, arukna nenehirop nimiap wamek. Sinag Titus ponekori tipto wenero ambarelamsinep yubu babe Paulusti ambarog. Apna Kristusag wana palirop nimiri ulamnepne sembe wenelamsiogti, “Nimi yepsinep kom yubu a'eptanep yubu sarekarebaheng komdi, nimiap waptan koma wana mamleba, ‘Nangkae,’ aro ma'aptangto wamlulom,” aro wembahiog.
Paulusti Titus sembe mome toro pibogha lomag wamlange
Paulusti Titus kibog yubu (1:1-4)
Yesusag wana palirop nimi wenero paia uhirop nimi sekitsinepne sembe (1:5-16)
Nimi a'ero-a'ero Yesusag wana paliro winiptangto wamek nimiri ulamnepne sembe (2:1-15)
Yesusag wana paliro winiptangtop nimi paia uhinepne sembe wenerop yubu (3:1-11)
Mome komobanebag kipsiog yubu (3:12-15)