7
1 Nangkabo nari wanaag wamlom nimi. Allahri nunag undo salag pibog yubu ene salelamap ane sembe, sembenga ni nuri nongap nuri wanaap kaluro mali nembahinepne eneko po'oro nundam nimi a'aleptangkamukap. Undo a'aleptangkamebe tanena, Allah kiplamapne pere agha ot Allahri senenne mo sunsunum uro uililamukap.Paulus wanaag awi uaogha
2 A'undi wanaag nu sembe kolo nembatsisut. Nimi nhonag malia uahibo kom. Nimi nhonag babe loba nembahibo kom. Nimi nhonag babe ingisaploa saog uro eldinge haoghaba tobobo kom. 3 Wene aro lemnangena, a'unag tam pelengero walamsin kom. Lemna saog uro a'unna, nuri wanaag wamlom. Ane sembe a'unap nhon kamag wameberi, a'unap nhon tebaukap sembamap. 4 A'unag wana khapto seneraglamnari, ali semban koma a'un maipsirop yubu ora nimiag ambarelamsin. Na wana mikip sirik ulamnelba, ni seklenne seklelamabag nari wana siriro awi nubu ulamnel.
5 Nu seklenne seklelambongena, Makedonia so'oag pibori, nuri nong ene ik nhon babe tek-tek papto wamna koma wamobo. Ot tala-tala palamoboa seklenne seklelamobo. Kon alibag sip nimiri nu yubu toraplamsiong. Wanaag sip log senelamobo. 6 Aghana Titus poneko nunag yaonge pere agha wana ikin urop nimi wana keyagman nenehiropne Allah ponekori nu wana mikip nembahio. 7 Ot el nunag yaonge mo kom aghana, a'undi el wana mikip nembaomne pere agha nunag tipto wana mikip nembahio. A'undi na sembe wana ikin senelamnelomdi, “Yaghe, welaro wamlaro, haiptahabe,” senelamlomne eneko Titus ponekori nunag ambatsio. Ambatsioba na wana yeng ulamnelne nubu sirik tao.
8 Nari samenag a'unag mome toro pimnonge nenekori a'un wana ikin nembahio aghana, tam nene sembe babe, “Yaghe, nari yubu ambatsinonge nene ambatsisene komne agha ambatsino,” senelamna kom. Nari mome toro pimno yubu neneri a'un wana ikin nembahio. Ane sembe samenag, “Ambatsisene kom,” senelamno aghana, ot sesog sembe wana ikin nembahioba, 9 malinge libomdi, seneragna wendogne seneraglamlom. A'undi wanaag ikin senelamomne sembe wana awi uaneo kom. Ot nuri ambatsibo yubu nhon-nhon sembe a'un wana mali tan koma, Allahri senenne sunsunum uro wana ikin senelamomneag agha malinge libomdi, seneragna wendogne saelbaom. Tam nene sembe wana awi ulamnel. 10 Nimiri wana ikinne agha Allahri seneropneag sunsunum uro, “Yaghe,” senelamnep. Allahri seneropneag sunsunum uropne neneri nimi seneragna wendogne manduk-duk arop kom seneragna lag nembanepti taulbahinep. Aghana mog so'oag nimiri mo wana ikin uro seneropne pere agha teptopne mo lag nembanep. 11-12 Tam nene sembe, nari mome toro pimno yubu ka'ebaomdi, Allahri seneropne sunsunum uro a'undam nimi wana ikin uro seneraglamlom. Nari a'unag mome toro pimno yubu neneko, ot el wana sengkwanekto uao nimi sembe kom. Apna eldi ora nimiag malia uao nimi eneko sembe mome toro pimno kom. Aghana a'undi nu sembe, “Sol wali uro ulamsebe,” senelamlomne Allah whingag keknep talul aro a'unag mome toro pimno. A'undi wana ikinne Allahri seneropne sunsunum uro seneraglamlomne eneri a'unag lag nembarelamsilne kemeldalamsut. Wene a'un logti, “Sol wali uro walinge ulamsebe,” senelamlom. “Sikne ulamobonge lag nembarelamsisebe,” senelamlom. “Orolenangeap sik komneap o'olamseberi sikne ulamsebe,” senelamlom.
13 Ni undo senelamomdi, ulamomneag agha nu wana mikip nembahio. Nu wana mikip nembahioba, a'un nimi niri Titus wana keyagman nenelamomne sembe awi ulamoba, nunag babe wana awinge loloro ma'aro ulamsil. 14 Samen Titus a'unag anam yan komag nuri elag ambatto a'un omeklamsibo. Titus a'unag yaoba, omeklamsibo yubu eneko ni keknep taoba, sik uro ipsio. Sik uro ipsio ane sembe, nuri omeklamsibonge sembe a'undi na ali nembaneom kom. 15 A'undi wali uro el toro kibomdi, eldi a'unag ambatsio yubu pet-pet aro log senero wali ka'ebaom. A'un nimi ni wali uro ka'ebaomne seneraglamlari, a'un sembe el wana maikno tangto o'ona senelamsil. 16 Ane sembe, “Nari yubu ni wali uro ka'ero ulamlulom,” aro sik senelamnange sembe awi ulamnel.