6
1 Wene nu Allahap sae tiptangto awe tolamap. Ane sembe a'unag wenelamsiap nena, Allahri a'unag wana yororo senelamsil yubu saelbamlom yubu eneko, lelpelag lopmunagti, yae wamlulom. 2 Tam nene sembe Allahri yubu lelamog nena,“Nari sumene sembahi sumeneko andi leplum yubu ka'ebahi.
Nari an talulangkehi sumeneko yepkehi,” seog.
A'undi kemelamsut. Wene wamapne Allahri wali sembaog sum. Wene wamap sum enena, Allahri nimi taluhirop sum.
3 Nuri nimiag yubu ambatto tongolamsiapne enekona, nimiri nu se'el nembahikag aro puri tikto phukul piloa saog uroba punpun tiptopne nhon babe nimi wali pinep ina toman palilamap kom. 4 Aghana nia mangkina uro yabinep ina agha, “Allahri arukna wamap,” aro lag neneldalamap. Nimiri nu luknubahiongneag babe, seklenneag babe, eka'uk uropneag babe wana khapto ulamap. 5 Nimiri nu opsionga babe, haing sae kaupto kop aeag tobongkipsionga babe, nimiri yanghang alamsionga babe awe toro ulamobo. Ae inipna mamna koma, kwaneng ten koma, kilim weanga awe tolamobo. 6 Allah sembe awe tolamobori, tolamap nena, seneragnangeag agha, wanaag malinge wa'eptopneag agha, wana paliropneag agha, win-win aropneag agha lag neneptangto El sembe awe tolamap. Eldamne Yame Walingeag agha, wanaag o'ona senehiropneag agha, 7 sik yubu leropneag agha, Allahri mikipneag agha El sembe awe tolamap. Ora nimiri, “Aisa neneptangtop nimi mal tabaukap,” aro saeri yin salelamlonga saog uro nu sae sirik sibap, sae waneng sibap ni sae phende abenekori ot wana porogne saelba nu aisa nenelamsiang nimi toraplamsiap. 8 Nu si paliag nembahinepne toman, mombolag nembahinepne babe, nu san tilibahinepne toman, nu omekahinepne toman babe awe tolamap. Nuri sikne lelamap aghana nimiri, “Haing kunuhirop nimi,” senelamsiang. 9 Nu sembe tapto el wamang aghana, ekon nimi saog uro ulamsiang. Nu sop-sop tebanebag ua ulamap aghana, nu kamag uro wamapne kembahisut. Nu taeplam-taeplam lopsiong aghana, nu ya'ag opsiong kom. 10 Nu wamapne kembi agha nimiri, “Wana ikin uro wamang,” sembahinep aghana, nu sop-sop wana awi uro wamap. Nu sembe, “Sae agha orog nimi,” sembahinep aghana, ora nimi maikno tup nenelamsiap. “Sae agha orog nimi,” sembahinep aghana, nia mangkina nunag wamla.
11 A'un Korintus nimi sembe wana maiknoro seneraglamsiapti, a'unag lag phoro yubu ambarelamsiap. 12 Nuri wana serektop komdi, a'un nuri wanaag nimi wamlom, aghana a'undi wana nu sembe serekaombana, nu a'undi wanaag wamnep kom. 13 Wene nari maboag yubu lelamna saog uro mololamsin nena, nuri a'un sembe wana ina kubatsibo saog uro a'undi babe wana ina nu sembe kubatsululom.
Allahri Mem Ae nimi kulomag uroba
14 Kristusag wana palirop kom nimiap sae tiptangto ina nhonag nelepto tol tongolamseng kom. Wene aro lemnangena, Allahri irikna ingisaploropneap, wana porog senenneap nikag wamnep kom. Apna tibin wareropneap inibinneap nikag ma'aptanep kom. 15 Kristusap el aisa neneropneapa yubu nikne lero wamnep kom. Apna Kristusag wana palirop nimiap elag wana palirop kom nimiap seneragna nikne wamnep kom. 16 Mem ae Allah omektop aeap, mem ae phia pharop aeap ma'aro nikag nembanep kom. Wene aro lemnange nenena, nuna Allah kamag uropne ponekori mem ae wamap. Tam nene sembe Allahri yubu lelamogti,
“Na sinap nhon ua ulamneri,
sin anabiag wa'ina yabalamnun.
Na Sikini Allah wamneba,
Sinna Nari paia uhirop nimi wamukang,” seog.
17 Ane sembe Nu Saelba Uhiropneri yubu lelamogti,
“Sin anabiag agha lambamundi,
a'eptangto ul palamlulom.
Allah sembe pimnep komne nhon babe po'oban koma wapmunba,
Nari a'un wali toro kipsinun,” seog.
18 Nu Saelba Uhiropne Mikip Phelektopne ponekori,
“Na a'un sembe A'uni taneba,
A'un Na sembe Nari mabo kelmabo wamlulom,” seog.