5
1 Wene, “Haingdi imnep komne sarekereplamap,” senne nenena, wene mog so'oag kalun aeag ua ulamloa saog uro wamap nimi nong eneko loba tanep. Nu kalun ae wamloa saog nong ene loba tanep aghana, nu el uro wamap nena, nimi saeri sobanep kom ae Allahri nu ya'ag uro wamnep ae imag sip sobarelamsil. 2 Nu wene mog so'oag wamap nimi nong aneko wanaag seklero, “Yaghe, nu imag wamnep ae enekori nu kaluro niknibahisori yeng nembahiso,” senelamap. 3-4 Wene nong kalun ae saog wamap nena, nunag ikinne seklero, “Yaghe,” senenne agha, “Mog so'oag nong ene kwiripto tebaho,” senelamap kom. Ot, “Nong walingeag wangkahane,” senelamap. Ane sembe imag urop ae wamloa saog nong enekori nu kaluro niknibale tanena, nu nong kwiriptangto mo wamukap kom. Nhon kwiriptangkamnaba, nhon wangkamna tanena, kamag uro unne nenekori tebanep nong eneko kom nenero niknibalul. 5 Ni aneko nunag undo uro yabinepne sembe Allah Eldamneri nu sunuro o'obarelamsil. Nunag amik uro yabinepne eneko ot sik uro yabilul senenne kekneba tatsiog nena, Eldi Yame nunag tatsiog.6 Ane sembe nu sop-sop wana khapto sik uro el wamap nena, wene nu mog so'oag wamnep nong eneag ua ulamap tanena, nu Saelba Uhiropne ponekoap nik asag wamnep kom. 7 Tam nene sembe nu haingdi imnepneag agha ul palamap kom aghana, nu Saelba Uhiropneag wana paliropneag agha ul palamap. 8 Nen tipto lemnuanne, nu wana khapto sik uro yeng sirik senelamap nena, “Mog so'oag wamnep nong eneag agha a'eptangto wamsebe andarina, nuri taptop asag nu Saelba Uhiropne ponekoap nikag wamsebe,” senelamap. 9 Ane sembe nuri wana yengag agha, “Ulamukap,” senelamap nena, nu Eldi asag wamnepne babe, nu wene nongag ulamnepne babe, “El wana yeng nenelamukap,” aro ul palamukap. 10 “El wana yeng nenelamukap,” aro ulamukap nena tam nene sembe. Kristus ponekori tam kemero kareplamle sumeneko nu nimi nhin el puka uroba whingag lag tanepneog wamlul. El whingag lag talamebe sumeneko nu mog so'oag nimiri a'ero-a'ero nimi nong enekoag walingeap malingeap ulamapne sunsunum uro, “Kamna tobukap,” aro el whingag lag taukap.
Allahap nimiap ma'asin yubu ambatsiropne sembe
11 “Nu Saelba Uhiropne whingag nimi log uro wamukang,” aro el uro wamap ane sembe, nuri nimiag, “Sik senelamlulom,” aro yubu ambarelamsiap. Nuri wanaag agha ulamapne Allahri tibin uro kemelamsil. Apna na yeng ulamnep nena, a'undi nuri wanaag agha ulamapne kembi agha wanaag seneraglamlomneag babe, “Tibin uro el wamlom,” senelamna. 12 Nundam nimi, a'un whingag metmereng aro, “Sekelil dalamukap,” aro ulamap kom. Aghana ora nimiri nimi wanaag wamlange kemenelbahin koma mo haingdi ipsinepne paliag nenero kiplamsiang. A'undi sin nimi tanekoag yubu walinge nu sembe ambatsinepne mo tibin nenero a'unag ambarelamsin. 13 Ora nimiri nu sembe, “Sin nenek salehirop nimi,” senelamsiang tanena, nuri Allah sembe mo ulamap. Ora nimiri nu sembe, “El uro wana hektop nimi,” senelamsiang tanena, a'un sembe yubu ambatto yeplamsiap. 14-15 Nundam nimi sembe ulamap kom nena, Kristus poneko el nhonog wamla aghana, nimi ni sembe tebaog. Ane sembe Elap ma'aptangtop nimi ni tebaek. El nimi ni sembe tebaog andarina, nimi teptopneag agha Elap ma'aptangto kamag tangtop nimi ni taneko sindam nimi sembe nen kamag uro wamnep kom. Ot El tebaogti kamag taogne poneko mo sembe kamag uro ua ulamukang. Ane sembe Kristus ponekori o'ona senehinne nenekori nu irikto pabalamsilba, nuri tam kareplamap nena, nundam nimi sembe awe tolamnep kom. Ot nu sembe tebaogti, kamag tangtopne poneko sembe awe toro ulamukap.
16 Wene tam neneag agha nuri mog so'oag nimi nongag uropne kemelamsinne sunsunum uro seneraglamukap kom. Otsik Kristus samenag mog so'oag nimi nong wamogpa ililamubu. Ot wene el mog so'oag nimi nong wamogne sembe seneragna koma El sembe el uro wamap. 17 Ane sembe, nimi nhon Kristusap ma'aptangtop tanena, Allahri wendog sunuropne tangkamnepneog wamla. Samenne kom talbana, wendogne uro yabil. 18 Ni undo uro yabinepne ot Allahri Elap nunap Kristus pere agha nen ma'alamsiog. Ma'asin yubu eneko ambatsiropne sembe nu sa'oag awe tatsiog.
19 Ma'asin yubu enekona, Allahri irikna pibogpa, mog so'oag nimiri phiro ingisaplobek. Irikna phiro ingisaplobek aghana, sinag tam pelengkan koma Kristus ponekoag agha Allahri mog so'oag nimi kiliro Eldamneap nen ma'alamsiog. Nen ma'alamsiogti, nuri sa'oag palilamogti, “Ma'asin yubu eneko ambarelamsululom,” aro nunag pipsiog.
20 Ane sembe Allahri nu pere agha mog so'oag nimi olnoro yopsiloa saog uro nu Kristusti yubu sia lenne poa ambatsirop nimi wamap. Kristus sembe a'un moloro ambarelamsiapti, “Allahap nen samoro ma'aldalamlulom,” aro olnoro ambarelamsiap. 21 El Kristus poneko malia uropne ekon aghana, malia ualoa saog uro Allahri nu sembe elag tam pibog andarina, Elap ma'aptangtopne pere Allahri wana porogne nunag tanep.