Allahringe wali-walia uropne tognoro pibogne sembe
4
1 Wene nimi yepto yubu ambarelamsiap yubu enekona, Allahri nunag yareag senelamsiogti, “Yubu ambarelamsululom,” aro awe tatsiogne sunsunum uro yubu ambarelamsiap. Allahri nu yareag senelamsiogti, awe tatsiog ane sembe nu, “Sololamapti ta'ap sukap,” senelamap kom. 2 “Ta'ap sukap,” senelamap kom aghana, nuri yubu ambatto ul palamap nena, nimi haing kunuhiropneap, Allahri yubu sengkwanekto neneropneap ul palamap kom. Undo orolenange ambarelamsiseberi, tognoro ul palamsebe tanena, mo ali neneptanepneog wamnep. Ni tognoro ul piropne ali neneptanepne neneko wa'epto toboglamap aghana, tibin uro sik yubu mo ambarelamsiapne pere agha nimi ni whingag nundam nimi sekelildalamap. Nuri yubu lero Allah whingag ul palamapne nimi niri kemelamsisengdi, sindi wanaag, “Sikne to, kom to,” aro seneragto tam karebaheng. 3-4 Nuri lag phoro tibin uro Kristus yubu walinge ambarelamsiap. Aghana wene wamap mog so'o ene saelbamsil phia nenekori nimi haing ubahiloa saog uro sindi seneragnange inibin nenelamsil. Inibin nenelamsilba, sin tebanep nimi sembe nuri yubu walinge ambarelamsiapne neneko tognoro maruklamsil. Yubu eneko phia nenekori tognoro maruklamsil andarina, Kristus sembe tibin uro imnep kom. Yubu walinge Kristus Allah Yame sunumna wamlange poneko sembe sindi tam lelekto El mo paliag wamnepne imang wareroba neneko tibin uro kembanep komdi, Elag sikne aro seneragnep kom. 5 Nuri yubu ambarelamsiap yubu enekona, nundam nimi maiptangto yubu ambarelamsiap kom. Nuri yubu ambarelamsiap yubuna, “Yesus Kristus ponekori nu Saelba Uhiropne wamlaba, nu mo Eldi awe toro a'un yepsinep nimi agha wamap,” aro ambarelamsiap. 6 Yesus Kristus sembe yubu ambarelamsiap nena, Allahri samenag, “Inibinneag agha tibinne warebale,” seogne ponekori nuri wanaag warebatsiog. Warebatsiog andarina, “Allahringe imang wareropne Kristus poneko whingag wamla,” aro nunag tibin tangto el tahiog.7 Nu tup nenehiropne eneko Allahri nunag pipsiog nena, so'oag agha ma'i sunuropne lomag tognoro piploa saog uro tup nenehiroba walinge eneko nunag pipsiog.a Nu so'oag urop nimiag pipsiog andarina, nunag agha uro yabinep komne, ot Allahri mikip phelektopne enekoag agha uro yabileba, lag tangto yabilul. 8 Nu tara tara agha arolamsiang aghana, nu seklem taraplopsiang kom. Nu wana ikin urop aghana, wana ikin along wamap kom. 9 Opsinep nimiri nu sarekereplamsiang aghana, paia uhiropne ponekori nu laploamsil kom. Nu tobogto pelengelamsiang aghana, nu loba nembamsiang kom. 10-11 Nuri Yesus yubu ambatsiropne sembe nu kamag wamap nong enekoag, “Eldi kamag nenehiropne nunag lag tangto yabilul,” aro sop-sop nuri nong tebanebag neneldalamap. Ane sembe nu sop-sop tol tongolamapne pere Yesus tebaogne lag nenero poa palamap andarina, nu nimi nong wamapneag El kamag uropne babe nunag lag tangto yabilul. 12 Abene agha tepnange nunag ua ulamsil aghana, kamag uro unne neneko a'unag uro tahioba, ua ulamsil.
13 Allah yubuag nimi nhondi, “Sik sembamna ane sembe yubu lemna,” aro mome toro pibog. Eldi sikne aro seneragnange nene nuri wanaag babe sik senelamap ane sembe yubu lelamap. 14 Nu el uro wamap nena, nu Saelba Uhiropne Yesus poneko teptopneag agha kamag nembaogne ponekori nu babe Yesusap nhon kamag nembahilul. Kamag nembahileri, a'unap nhon El whingag poa yahilul. 15 Ni aneko a'un yepsinepne sembe uro yabinep andarina, Allahri nimiag wana yororopne sabo tangto yabalamla. Sabo tangto yabalamlaba, nimi maiknori, “Naba naniong,” aro omekto kiplamukangne pere agha Allah sembe kibiang towalengero omektopne maikno tangto yabilul.
Haingdi imnep komneag sikne aro seneragto ul piropne sembe
16 Ane sembe nuri, “Sololamapti ta'ap sukap,” senelamap kom. Nuri mog so'oag nimi nong ene pesa tangto yabinep aghana, nuri wanaag sop-sop nimi wendogne nenelamsil. 17 Nu wene seklenne olog ikinne sesog sembe seklelamapne neneri nu sembe kibiang towalengeroba nubu sirikne phelektopne nunag poa yalamsil. Kibiang towalengeroba nubu sirikne phelektopne nunag tanepne eneko ya'ag uropne wamla ane sembe, nu wene ikinne sesog seklelamapne neneko mo keyagman uro sekleropne agha senelamap. 18 Haingdi imnepne eneko mo sesog uropne wamla aghana, nuri haingdi imnep komne ya'ag uropne wamla. Ane sembe haingdi imnepneag kemero nelepto sarekereplamap kom aghana, nuri haingdi imnep komne sarekereplamap.