Allahri salag wendog yubu pibogne ambatsirop nimi sembe
3
1 Wene aro lemna tanena, nundam nimi nen alniro maiptangto sekelildalamap sembanep te? Ora nimi a'unag yanba, a'undi sinag lemnep nena, “Nimi etneap ma'aptangto wamlomdi, yubu poa yalom?” senep. Wene senepti sinag, “Mome toroba lag nembatsululom,” aro sinag molbahinep. Undo sinag molbahinep aghana, a'undi nu sembe babe ekon te? A'un nimi nhondi to, ora nimiri to nunag mome toroba tatsisengba, a'unag lag nembatsisebe taneogna, sik sembanep senelamlom te? 2-3 Nunap ma'aptangto sekitsinep mome toro pirop nimina, Kristus eldamneri nu sembe mome toroba tatsiloa saog uro nimi ni whingag a'undam nimi wamlomne pere agha kekneba lag nembarelamsil. Nu sembe Kristus ponekori mome toroba lag nembarelamsilne enena, mog so'oag nimiri bolpen saelba mome tolamang saog uro kom. Mog so'oag nimiri sabo kirik alibag mome toroba saog uropne kom aghana, nu sekitsinep momena, nimiri wanaag mome tolamloa saog uro lag nembarelamsil. Kristus ponekori nu sembe mome toroba lag nembarelamsil nena, nuri a'unag Kristus yubu ambatto yeplamsibo. Ambatto yeplamsibongeag agha Allah Kamag uropne poneko El Yameri a'undi wanaag tolamoba, a'undi sik senelamlom. A'undi sik senelamlom nena, Kristusti nu sekitsiog mome toro piroba saog uropne nuri wanaag toptaog. Nimi niri a'undi sik senelamlomne kembi agha nu ambatsirop nimi sembe el tanep nena, nu sik tapto Kristusap ma'aptangtopneag agha yubu ambarelamsiap.4 Nuri Kristus pere agha undo Allahag wana paliro sik senelamap. 5 Nundam nimi mikipneag, “Sunsunum wamap,” aro seneraglamap kom aghana, Allahri nu mikip nenelamsilne agha sunsunum uro wamap. 6 Eldi salag pibog yubu wendogne amoro ambatsiropne sembe nu mikip nenero sunsunum nenelamsil. Allahri salag pibog yubu wendogne momeag mo toro pibog kom. Aruksirop yubu momeag mo wamlangeri nimi teplopsinep. Aghana salag pibog yubu wendog yubuag agha El Yameri nimi kamag nenelamsil.
7 Allahri samenag salag pibog yubu aneko sabo kirik alibag mome toro pibog. Samen salag pibog yubu aneko, “Yepsinun,” aro pibog aghana, nimiri sunsunum uro uanep komdi nimi teptopne mo lag nembanep. Samen salag pibogne ene imang wareroba toman lag taog, aghana nimi teptopne mo lag nembanep. Musa ponekori yubu eneko payaog sumeneko el whingag imang warelamogpa, Israel ponekori likto pirop nimi tanekori Musari whing kemelamekpa, omomdi kembanep kom wamog. Musa whingag imang warelamogne omomdi kembanep kom aghana olog amikag a'oplamog. 8-9 Nimi teplopsinep yubu eneko ambatsiropne pere agha imang wareropne lag taog. Undop pagha tanena, Allah Yameri nimi wana porog nembahinep yubu ambatsiropne eneko imang phelekto warehinneog wamla. 10-11 Nari yubu lemnange enena, samen imang wareroba wamogne eneko ot pogtopne agha wamogpa, imang wareropne neneko olog uro wareamog. Kom tanepne neneko imang wareropne pere agha lag taog tanena, ya'ag uro wamlulne neneko ot nubu uro phelekanepneog wamla. Ane sembe wene imang warelamlange phelekto nubu uro warelamla.
12 Wene Allahri salag pibog yubu wendogne ambarelamsiap yubu eneko, “Ya'ag uro nubu phelektopne wamlul,” aro wana palilamap. Ane sembe nu wana khaptop sirik wamapti, yubu lag phoro ambarelamsiap. 13 Musa samenag el whingag imang warelamogpa, Allah yubu Israel nimiag sop-sop ambarelamsiogti, komopto lelamoghag abeneko el whing marukuldalamog. Marukuldalamog andarina, el whingag imang wareropne a'oplamogha aneko Israel nimiri imnep kom. Aghana nuri yubu ambarelamsiapne undo unulamap kom. 14-15 Musari yubu ambarelamsiogti, eldi whing marukuldalamog aghana, sin Israel nimi taneko usog mikip tangom agha wene wamap li babe sindi nimi yina liksiek nimi usog mikip wamang. Allahri samenag Israel nimiap yubu nikne salag pibog yubu ene wene babe mome kemelamangdi, yubu lelamang aghana, Musari eldamne whing marukuldalamog saog uro sindi wanaag maruktangtoba nhondi sindi wanaag seneragnange wana sao kauplamsil. Ot Kristusap ma'aptangtopne pere agha sindi wanaag maruktangtopne neneko kom tanep ane sembe, wene babe sin usog mikipti seneraglamang kom. 16 Aghana nimi nhon nu Saelba Uhiropneag samoro yaleba, maruktangtopne neneko toro kolbalul. 17 Nu Saelba Uhiropne ponekona, kamag nenehirop Yame wamla. Nu Saelba Uhiropneri Yame ua urobag aruksirop yubu umag wamna koma wamap. 18 Nu whing tognoro maruktangtop kom nimi ni wamapne nu Saelba Uhiropne imang wareroba nunag lag tangto yabalamla. Nu Saelba Uhiropneri Yame imang warelamla saog uropne nunag lag tangto yabalamlaba, El yame sunumna wamlange saog talamapne pere imang wareroba aneko nunag nubu tangto yabalamlul.