2
1-2 Na a'unag yanepne sembe, a'undi na wana awi nembanohom sembano. Undo wamnep aghana, “Wana ikin nembahiseneba, etneri na wana awi nembanep?” sembano. Ane sembe, “A'un nen wana ikin nembahineagti, wene yanun kom,” aro tam karebano. 3 Tam nene samenag anam yan komag mome toro pimnonge, “A'unag yaneba, na wana awi nembanep nimiri wana ikin nembaneikag,” aro seneraglamnori, a'unag mome toro pimno. Nari a'un nhin sembe sik senelamnangena, na wana awi nenelamnelne neneri a'undi wana ni babe awi nenelamsil. 4 Nari samenag a'unag mome toro pimno yubu eneko, wana ikin uro seklelamnori, engero hail mag sapsabi mome toro pimno. “A'un wana ikin nembahinun,” aro mome toro pimno kom aghana, a'un el uro wapmunba, “Nari a'un sembe wana maiknoro o'ona senelamsinne el talulom,” aro a'unag samenag mome toro pimno.Nimiri malia uropne tam wailag nembanepne sembe
5 A'un nimi nhondi na wana ikin nembaneo tanena, na mo wana ikin nembaneo kom. A'un nimi ni babe olog wana ikin nembahioba, el taneo. “Olog wana ikin nembahio,” aro lemnange nenena, sikne wamle agha orolenange phiro lel pineagti, “A'un nimi ni olog wana ikin nembahio,” aro lemna. 6 A'un nimi maiknori wenero eldi uaonge sembe ikinne pibomne sunsunum uro pibom. 7 Sunsunum uro pibom ane sembe, wene el wana ikin along taleagti, nimi enekoag nen ma'aro ikinne pimna koma tam wailag nenelapmundi, elag wana yororo wana keyagman nembamsut. 8 Ane sembe, “A'undi el o'ona senelamlomne lag nenelamlulom,” aro wenelamsin. 9 Samenag a'unag mome pimnonge, “Nari yubu ni ka'elamukang to, kom to,” aro a'un miplamsinori, mome toro pimno. 10-11 Malia uao nimi enekoag wana yororo tam kom nembalom tanena, nari babe nimi enekoag tam nenero tam palilamna kom. Phia sikini nubunge nenekori nu sembe, “Ina selepne toman nembahineri luknubahinun,” aro seneragto ulamlange sembe nu ekon uro wamap kom. Ane sembe, “Phia sikini nenekori nu ina selepne toman nembahileag,” aro nimi enekori malia uaonge nari wailag nenero tam kom nembano. Kristus ponekori na ililamnelba, a'un wali wamnepne sembe, “Nari nimi enekoag tam pimnep,” seneropne wailag nembanori, tam kom nembano.
As Troas wamogpa, Allahri Paulus wana mikip nembaogne sembe
12 Samen Kristus yubu walinge as Troas ambarel pihisi sum eneko, nu Saelba Uhiropne ponekori na pinep ina yarebatneog. 13 “Naba nangkae Titusap haiptanunam,” sembahi aghana, as anekoag wamog kom. Ane sembe, nari wana aingnibanep kom saog ulamneogpa, “Pinun,” aro as Troas nimiap kiptaburi, Makedonia so'oag pihi.
14 Ot Nuni Allahag, “Naniong, wali yeplamsilam,” aro kiplamna. Kristusap ma'aldalamapne sembe Allahri nu sop-sop menangaro nimi whingag pabalamsil. Kristusap wali ma'aptangto uropne sembe el tangto seneragnep nena, song walia ualoa saog wamlaba, Allahri nu pere agha tala-tala sip el nenero lag nenelamsilba, nimiri ulomag song wali uropne lag tanep. 15-16 Song walinge enekona, nu Allah sembe Kristus song walia towalengeropne saog wamap. Nu Kristus song saog wamap nimiag sin mali talamang nimiri nu nimi teptoba song malinge saog senelamsiang. Aghana sin talulamsil nimiri nu kamag nenehiropne song walinge saog senelamsiang. Undop pagha tanena, nimiri haibanep nena, “Etne sunsunumdi, awe nene salero tomnep?” aro haibalul. 17 Nimi maiknori Allah Yubu ambarelamsiang nena, “Kal ma'al tatneheng,” aro ambatto tol tongolamsiang. Aghana nuri yubu ambatto tol tongolamsiap nena, undo unulamap kom. Nuri Allah Yubu ambarelamsiap nena, nuri wanaag agha porog uro yubu lelamapti, nu Kristusap ma'aptangto uropti, Allah whingag lemnepne sunsunum uro Allahri nunag tatsiog yubu ambarelamsiap.