Korintus
Nimi Sembe
Paulusti Mome Toro Pibogha Phendepne
Paulusti Korintus nimi kipsiogha
1
1 Nangkabo, na Paulusti a'un as soro kalurop as Korintus wamlom nimiag mome toro palilamna. Allahri seneropne sunsunum uro Eldi wepto poghogne Kristus Yesus ponekori na Paulus wepneogti, “Nari yubu ambatto tongolamsululam,” aro pogneog. Allahri a'un poloro wimbahiog nimi sembe mome toro palilamna. Nungkae Timotiusapti a'un kiplamsinam. Apna a'un Akhaya so'oag tala-tala wamlomba, Allahri a'un, “Nari kelmabo me walingeog talulom,” aro wepsiog nimi wamlomne, nuri a'un nhin kiplamsinam. 2 Nuri a'un sembe Allahag molbarelamsinam nena, “Nuni Allah nuringeap Yesus Kristus nu Saelba Uhiropne ponekoapti wana a'unag yorolamsirikti, a'un wana aingnilamsurukang,” senelamnamdi molona molbarelamsinam.Paulusti Allah omekto kibogha
3 Nuri omeklamukap nena, Yesus Kristus nu saelbamsilne Ili Allah omeklamukap. Elna Nuni wamlari nu yareag senelamsil. Allah ponekona nimi wana mikip nembahinepne ni tarelamsilne poneko wamla. 4 Nu seklenne ni seklelamoboba, Allahri nu wana mikip nenelamsio. Nuri babe ora nimi seklenne ni seklelamik abeneko pere, wana mikip nembahiongeag agha wana mikip nembahinepne ora nimiag tipto ambarelamsukap. 5 Tam nene sembe Kristus seklenne seklelamogne nunag selelep aro pongoro yabalamlaba, seklelamap saog uro, Kristus pere agha nu wana mikip nembahiogne babe selelep aro pongolamla. 6 Nu seklenne seklerop nena, “A'un taulbahileba, wana mikip talamlulom,” aro nu seklerop. Nu wana mikip nenehirop nena, a'un babe wana mikip tanepne sembe nu wana mikip nenehirop. A'un wana mikip tamun andarina, nu seklelamap saog uro seklelapmun tanena, wana khapto wamlulom. 7 Nuri a'un sembe, “Uro yabilul,” aro tilamapti, wana sepsebek uro seneraglamap nena, “Nu seklelamap saog uro a'un babe seklelamlom ane sembe, nu wana mikip nenelamsil saog uro a'un babe wana mikip nembahilul,” aro seneraglamap.
8 Nangkabo, nu Asia so'oag wamobori, seklenne seklelamobonge sembe a'un ekon uro wamnep kom senelamapti ambatnuahin. Nu Asia so'oag wamoboba, ikinne nunag timbaoba, seklelamobonge ikin sirikti nu sa'obanep komdi, “Nu tebaukap,” senelamobo.
9 Nuri wanaag senelamobongena, “Nu kamag wamnep komdi tebaukap,” aro tam karebabo. Nundam nangag wana piptangkamnep kom aghana Allahri, “Ni undo uro yabilul,” sembaog andarina, ot El teptop nimi kamag nenehiropne ponekoag mo nuri wana palilamnep. 10-11 Nu ikin sirik wamobori, tebanep wamoboag agha taulbahio saog uro nen talulamsilul. Nundam nimi Allahag molbareldalamap saog uro a'undi babe nunap ma'aro Allahag molbarelamsululom. Molbarelamsumunne pere agha nuri Elag wana palilamapti, “Nen talulamsilul,” aro seneraglamap. Nimi maiknori nu sembe Allahag molona molbarelamsiangneag agha nu taulbahilul. Taulbahilul andarina nimi maiknori Allahag, “Wah Naniong, Paulus elkaboapag wana yorolamsilba taulbahilam,” aro kibukang.
Paulusti samenag, “Pinun,” sembaogne angaro yabiogha
12 Nuri ulamobonge, “Sikne agha ulamobo,” aro wana awi ulamsilne lag phoro ambatnuahin. Allahri seneropne nunag pipsiogpa, mog so'oag tala-tala wamang nimiap nhon wamobori, wana walingeag agha, “Tibinne mo ulamsebe,” aro ulamobo. A'unap nhon wamobonge babe wana walingeag agha ulamobo. A'unap nhon ulamobonge mog so'oag nimiri wana heksiropne agha ulamobo kom aghana, Allahri nimiag wana yororo senehiropne agha ulamobo. 13-14 Tibinne ulamobonge nenena, ni mome toro pibobonge a'un saeag wamlaba, mome kemelamlomdi, el uro wamlom. Wenena, nu sembe ni el uro wamlom kom aghana amik, “Ni el uro wamlulom,” senelamnari nang-nang aro ulamna. Ni el talulom aghana anamag, nu Saelba Uhiropne Yesus lag tale sumeneko, “A'undi nu sembe wana awi uro maiplamsimunba, nuri a'un babe wana awi uro maiplamsukap,” senelamap. Ane sembe, a'undi wene nu olog el talamlom saog uro amik ni el talulom.
15 Wene aro sik senelamnori samenag, “A'unag nen yahane,” senelamno andarina, ik phendep sum nari a'unag wana walingeag agha ambatsinep. 16 Samenag seneraglamnonge, a'undi na yepnemunne pere agha, “Makedonia so'oag pineri, a'unag nen samoro yaneba, a'undi na Yudea so'oag pognemunba, tipto pinun,” sembano. 17 Nari samenag, “Uanun,” senelamnonge nene, seneragna koma salik-malik uro, “Uanun,” aro tam karebao senelamlom te? Nari sop-sop, “Uanun,” aro tam karepto ulamnangena, mog so'oag nimiri salik-malik uro ulamangne saog uro tam karepto ulamna kom. Sinba sindi wanaag agha ik nhon, “Sik,” aro lemnepti, ik nhon, “Kom,” senep. Aghana nari sindi ulamang saog uro naba nari wanaag agha salik-malik uro, “Uanun to, kom to,” aro lero ulamna kom.
18 Allahna, nimiri Elag wana palilamnepne ponekori nu ililamsilba, nuri wanaag seneragna koma salik-malik uro “Sik to, kom to,” aro yubu mo lero a'un ambarelamsiap kom. 19 Nuri Allah Elme Yesus Kristus sembe a'unag yubu ambarelamsibo. Silasap, Timotiusapti a'unag ambarelamsibo yubu eneko salik-malik uro, “Sik to, kom to,” aro ambatsinep kom, aghana Allahri Elme sembe lero pibogne, “Ot sikne,” agha uro yabiog. 20 Allahri salag maikno lero pibogne ni Kristus ponekoag ot sikne agha uro yabiog. Ane sembe nuri El pere agha ot sikne agha, “Amin,” aro saekag lelamapti, Allah omeklamap. 21 Allah ponekona, nunap a'unap Kristusag mero sekitsiogne poneko wamla. Eldi nu wepsiogti, 22 “Naringe taukang,” aro kekneba nhon nunag pibog. Eldi nunag, “Amik uro yabilul,” seogne neneko, “Ot sikne agha lero pibogti, uro yabilul,” aro el nenelamsil nena, Eldi Yame Walinge nuri wanaag pibog.
23 Wene nu anam as Korintus yan koma wamapne sembe ambatnuahinne ot sikne agha lemnuan. Nari wanaag seneraglamnari, “Allahri a'unag ambatsiso,” senelamnangena, nari a'un as Korintus nimiag, “Wana mali nembahineag,” aro a'unag samoro yano kom. 24 Nurina, a'un Kristusag wana palirop nimi, “Arukna nenero saelbamsisebe,” senelamap kom. Aghana a'undi Kristusag wana paliropne pere agha sektop nimi taom. Ane sembe, nuri ulamap nena, “A'un wana awi uro wamlulom,” aro a'unap nhon awe nikne tolamap.