Korintus
Nimi Sembe
Paulusti Mome Toro Pibogha Phendepne
El nenerop yubu palilamap
Paulusti mome toro pibog yubu phendepne nenena, sin Akhaya so'oag as soro kalurop as Korintus wamek nimi sembe mome toro pibog. Mome toro pibog nena, Paulusap Korintus nimiap nimi pali wamekne tam olog wamogpa, Paulusti Korintus nimi sembe mome phendepne nene mome toro pibog. Paulusti mome toro pibog yubu ene kembi agha, Allah omekto winiptangtop nimi as Korintus wamek nimi nhon-nhondi samenag Paulus san tilipto yubu toraplamekpa, Korintus nimi sembe, “Nen ma'aptahabe,” aro Paulusti yubu ene mome toro pibog. Phendep yubu ene anam mome tomna komag Korintus nimi nhon-nhondi, “Paulusti yubu ka'elameberi, elap ma'aptaukap,” senelamekti ulamekne sembe Paulusti sinag, “Yeng maikno ulamnel,” aro ambatto mome toro pibog. Aghana as Korintus nimi niri Paulusti yubu saelbamek kom. As Korintus wamek nimi nhon-nhondi Paulus san tilipto yubu toraplamek nimirina, “Paulusna Yesusti wepto pogtopne senep to, kom to,” aro yubu torapto hailamek. Sindi el yubu toraplamekne sembe Paulusti eldamne pelebel dalamogti, tibin nenerop yubu mome toro pibog. Sin Paulus yubu toraplamek nimi taneko sembe, “Wepto pogsiognang nubunang,” aro si engero mome toro pibog aghana, sindam nimiri maiptangto ambarelamsiekne sembe, “Nubunang,” aro likipto mome toro wabahiog.
Paulus yubu toraplamek nimi anam wabahin komag, Paulusti elap ma'aptangtop nimi as Korintus wamek nimi sembe, “Nangkabo,” aro tibin nenero ambarelamsiog. Tibin nenero ambarelamsiog yubuna, tam palihinne wailag neneropneap, Allahri pesa urop nimi mikip nenehinneap, wanaag agha maiknoro tatsinepneap, apna Kristusti ulamogneag agha nimi ni wali uro kamag wamnepne sembe tibin nenero ambarelamsiogti, mome toro pibog.
Paulusti Korintus nimi sembe mome toro pibogha phendepne lomag wamlange
Paulusti Korintus nimi kipsiogti, Allahag molbarelamsiogha (1:1-11)
Paulusti, “Wana nhonog uro wamsebe,” aro ambarelamsiogha (1:12-7:16)
Mog so'o Yudea wamek nimi sembe yepto tatsinepne sembe (8:1-9:15)
Paulus eldamne peleptangtop yubu ambatsiogha (10:1-13:10)
Mome komobanebag kipsiogne (13:11-13)