Mome komobanebag wenehirop yubu
13
1 Yaneri a'unap ik wilindip sum nen haiptaukap. Haiptabeba samenag Allah yubuag mome toro pibog yubu sunsunum uro tanep. “Nimi phende wilindi wamnari, ‘Undo-undo imno,’ aro saekag yubu lerop tanena, sik sembanep.” 2-3 Ik phendep sum yahi sumeneko haiptaburi, a'un wenero yubu ambatsisi. Wene weag wamnari, anam yan komag nen sarikto wenelamsin. Na a'unag yaneri, sin samenag malia ulamong nimiap, malia urop nimi yogneap, “Lipsin koma ni wenero wabahinun,” aro ambarelamsin. A'undi seneraglamlom nena, “Kristus pesange wamla komdi, nunag mikip uro ulamsil,” aro seneraglamlom. A'undi nanag kemelamnelomdi, “Kristusti yubu sik uro nunag ambarelamsil to, kom to,” aro kekneba elamlom. Ane sembe, yaneri malia ulamlomne ekon tan koma mikip uro wembahinun. 4 Kristus ponekona sik uro nimi nong pesange saog uro kalag sipto obek aghana, Allahri mikipneag agha kamag nembaog. Ane saog uro nu Elap ma'aptangto wamapne toman pesa nimi neneptangto wamap aghana, Allahri mikipneag agha Elap nhon kamag nembahile andarina, nuri a'unag keknero ulamukap.5 A'undam nimi seneragheldalamsut! “Kristusag tapto wana palilamna to, kom to,” aro andamne seneragtalulam. A'undam nimi seneragtamunne toman agha a'undi, “Taptopne wamna,” seneptanep tanena, Yesus Kristus a'unap ma'aptangto ua ulamla. Tam nene el wamlom kom te? 6 Ot nari nang-nangaro tilamnangena, nu Kristusti taptop nimi wamapne, “El talulom,” aro nang-nangaro tilamna. 7 Aghana nu taptop kom nimi saog lag neneptahabea babe, a'undi walinge mo ulamsom senelamna. A'un sembe Allahag molbarelamsin nena, “Malinge nhon babe ulamukang kom,” aro a'un sembe molbarelamsin. Molbarelamsinne enena, “Nu taptop nimi saog lag tahabe,” aro molbarelamsin kom. 8 Nu taptop nimi lag tanep nena, sik uropne nuri torabanep kom aghana, “Sikne mo lag talul,” aro nuri ulamnep. 9 A'un mikip tanepne sembe nu pesa neneptahabe tanena, nu wana awi uahinep. A'un wana whi tanepne sembe Allahag molbarelamsiap. 10 Wene weag wamnari, a'un sembe mome toro palilamna yubu eneko ambarelamsin. Mome eneag ambarelamsin nena, nu Saelba Uhiropne ponekori mikipne nanag pimneogne toman agha a'unag ambarelahine sumeneko, “A'un wana sapsinep yubuag agha ambatsineag,” aro mome eneag agha anamag ambarelamsin. Mikipne nanag tatneog nena, a'un loba nembahinepne sembe nanag tatneog kom aghana, a'un mikip nembahinepne sembe nanag tatneog.
11 Nangkabo, komoptop nena, awi uro wamsut! A'undam nimi o'oldalamsut! Nari yubu wana mikip nembahinep yubu ka'elamsut! Seneragna nhonog uro seneraglamsut! Ma'aldalamsut! Undo unulapmun pagha tanena, Allah o'ona senelamsildi, ma'alamsilne ponekori a'un paia ulamsilul.
12 A'un mamun haibildalapmundi, “Allahri wepsirop kelmabo me ma'aptangto wamap,” aro somoro togtog aro kibildalamlulom.
Sin Allahri wepsirop kelmabo me niri a'un kiplamsiang.
13 Nari a'un sembe molbarelamsin nena, “Nu Saelba Uhiropne Yesus Kristus ponekori wana a'unag yorolamsilneap, Allahri o'ona senelamsilneap, Allah Eldamne Yame Walingeri sae tiptangto ma'alamsilneapti a'un yae paiamsukang,” aro molbarelamsin.
Abenda.