Paulusti haing uamna kwelekamna senenag agha ibogha
12
1 Olog yepsinep kom aghana maiptangto wamnepneog wamna. Nen tipto ambatnuahin nena, haing uamna kwelekamna senenag agha iropneap, nu Saelba Uhiropneri lag neneropneap sembe ambatnuahin. 2 Samenag na elne nhon Kristusap ma'aptangto wamogpa, nimi eneko tai siba kilbaogpa, imagnang ua urobag tenap wilindipneag waelbaog.a El nimi nong agha waelbaog to, nimi nongag agha lamba waelbaog to nana ekon. Ot Allah Elmori el wamla. Nimi eneko waelbaog sumag agha hengkun taibuka taubuka ulamogha mekpare taogpa, wene wamap. 3 Nimi eneko waelbaogne, el nong agha waelbaog to, nongag agha lamba waelbaog to nana ekon. Ot Allah Elmori el wamla. Aghana na el wamnangena, 4 nimi eneko wali sirikag Firdaus so'oag waelbaogti, yubu lilim ka'elamogne neneko nimiri yubu lilim leropneap sunsunum komdi, nimiag tipto ambatsinep kom. 5 Nimi enekoag uro yabiogne sembe wali maiplamnun. Aghana nadamne maiptangto lemnunne olog sunsunum komdi, ot na pesa tangtopne sembe maibildalamnun. 6 Nadamne maiptahanenge babe, sik uro yabiogne sembe lepsene, ane sembe nari yubu lemnepne babe limituk nimiri yubu senep kom. Aghana nadamne iriktangto ulamnangena, “Nimiri nanag kemelamneangneap, nari yubu ka'elamangneap phelekto koma sunsunum uro seneraglamnukang,” aro nadamne maiptanun kom.7 Imagneri nubu phelektopne lag nembaogpa, ipsinge nene sembe nadamne nubu sirik neneptahane sembanep. Aghana lag nembaogne ipsinge nene sembe, na nongag alog nhon omneloa saogne, “Eldamne phelekto nubu neneptaleag,” aro pimneog. Nanag pimneog nena, phia sikini nubunge Satanas nenekori poghogne saog wamlaba seklelamna. 8 Seklelamnari nu Saelba Uhiropne ponekoag ik wilindi wanaag agha mololamsiri, “Seklelamnange nene kom nembalulam,” aro molbahi. 9 Mololamsiba nanag samoro ambarelamneogti, “Nimi pesa uropneag Nari mikipne lag tangto sunsunuptanep. Ane sembe Nari wana anag yorolangkenne sunuropne wamla,” aro ambatneog. Wene seog ane sembe, na pesa tangtopne sembe wana awi uro maibildalamnun andarina, Kristusti mikipne nanag kalulilamnelul. 10 Nene agha na Kristusap ma'aptangto wamnari, pesa wamnangeap, san tiliplamneangneap, na luknuro ulamneangneap, seklelamnangeap ua ulamna tanena, na wana awi uro wamnun. Na awi uro wamnun nena, na pesa wamnengeag mikip nembanelul.
Paulusti Korintus nimi o'ona senelamsiogha sembe
11 A'undi na eraruk nembaneomne toman agha limituk nimiri saog yubu lemna. Na nubunge kom aghana, “Sin wepto pogsieknang nubu phelektopnang,” aro kiplamsilom nimi tanekona, na phelekto sin nubu nimi taong kom. Ane sembe, a'undi na Kristusti wepto pogneogne agha kipnenep. 12 Nari wana ma ulamogpa, Kristusti wepto pogsirop nimiri ulamnep kekneba a'un whingag ulamsi. Nimiri uanep komne ulamsiba nimiri, “Yaghe! Allah mikipne el Paulus pere agha ulamla,” senenne kekneba ulamsi. 13 Nari a'un whingag kekneba nubunge ulamsi aghana a'undi, “Ot Kristusag wana paliro winiptangtop nimi ora so'oag wamang nimi paliag nenero ulamsiogti, nu umag nenero ulamsiogne sunsunum kom,” senelamnelom te? Ot nhon sunsunum komne a'unag ulamsingena, a'unag molbahin koma a'undi sa'oag ikinne pipsi kom. A'undina, “Nunag ikinne pimna koma sik komne ulamsiog,” senelamnelom te? Yaghe nangkabo-e, malinge ulamsinge nene wailag nembahom.
14 Wene na a'unag ik wilindipne, “Samoro yanun,” aro welamnange el uro wamsut. Yaneri a'unag moloro ikinne pimnun kom. Yanun nena, “A'undinge topsisene,” senelamna kom aghana, a'unap nimi pali wamsebe senelamna. Nari senelamnangena, olog mabori sindi nong nimi mo'obahineba ero pololamnep kom aghana, nong nimiri sikin mabo mo'obahineba poloro tolamnepneog wamla. 15 Ane sembe nari saeag wamlange ni a'un kamag wamnepne sembe wana awi uro tatsineri, nadamne babe awi uro tatsinun. Nari a'un o'ona senelamsinne nubu talamle tanena, a'undi na o'ona senelamnelomne so'oag tanep te?
16 Undo senelamlom aghana, nari a'unag moloro ikinne pipsisi kom. Aghana a'undina, “Haing kunuhiro hektop mane agha pan khelamsil,” senelamnelom te? 17 Nari a'unag poglamsisi nimi tanekori a'undinge aba tobekti, na tup nembaneek te? 18 Titus olnoro, “Pululam,” aro poglamsiri, nunkae nhonap sin abeneko pogsisi. Aghana Titus ponekori a'undinge toro eldamne tup neneptaog kom. Sin abenekori a'undinge haoghaba tomna koma ulamdek ina toman nuri babe, “A'undinge topsebe,” aro ulamubu kom.
19 Wene mome ene maikno kemelamlomne toman agha a'undi nu sembe, “Sindam nimi mo nunag peleptangto ulamang,” senelamsilom te? A'unag kom aghana, Kristusap ma'aptangto ulamapne toman Allah whingag sik uro yubu lelamap. Nangkabo, a'un nuri o'ona senehirop nimi wamlom. Nia mangkina ulamapne, “A'un mikip nembahukap,” aro ulamap. 20 Ot a'unag, “Mikip nembahukap,” aro yanunne enekona, “A'undi na sembe yeng senelamnepne sunsunum uro wamnep kom,” aro log senelamna. Apna nari a'un sembe yeng senelamnange sunsunum uro imnun to, kom to aro log senelamna. A'undam nimi nusamag imneag senelamnangena, waptangtopne to, naringe taho seneropne to, wana yo senenne to, paliag tahane seneropne to, san tilipsiropne to, yubu malinge phoana yubu poropne to, maiptangtopne to, salik-malik uropne to ipsineag aro wanaag log senelamna. 21 Na a'unag nen yane sumeneko Nani Allahri na a'un whingag ali nembaneleag senelamna. Na a'unag yane sumeneko kemelamsineba, a'undi samenag wana bobonge agto yaboho senenneag agha salik-malik waleldalamlumdi, Allahri senerop komne sunsunum uro ulamlumne limna koma a'un nimi nhon-nhondi tipto maiknoro ulamikne, “Ipsineag,” aro log senelamna.