Paulusti Yubu Ambarelamsiogne Sembe Eldamne Peleptaogha
10
1 Wene Kristusti wana wali uro win-win aro ulamogne neleplamnari, na Paulusti a'unag wenero ambarelamsin. Nimiri na wamnange sembe, “Nu whingag wamorina, wanaag log senero ambarelamsio aghana, wene weag piori log kom tao,” aro lelamneangne poneko wamna. 2 Sin nimi tanekori nunag miplamsiangdi, “Mog so'oag nimiri ul piropne sunsunum uro ul palamang,” aro seneragto lelamang. Na a'unag yane sumeneko, “Sin nimi tanekoag log kom uro peleptangto wabahinun,” aro seneraglamna. Aghana a'unag babe wabahineagti, “Sindi seneragnange nelebahiseng kom,” aro mololamsin. 3 Wene mog so'oag nong wamapti ul palamap aghana, nuri aisanangap mal talamap nena, mog so'oag nimiri mal talamang saog uro ulamap kom. 4 Nuri mal tarobana, mog so'oag nimiri mal taroba agha mal talamap kom. Aghana nunag aisa nenehirop nimiri irikto leka solingkirop saog seneragnange Allahringe mikipne pere agha lelekto kwereklamap. 5 Allah sembe el nembahinep yubu nikniro solingkilamangne babe ni lelekto kwereklamap. Mog so'oag nimiri seneragnange ni lelekto kwereklamap nena, “Kristus umag mo seneragto yabilul,” aro nimiri seneragnange luknuro iriklamap. 6 A'undi ni wali uro Kristus umag seneragto ul palapmun tanena, “Nu yaberi, sin ka'elamang kom nimiri ulamangne luknuro wabahukap,” aro wero wamap.7 A'undi kemelamlom nena, ot haingdi imnepne agha kemelamlom. Nimi etneri eldamne sembe, “Kristustinge wamna,” seneptangtop tanena, nimi enekori nu wamapne babe seneraglamsile. Nimi eneko Kristustinge wamla saog uro nu babe Eldinge wamap. 8 Wene aro yubu lemnange enena, nu Saelba Uhiropne ponekori nunag mikipne pipsiogpa, wana yengag agha olog phelekto yubu lepsenenge babe ali sembahane kom. Mikipne nunag pipsiog nena, a'un loba nembahinepne sembe nunag tatsiog kom aghana, a'un mikip nembahinepne sembe nunag tatsiog. 9 Ane sembe nari a'unag mome toro palilamnonge anekona, “ ‘A'un log nembahinun,’ arop yubu saogne agha mome toro palilamo,” sembaheng kom. 10 Nari a'unag ambatsirop yubu sembe sin orangeri lelamangdi, “Mome toro palilamongena, ikinne mikip uro mome toro palilamo aghana, nu whingag yubu lelamongena pesange teba'enne yubu ambarelamsil,” alamang. 11 Teba'en semba unerop nimi tanekori seneragto el tanep nena, nu a'unap a'eptangto wamobori, mikip uro mome toro palilamobo saog uro, a'un whingag yaberi, sunsunum uro ulamukap.
12 Nimi nhon-nhon sindam nimi log kom uro sekelildalamang saog uro nunna sekelildalamap kom. Nuri sin nimi tanekoag sunuro, “Nika-nika saog wamap to, paliag wamap to,” aro sunuldalamap kom. Aghana sindam nimi kembi agha, “Nhon wali, nhon mali,” aro sunuldalamangne neneko wali uro seneragto ulamang kom. 13 Ot nunna, sunsunum uropne phelekanep komdi, nundam nimi maiptanep kom. Aghana Allahri nimi sunuro mipsinepne ponekori nunag sunuro tatsinepne sunsunum uro nundam nimi sembe yubu lelamukap. Nunag sunuro pipsiog awe nenekona, sabo talamogha a'unag babe sabo taog. 14 A'unag babe yahabe kom tanena, nundam nimi sembe, “Allahringe awe tolamap,” aro a'unag yubu ambatsinep kom. Aghana a'unag babe Kristus ponekori yubu walinge ambarelamsibu ane sembe, nundam nimi sembe yubu lemnepne phelekto lelamap kom. 15 Ora nimiri awe tolamangne toman nundam nimi sembe phelekto maibildalamnep kom. Nuri, “Uro yaboho,” senelamap nena a'undi Kristusag wana palilamlomne nubu tangto yabalamleba, Allahri nunag awe tarelamsilne a'un ya'aghag sirilamlul. 16 Sirilamle andarina, yubu walinge a'undi so'oag agha nen sabo nenero ambarel phinep. Allahri nimi nhonag awe tarogpa, tobogne toman ora nimiri eldamne sembe maibildalamnep kom.