Kristusag wana paliro Yudea so'oag wamek nimi yepsinepne sembe
9
1-2 Wene Allahri wepsirop kelmabo me yepsiropne sembe a'un wana yeng uro, “Yepsisebe,” senelamlomne na el wamna. A'un Akhaya so'oag wamlom nimiri hengkun samenneag babe, “Tatsisebe,” alamomne nari Makedonia so'oag nimiag tipto, “Wero wamang,” aro a'un omekto ambarelamsin. A'undi wana yeng uro, “Tatsisebe,” seomne ka'ebaongdi, Makedonia nimiri babe nelepto, “Tatsisebe,” aro ulamang. Ane sembe mome enena, a'un ekon tan koma wamlom sembamnari, mome ene toro palilamna. 3 Ot nungkabo a'unag poghol alamsin nena, nari a'un omeklamsin yubu nene kamola yubu saog taleagti, a'undi samenag, “Tatsisebe,” alamomne sunsunum uro, “Wero wamlulom,” aro nungkabo a'unag poghol alamsin. 4 Sin anam pogsin komag Makedonia nimi nanap nhon a'unag yahabeba, a'un weamsom kom tanena, nari samenag a'un omektop yubu yangaropne lelamnonge sembe ali sembahane. A'un babe ali sembanep. 5 Ane sembe seneraglamnori, na anam yan komag nungkabo samenag a'unag, “Yanepneog wamla,” sembamnari sinag, “Pululom,” aro wenero ambatsin. Yaikpa a'undi samenag, “Tatsukap,” aro salag pibomne neneko nu anam yan komag wero o'olamukang. “Aboapne sembe mololamsiang,” sembamunagti wero ulapmunneag agha a'undi, “Wana walinge agha tarelamsiap,” aro tatsinep.6 Nari lelamnangena undo. So'oag wana togtoba ologha merop nimiri ologha yongoro anep. So'oag wana togtoba maikno merop nimiri maikno yongoro anep. 7 Wana awi uro tatsirop nimina Allahri o'ona senelamsil. Ane sembe a'un karong sapsabi tatsiseng kom. A'un nimi a'ero-a'ero, “Nene pogto tatsinun,” aro wanari opmundi, sunsunum uro sol mali semban koma tatsululom. 8 Allah mikipneri a'un yepsinep andarina, nia mangkina wana yororo senehiropne a'unag selelep aro pongkanep. Selelep aro pongkaleba, ni sum nia mangkina uro yabalamlenge, a'unag teko uahinepne ni a'un saeag taleba, a'undi walia ulamnepne ni maikno tangto ul palamlulom. 9 Tam nene sembe nimiri mome toro pibog nena,
“Saeag agha orog nimiag tatsinepne yamoro tarelamsil.
Eldi wana porogne ya'ag uro wamle paghabog wamlul,”
aro mome toro pibog.
10 Apna El aweag merop nimiri wana tognepneap nimiri kwaneng roti tenepneap tarelamsilne ponekori a'unag babe tatsilul. A'un tup nenero tarelamsilenge toman a'undi wana tognepne babe maubatsileri, a'undi wana porogneag agha ulapmunne babe nubu nembatsilul. 11 Nia ni uro yabinebag tup nembahile andarina, pa'asea ni a'unag wamleba, wana walingeag agha tatsululom. A'undi nu pere agha wana walingeag agha tarelamsinepne sembe ora nimiri Allahag wana yororo kiplamukang. 12 A'undi yepsiroba ul palamlomne enekona, Allahri wepsirop kelmabo meag teko ulamsilne tarelamsilom. Ot yeplamsilomne aghabog kom aghana, ul palamlomneag agha nimi maiknori Allahag wana yororo kiptopne babe siriro la'inilamla. 13 A'undi lag phoro, “Kristusti ambatsiog yubu walinge salelamap,” aro lelamlom. Lelamlomne nene sunsunum uro yeplamsilomne pere agha sik uro kekneldalamla. Ane sembe a'undi yeplamsilomne sembe babe, sin Yudea so'oag wamang nimiap nimi niap wana walingeag agha yepto tarelamsilomne sembe nimiri Allah si paliag nenelamukang. 14 Allahri wana yororo senelamsilne a'unag ua ulamsilba, ora nimiag siriro la'inilamla. Ora nimiag siriro la'imbanepne sembe, nimiri a'un sembe Allahag molbarelamsiikne abeneko pere a'un yeng sirik senelamsukang. 15 Allahri nunag tatsiog nena, nimiri yubuag mo lemnep komne tatsiog. Eldi nunag tatsiogne sembe nuri wana Elag yororo kiplamap.