“Kristusag wana palirop nimi as Yeusalem urop nimi yepsukap,” aro kal ma'al poloro winiropne sembe
16
1 Wene aro lemnaba, Allahri wepsiog kelmabo me yepsinepne sembe olog ambatnuahin. As Galatia nimiri Kristusag wana paliro winiptangtop nimiag nari sinag, “Undo-undo ulamlulom,” aro ambatsino saog uro a'undi babe ulamlulom alamna. 2 Anena, na anam yan komag a'un Minggu sum sop-sop winildalapmundi, a'un nimiri a'ero-a'ero sae agha wamlenge tatsinepne sunsunum uro kareplapmundi, poloro winilamlulom. Undo Minggu sum sop-sop unulamlulom andarina, na yane sumeneko nen poloro wimban koma yepto tatsinepne aneko weroba wamlul. 3 Weroba wamleba, a'undi as Yerusalem nimiag tatsinepne poa pinep nimi wepsilulom. A'undi sik senelapmun nimi wepsimunba, na amik yane sumeneko a'undi yepsinepne pabinep nimi tanekoag mome toro tatsineri pogsinun. 4 Na babe sinap nhon pinepne sunsunum aro tam karebahabe tanena, nanap nhon pihebe senelamna.Paulusti, “Undo pang-yang uanun,” seogne sembe
5 Na amik Makedonia so'oag pinun. Ane sembe Makedonia so'oag agha laploa lemneri, a'unag yanun. 6 A'unap nhon wameberi, ko'o we uro wamukap to, son li nhon babe ma'aro a'unap nhon wamukap to senelamna. A'unap nhon wameberi, a'undi olog yepnohomba, amik naba nari wanaag agha tam karebaneag sip nen tipto pinun senelamna. 7 Wene a'unag yanepne ot phihibom agha a'un kemelahisenenge na karong. Na a'unag yahane senelamnange, “Ko'o we uro a'unap nhon wamukap,” senelamna ane sembe, nu Saelba Uhiropne ponekori wali seleba yanun.
8-9 Wene na as Efesus wamnange, Allahri na sembe ina nubunge yarebatneoba, nimi maikno yubu amoro ambarelamsin aghana, nimi maiknori toraplamneang. Ane sembe tane wamneri, nubu sum Pentakosta sum taleba pinun.
10 Timotius a'unag yalulne ponekona, nari awe tolamna saog uro eldi babe nu Saelba Uhiropne sembe awe tolamla. Ane sembe a'unag yaleba, a'un sembe log sembahileag aro wali yae piptangkamlulom. 11 Nimi nhondi babe el sembe teba'en seneropne agha ulamseng kom. A'unag yaleba, wali uro kiplapmundi, wali nikag wamlulom. Nhon wapmundi, amik wanaag agha ma'aldalapmunne agha, “Wali pululam,” aro pogmunba, nanag samoro yalul. Elap nungkabo Kristusag wana palirop nimi yogneap nanag samoro yalamika nang-nang alamsin.
12 Apna nungkae Apolos poneko sembe, nari elag wenelamnori, “Nungkabo Korintus nimiag mome ene pabhinep nimiap nhon pululom,” aro maiknoro wenelamno. Maiknoro, “Pululam,” aro wenelamno aghana, “Erarukti wene pinun kom,” seo. Amik pa'asea sum elag taleba, a'unag yalul.
13 Haing whi uro wapmundi, Yesusag sikne aro seneraglamlomne wana khapto wamlulom. Mikip uro wapmundi, log senerop kom nengabo wamlulom. 14 Nia mangkina ulapmundi, a'un mamun o'ona seneldalapmundi ulamlulom.
Nimi kipsiro komoptop yubu
15-16 Nangkabo a'unag wenelamsinnena, nimi etneri, “Allahri wepsiog kelmabo me yepsinun,” aro ma'aptangto whin seklero tol tongorop tanena, undo unurop nimi nhinag kiplamsimundi sindi yubu ka'elamlulom. Sin Stefanusti ae lom nimiri undo whin seklero tol tongoropne sembe el uro wamlom. Akhaya so'oag wamek nimi yogne Kristusag anam seneragna komag, Stefanusti ae lom nimi tanekori Kristusag wana palilamekti, sik senerop nimi sam nimi taek.
17-18 Stefanus ponekoap, elkabo Fortunatusap, Akhaikusap nanag yaongne sembe wana awi uaneo. A'un nanap nhon wamnep kom aghana, a'undi pogsiom nimi nanag yaongdi, nari wana keyagman nenero awi nenelamneong. A'undi wana babe keyagman nenero awi nenelamsiong. Sindi undo ulamangne wali kemero kiplamsululom.
19 Sin Kristusag wana paliro winildalamang nimi Asia so'oag wamang nimiri a'un kiplamsiang. Akwila elkel Priskaap, sindi ae lomag winildalamang nimiapti a'un sembe, “Nu Saelba Uhiropne ponekoap ma'aldalamap,” aro wanaag agha a'un kiplamsiang. 20 Nungkabo Kristusag wana palirop nimi ni tane wamang nimiri a'un kiplamsiang.
A'un mamun haibildalapmundi, “Allahri wepsirop kelmabo me ma'aptangto wamap,” aro somoro togtog aro kibildalamlulom.
21 Na Paulusti a'un kiplamsin. Yubu abene palilognangena, na Paulusti kipsiropne abene mo saeri toro palilamna.
22 Nimi etneri nu Saelba Uhiropne poneko o'ona sembale kom tanena, ya'ag seklero wamle paghabog wamlul alamna.
Naio, nu Saelbamsilamne yalulam!
23 “Nu Saelba Uhiropne Yesus ponekori wana a'unag yorolamsileri, yepto paiamsilul,” aro a'un sembe molbarelamsin.
24 A'un Kristus Yesusap ma'aptangtop nimi ni wamlomne nari o'ona senelamsin.
Abenda.