Timotius
Sembe
Paulusti Mome Toro Pibogha Phendepne
El nenerop yubu palilamap
Paulusti Timotius sembe phendep mome toro pibog yubu ene wenehirop yubu maikno mome toro pibog. Samenag Paulusti Timotius as Efesusa sekirog nena, Paulusti yubu toraptop nimiri as Efesus wamek nimiag sengkwanektop yubu ambarelamsiekpa, “Timotiusti Yesusag wana palirop nimi ambarelamsileri yae paiamsilul,” aro Paulusti Timotius sekirog. Timotius as Efesus wamogti, yubu ambarelamsiogpa, yubu toraplamekpa, ekauk wamog. Ekauk wamogpa, Paulusti nen samoro as Efesus yaog aghana, eldi yubu toraptop nimi nhon Aleksander nenekori Paulus pan khebaogpa (4:14), mog so'o saelba uhirop nimi tanekori Paulus saelbaekti, haing sae kaupto kop aeag tobongkibek. Kop aeag tobongkibek ae aneko as Efesus wamogpa, so'o aneko Roma nimiri saelbamsiek ane sembe, “Roma nimi sembe yubu lenne ponekori tam karebalul,” aro Paulus as Roma poa piek. Paulus as Roma kop aeag wamogti, “Ya'ag opnukangtiog,” sembaogti Timotiusag yubu ene mome toro pibogti, “Elem uro yalulam,” aro molbaog.
Paulus weag kop aeag wamogpa, Efesus nimi tanekori eldi yubu toraplamekti, sengkwanektop yubu ambarelamsiekpa, Timotius ponekori wanaag, “Huanundi sololamna,” aro wana ikin wamog. Wana ikin wamogpa, Paulusti yubu eneag, “An ya'ag opkeika babe, sol wali wali uro sik yubu mo tipto ambarelamsululam,” aro wenero mome toro pibog. Mome eneag Paulusti Timotius el nenelamog nena, Yesus anam samoro yan komag orolena yubu ambatsirop nimiap, pan khebahirop nimiap, haing kunuhirop nimiap maikno talamikti, “Kristusag wana palirop nimi seklebaik,” aro malia ulamsukang. “Malia ulamsiikpa, sik yubu sae limna koma wana khaplapmundi, Kristusag wana palilamlulom,” aro Timotius el nenero ambarelamog.
Paulusti Timotius el nenero ambarelamsiogti, “An me olog wamlumag agha Allah yubu mome toro piropne eltalum. Allah yubu mome toro pairop mome eneri nu yeplamsileri, mikip nenelamsilul. Nimiri, ‘Ka'ebaukap,’ sembaika babe, ‘Karong,’ sembaika babe andi, ‘Allah yubu amoro ambarelamsinun,’ aro wea ulapmendi, lag phoro ambatto wenelamsululam,” aro Timotius wenelamogti, mome toro pibog.
Paulusti Timotius sembe mome toro pibogha phendepne lomag wamlange
Paulusti Timotius kibog yubu (1:1-2)
Paulusti Timotiusag, “Wana mikip tamendi ulamlulam,” aro wenerop yubu (1:3-2:26)
Paulusti Timotiusag, “Seklelapmenag babe sol wali uro awe tolamlulam,” aro wenerop yubu (3:1-4:5)
Paulus eldamne wamogne sembe (4:6-18)
Paulusti mome komobanebag kipsiropne (4:19-22)