Timotius
Sembe
Paulusti Mome Toro Pibogha Selekne
El nenerop yubu palilamap
Timotius ponekona, ili Yunaningeri Yahudi kel tobogpa, elme Timotius mangkaog. Timotius as Listra wamogti, Allahag wana palilamogpa, Paulus as Listra yaogti haiptarek. Haiptarekpa, nimi maiknori Timotius sembe, “Wana wali,” aro maiplamekpa, ka'ebaogti Paulusti, “Elap nhon yubu ambatto tongolameberi yeplamnelul,” aro awe nikne toro tongolamek (Pogsiognangdi Ulameka momeag 16:1-3 kembanep).
Paulusti Timotius, “As Efesus nimi yubu ambatto yae paiamsilul,” aro sekirogti, “Yubu wenero ambatneri, wana mikip nembanun,” aro yubu ene Timotius sembe mome toro pibog. Timotius as Efesus wamogpa, Efesus nimi Kristusag wana paliro winiptangtop nimi nhon-nhondi sengkwanektop yubu ka'elamek. Sengkwanektop yubu ambarelamsiek nimi tanekori Yunani nimiri seneraglamekne kilbi agha, Yahudi nimiri ul piropneap kaupto ma'alamekti, sengkwanektop yubu ambarelamsiek. Sengkwanektop yubu ambarelamsiek nena, “Nengabori kelabo tomnep komdi, teroba neneap neneap tenep kom. Ot tognoptangtop yubu el tahaberi wali neneptanep,” aro ambarelamsiek. Sengkwanektop yubu ene sembe, “Yae togtangto wapmendi, sik yubu ene agha ambarelamsululam,” aro Paulusti Timotius wenero mome toro pibog. Timotius sembe mome toro pibog yubu enena, “Timotiusti Efesus nimiag tipto ambatsilul,” aro Paulusti mome toro pibog.
Yubu eneag Kristusag wana paliro winiptangto ulamnepne sembe ambatsiog. Apna Kristusag seneragtop nimi yae paia uhirop nimiap, yepto tongohirop nimiap sekitsinep nimi sembe babe, sin nimi tanekori ulamnepne sembe babe Paulusti yubu kiki telekto ambatsiog. Komoptobagna, Paulusti Timotius el nenelamogti, “Yesus Kristusti arukna wamlamdi, Elag wana palirop nimi andi yepsinepneog wamlam,” aro el nenero ambatsiogti wembahiog.
Paulusti Timotius sembe mome toro pibogha selekne lomag wamlange
Paulusti Timotius kibog yubu (1:1-2)
Kristusag wana palirop nimiri winiptangto ulamnepne sembe (1:3-3:16)
Timotiusti awe toro ulamnepne sembe Paulusti wembahiogha (4:1-6:21)