Yesusag wana palirop nimi saelba uhiropnang as Yerusalem wamek nimi whingag Paulusti ambarel phiogha
2
1 Hengkun mek pare phibaogpa, as Yerusalem nen samoro Barnabasap nhon walelamnumuri, Titus babe enero poa pibu. 2 Na as Yerusalem pihingena, Allahri nanag, “An Yerusalem pululam,” aro ambatneogne sunsunum uro pihi. Na as Yerusalem pihiri, Yesusag wana palirop nimi saelba uhirop nangap nu mo haiptaburi, nari Yubu Walinge Yesus sembe Yahudi kom nimiag ambarelamsisinge sembe tibin nenero sin ambatsisi. Nari seneraglamsingena, nari samenag agha nimi ambatto poa tongolamsinne sembe sin saelba uhiropnangag yubu kiki telekto ambatsisene kom tanena, nari yubu aori ka'eban koma sin ekonne agha nari ambatsirop yubu nene loba seheng. Loba sehengba, ora nimiri sikne kom senelamsengag aro sin saelba uhiropnang as Yerusalem wameknang tibin nenero ambatsisi. 3 Sin Yahudi nimi agha Yesusag wana palirop nimi as Yerusalem wamek nimiag ambarel phisi aghana, Titus nanap nhon palamnumunge poneko Yahudi sisa kom nimi Yunaninge wamla. El babe nanap nhon sin whingag pinumu aghana, sin Yahudi nimi agha Yesusag wana palirop nimi saelba uhiropnangdi el Titus Yunaninge sembe, “Nu Yahudi nimiri kere kon karebi agha kon tepna ul palamapne sunsunum uro Titus babe nengabo kon karepto teptalul,” aro nu wembahiek kom. 4 Nu Kristusap ma'aldalamapba, Musari aruksirop yubu enekori nu arukna nembahinep kom ane sembe, sin saelba uhiropnangdi, “Kon tepto karebalulam,” aro wembahiek kom. “Kon tepto karebalulam,” aro wembahiek kom aghana, Yahudi nimi agha nimi etpareri, “Yesusag seneragtop nimiri ulamangne keme-keme wa'aukap,” aro nu Yesusag seneragtop nimi saog tangka sin nun anabiag yogholingkiek. Nu anabiag yogholingkiek nimiri senelameknena, “Nu Yahudi nimiri, ‘Undo-undo unulamlulam,’ aro aruksirop yubu kas mi agha saelba ulamap saog uro sin Yesusag seneragtop nimiri babe aruktop yubu nene saelba ul palamukang,” aro yogholingkiek. 5 Sin Yahudi nimi agha yogholingkiek nimiri, “Aruktop yubu ene saelba ul palamlulom,” alamek. Wene alamek aghana nurina a'un sembe tiro, “Yubu sikne yubu walinge Yesus sembe nene aghabog nimi whingag ya'ag wamlul,” aro sindi, “Ulamlulom,” alamekne ologha babe saekag komdi, yubu mikip uro kom sebu.6 Wene seekpa kom sebu aghana, sin Yesusag wana palirop nimi saelba uhiropnang as Yerusalem wameknang tanekori nunag tam pipsiek kom. Sin as Yerusalem saelba uhiropnang taneko sembe nimiri, “Nubu siriknang,” senelamang. “Nubu siriknang,” senelamang aghana nana, “Allahri nimi whing ilihirop kom,” aro nari babe sin sembe log sembamsisi kom. Sin as Yerusalem wameknang taneko, nimiri sin sembe, “Nubu siriknang,” senehiropnang tanekori nari yubu ka'elamekneag agha wenero, “Yubu nene ma'aro ambarelamsimen taneogna wali,” aro nen o'obaneek kom. 7 Sindi nari yubu ambarelamsisinge se'el neneptan koma saekag lelamekti, “Nuni Allahri, ‘Petrusti yubu walinge Yesus sembe Yahudi nimiag ambarelamsilul,’ aro Petrus saeag awe pibo. Ane saog uro, Nuni Allahri, ‘Paulusti Yahudi sisa kom nimiag Yesus sembe ambarelamsilul,’ aro Paulus saeag awe pibo,” aro seneraghekti el taek. 8 Samenag Nuni Allahri Petrus wepto elag mikipne palilamogti, “Sin kon teptop nang Yahudi nimiag Yesus sembe ambatsilul,” aro poghog. Ane saog uro, Allahri na babe wepto, “Yahudi sisa kom nimiag ambatsilul,” aro mikipne nanag pibogti pogneog. 9 Sin Yesusag seneragto winiltalamang nimi as Yerusalem wamang nimi sembe sikiniyabo Yakobusap, Petrusap, Yohanesapti babe ka'elamekneag agha, “Sik, Nuni Allahri Paulusag wana yororo awe tarogpa, Paulusti Yahudi sisa kom nimiag Yesus sembe ambatto tongolamsilul,” aro el taek. El taekti, nanap Barnabasap nu abenekoag ambarelamsiekti, “Wali, a'un Yahudi sisa kom nimiag ambatto tongolamsurumunba, nu tane wamap nimiri Yahudi nimiag ambarelamsukap,” seburi saekag pibuburi, sae tattabu. 10 Sindi nunag moloro yubu ot nhonog pibeknena, “Sae agha orog nimi sembe ekon tan koma kemelamsururom,” aro yubu ambatsiek. Sindi molbahiekne nenena, nadamne wana yeng sirikneag agha kemero yeplamsin.
Paulusti Petrusag, “Ualamne nene unuaheng kom,” aro wenero ambarogha
11-12 As Yerusalema as Antiokhia samoro yahiba, amik sum Petrus babe Antiokhia yaog. Petrus el samenag Antiokhia yaogti, wali nunkabo Yahudi sisa kom nimiap nikag puka kwaneng telamog. Wali nikag kwaneng telamog aghana, Yakobusti Yahudi nimi etpare pogsiogpa, as Antiokhia Petrus wamoghag aneko yaek abeneko pere Petrusti, “Yahudi nimi nengabo kon teptop nimi anekori Yahudi sisa kom nimiap nikag kwaneng telamang kom,” aro log sembaog. Petrustina, “Mali sembaneikagti, nanap Yahudi sisa kom nimiap nen nikag kwaneng tukap kom,” aro Yahudi sisa kom nimi wail ibare agha koloptaog. Petrusti Yahudi sisa kom nimi undo unulamsiogne nene uahiso kom ane sembe, el whingag wenero ambatsi. 13 Petrus logti, “Sin Yahudi nimi whingag unuaneba, imneikti wali sembanukang,” aro ulamogne pere agha, Yahudi nimi yogneap, Barnabasapti babe, Petrus nelepto Yahudi sisa kom nimiap nikag kwaneng teek kom.
14 Sindi undo unulameka ipsisiri, nari seneraglamsiri, “Nuri yubu walinge Yesusti nimi talulamsilne sembe sik uro yubu ambarelamsiap tanena, sindi Yahudi nimiri aruksirop yubu paliag nenelamsiangne nene sunsunum kom,” sembahi. Sunsunum kom sembahiri, nimi ni wameka haingag agha Petrusag lag phoro, “Mali ulamlam,” aro ambatsi. Nari Petrusag ambarelamsiri, “Nangkae an Yahudinge wamlam aghana, Yahudi nimiri teheng kom alamangne andi babe nousap, ‘Hae, kwaneng tukap,’ aro telamom. Undop pagha wenena, andi Yahudi sisa kom nimiap nikag telamlam kom. Wene ulamlamnena, ‘Yahudi nimiri saelba ul palamangnena, a'un Yahudi sisa kom nimiri babe nelepto saelba ul palamlulom,’ aro wenero ambatsiloa saog ulamlam. Undo unulamlamnena, sikne agha ulamlam te?” aro ambatsi.
“Yahudi nimi babe, Yahudi kom nimi babe, ot Yesusag seneraglamik taneogna Yesusti taulbahilul,” aro ambatsiogha
15 Nu Yahudi nimi agha mangaro mangkahiek nimi wamapnena, nundam nimi sembe, “Yahudi sisa kom nimi ora mog so'oag malia urop nimi saog uro wamap kom,” seneldalamap. 16 Nundam nimi sembe, “Malia urop kom nimi,” aro Musari aruksirop yubu salero ul palamap. Aghana, nu el wamapnena, malia ulamap tanena Allahri nu sembe, “Wana porog nimi,” sembahilul kom. Nu Yahudi nimi el wamapnena, ot Allahri wepto poghogne Kristus Yesus ponekoag “Sikne” aro wana palilamebe taneogna, malia uropne tam orog nembaleri, Allahri Yesusag seneragtop nimi nene, “Wana porog nimi,” sembalul aro el wamap. Nimi nhondi babe Musari aruksirop yubu salero ul palamlengeag agha Allah whingag wana porog nimi sikne neneptanep kom. Ane sembe nu Yahudi nimi agha mangkahiek nimiri babe Allahri wepto poghogne Yesus Kristus ponekoag wana paia seneraglamap andarina, Kristus eldamneri Allah whingag nu wana porog nimi nembahilul.
17 Abene sembe nuri, “Allah whingag wana porog nimi sikne nembenelul,” aro el Kristusap ma'aldalamap. Elap ma'aldalamapne pere agha, nu Yahudi nimiri nundam nimi sembe, “Nu babe malia urop nimi,” aro el wamap. Undop pagha tanena, wela sembaukap? “Allahri wepto poghogne Kristus ponekori, ‘Nimiri nen ma'aro mali-malia ulamukang,’ aro yeplamsil,” sukap te? Nangkabo, undo lemnep kom!
18 Nu Yahudi nimiri el wamapnena, Musari aruksirop yubu salero ul piropneag agha Allah whingag wana porog nimi sikne neneptanep kom. Sikne neneptanep komdi, aruksirop yubu nene lilobi agha ot Yesusag wana palilamapne agha salero ul palamobo. Aghana wenena, aruksirop yubu libubu yubu eneko nen salero ul palamsebe tanena, “Irikna phiban,” aro el tananne lag tanep.
19-20 Tamna undo. Nari Kristusag wana palingkina seneraglamna abeneko pere nadamne Kristusap ma'aptangto elap nhon kalag sipto opneek saog uro wamna. Na teptop nimi saog wamnaba, aruksirop yubu neneag agha nen, “Malia uropne sembe tebalul,” aro nanag tam pimnep kom. Ane sembe nari seneraglamnange, “Ot Allahri wana yeng neneropne agha salero ul palamnun,” aro kamag wamna. Wene na Kristus ponekoap ma'aptangto kamag wamnange, na mori ul palamna kom aghana Kristus ponekori na pere agha ul palamla. Allah Elme ponekori na o'ona sembamnelne agha eldamne na sembe lunuro tebaog. Wene nimi nong mog so'oag wamnange, Allah Elme ponekoag wana paliro seneraglamnange pere agha ul palamnari, ul palamnun.
21 Allahri wana nunag yorolamsilneag agha Elme, “Mog so'oag nimi sembe lunuro tebalul,” aro nu sembe poghatsiog. Ane sembe, Allahri wana yororo mo tatsiogne neneko abolag nembanun kom. Nu mog so'oag nimiri Musari aruksirop yubu saelba ul piropne pere agha wana porog nimi sikne neneptanep tanena, Kristus poneko tebaho komag agha wana porog nimi sikne neneptahabe. Aghana nundam nimiri Musari aruksirop yubu saelba ul piropne pere agha nimi sikne neneptanep kom ane sembe, Allahri Elme tatsiogne neneko abolag nemban koma o'omne nenero ulamna.