3
1 Nangkabo a'un Galatia nimi limituk sirik nimi agha a'un wamlom. Nimi nhondi mili lebo andarina a'un wana tungmai tangom, te? Yesus Kristus poneko kalag siplobekpa tebaog yubu eneko tibin sirik uro a'unag ambatsisi. 2 A'unag ambatsisi agha wenena, a'undi nanag tam nhon nene sembe ambatnululom. Allah Yame Walinge tatsiognena, nelagha uro yabiogpa, Eldamne Yame a'unag tatsiog? A'undi Musari aruksirop yubu kas mi agha saelba ul palamlomne nene agha tatsiog to, Allah Yubu Walinge Yesusti mog so'oag nimi taulbahiropne sembe ka'ebalumdi, Elag wana palilamlomne sembe Allahri Eldamne Yame Walinge a'unag tatsiog to? 3 A'un sik uro limituk nimi wamlom! Allahri Eldamne Yame Walinge samenag tatsiog mikipneag agha a'un wali uro alniro ul palamlum. Ot wene Eldamne Yame Walinge lilobiagha a'undi wanaag, “Allahri wana wali nembahaneri, nadamne nong mikipneag agha wali uro komobahane,” senelamlomne nene sik te? 4 A'un nusamag uro yabiogpa, haingdi iplumne salik malikne agha uro yabiogpa, mo iplum te? A'undi iplumne nenena, wanaag seneragna koma mo iplum kom sembamna! 5 Allahri Eldamne Yame Walinge a'unag tatsiogne ponekori a'un nusamag agha nimiri uanep komne a'undi kembiagha “Yaghe” senenne kekneba a'un whingag ulamog. Allah Yame Walinge tatsiognena, nelagha uro yabiogpa, Eldamne Yame a'unag tatsiog? A'undi Musari aruksirop yubu kas mi agha saelba ul palamlomne nene agha tatsiog to, Allah Yubu Walinge Yesusti mog so'oag nimi taulbahiropne sembe ka'ebalumdi, Elag wana palilamlomne sembe Allahri Eldamne Yame Walinge a'unag tatsiog to?6 A'undi Allah Yubu Walinge ka'ebalumdi, sikne aro seneraglamlomne saog uro Abraham ponekori samenag babe undo seneraglamog.
“Allahri lebogne sembe Abramdi, ‘Ot sik uro lepla,’ aro seneraglamogpa, Nuni Allahri ‘El wana porogne,’ aro Abramag wana piamog.”
7 Ane sembe a'un babe el uro wamlulomnena, nimi etneri Allahri salag lero pibog yubu “Sikne” aro seneraglamang tanena Allahrina, “Nimi taneko Abrahamdi nimi likto palirop nimi wamang,” senelamla. 8 Samenag agha Allahri el wamognena, “Yahudi sisa kom nimiri babe Nanag ‘Sikne’ aro seneraglamneik andarina, Nari sin Yahudi sisa kom nimi wana porog nimi sikne nembahinun,” aro el wamog. Anam uro yabin komag Abrahamag Yubu Walinge neneko Allahri ambarelamogti, “An pere agha nimi mog so'oag tala-tala wamik nimi ni sembe walingena tatsinun,” aro salag lero pibogpa, Allah Yubu Walinge neneko amik uro yabinepne sembe nimiri mome toro pibek. 9 Ane sembe sin Allahag sikne aro seneraglamang nimiap, Abraham Allahag sikne aro seneraglamogne ponekoap, Allahri sin nikag kembi agha, “Nari wana wali nemba unerop nimi,” aro walia ulamsil.
10 Allahri Elag “Sikne,” aro wana palirop nimi walia ulamsil aghana, sin nimiri, “Musari aruksirop yubu mome toro pibogne nene kas mi agha saelba ul palamneri, Allah whingag sikne neneptanun,” aro aruksirop yubu umag siliptangkamang tanena, nimi loba nenero yo'obahineba umag siliptangkamang. Nimi loba nenehiroba umag siliptangkamang alamnange nenena, Musari aruksirop yubu mome toro palilamogti, “Nimi etneri aruksirop yubu nene ni wali uro saelba ulpin kom pagha tanena, Allahri nimi eneko yo'oro loba nembahilul,” aro mome toro pibog. 11 Nimi nhondi babe Musari aruksirop yubu nene ni wali uro ul pinep kom ane sembe, nimi nhondi babe Allah whingag wana porogne neneptanep kom. Tam nene tibin wamla. Tam nene sembe Allah yubuag wamlangena,
“Ot nimiri Allahag sikne aro wana palirop taneogna,
Allahri nimi eneko sembe, ‘Wana porogne,’ sembaleba, kamag wamlul,”
aro Allah yubuag mome toro pibog. Ane sembe nimi nhondi babe Musari aruksirop yubu saelba ul piropne pere agha Allah whingag sikne neneptanep komne ane tibin wamla. 12 Undop aghana, nimiri Musari aruksirop yubu saelba ul pirop tanena, Allahag wana paliropne kemban koma nimiri ua uropne mo kemero tam karebanepneog wamla. Allahag wana paliropne kemerop kom aghana, Musari aruksirop yubu mome toro pibogne wamlangena, “Nari aruksirop yubu nene nimi etneri ni saelba ul palamla tanena, ul piropne neneag agha kamag wamlul,” aro mome toro pibog. 13 Musari aruksirop yubu undo wamogpa, nimi nhondi babe ni wali uro saelba ul pinep kom ane sembe, Allahri nimi yo'oro loba nembahinep. Aghana Allahri weptopne, “Taluro saelbamsululam,” aro Kristus poneko mog so'oag poghogpa yaog. Nu mog so'oag nimi yo'oro loba nembahineba neneko Kristus ponekori toro eldamne nongag piptangkamogne abeneko pere nu taulbahiog. Eldamne nongag piptangkamogne neneko sembe, anamag Allah yubu samen mome toro pibogne nhon wamlangena,
“Nimi kalag sipto teptop nimina, yo'ohirop nimi wamang,”
aro Musari mome toro pibog. Abene agha Kristus poneko kalag sipto tebaogti, nu yo'oro loba nembahineba eldamne nongag piptangkamogne abeneko pere nu taulbahiog. 14 Yesus Kristus poneko kalag sipto tebaogti, nu taulbahiognena, Kristus ponekori, “Allahri Abrahamag, ‘Walinge tatsunun,’ aro salag lebogne neneko Na Yesus Kristusap ma'aptangtopne pere agha Yahudi sisa kom nimiag babe Allahri tatsilul,” aro taulbahiog. Yesusti nu taulbahiog andarina, Elag “sikne” aro wana palilamebenge pere agha Allahri, “Tatsunun,” aro salag lebogne neneko sunsunum uro Eldamne Yame Walinge tatsileba, nunag tahilul.
“Musari aruksirop yubu saelbaukap to, Allahri Salag lero pibog yubu saelbaukap to,” aro Paulusti hairo ambatsiogha
15 Nangkabo, nari sunumna nu mog so'oag nimiri sop-sop ua uropne agha sunumna nhon sumbanuahin. Nimiap-nimiap salag leptangkamnari, yubu nikne lero haing sae kauptangkamna tanena, “Sikne agha lemnam,” aro nimi pali neneptangtop. Nimi pali neneptangto salag lero piptangkamna tanena, nimi nhondi babe sin salag lero haing sae kauptangkamnange sae lopsinep kom. Apna nimi nhondi, “Ma'anne nhon ma'abanundi,” aro ma'anne nhon ma'abanep kom. Nu mog so'oag nimiri undo salag lero piptangkamna saog uro, 16 Allahri Abrahamag sarikto salag lero palilamogne neneko, Abrahamap elag agha nimi likto pinepneap sembe salag lero pibogpa, kom tanep kom. Allah yubu mome toro pibogne nenekona, Allahri Abrahamag, “Andi nimi yina likto pilul nimi maiknoag,” seho tanena, nimi maikno sembe salag lero pipsiso. Aghana undo lebog kom. Allah yubu mome toro pibogne wamlangena, “Andi nimi yina likto pilulneag,” seog. Anena Allahri amik nimi nhon wepto poglulne Kristus mo sembe sembaogti, “Andi nimi yina likto pilulneag,” seog. 17 Nari sembamnari lelamnangena ane: Musari aruksirop yubu anam mome toro pimna komag Allahri Abrahamag, “Andi nimi yina likto pilulne pere agha nimi ni tala-tala wamikag walingena tatsinun,” aro salag lero pibog. Allahri samenag Abrahamag salag lero pibogpa, hengkun taibuka taubuka ulamogha teng naual tarabare eptopneap palamog taneogna, Allahri aruksirop yubu ambarogne Musari tipto mome toro pibog. Mome toro pibog aghana, aruksirop yubu mome toro pibogne nenekori Allahri samenag yubu nikne Abrahamag salag lero pibogne neneko abolag nenero kom nembanep kom. 18 Musari aruksirop yubu anam mome tomna komag Allahri Abrahamag wana yororo, “An pere agha walingena tatsinun,” seog. Ane sembe Allahri sam Abrahamag wana yororo, “Tatsinun,” aro salag lero pibogne nene mo wamlaba, Allahri aruksirop yubu Musari amik mome toro pibogne nene mo wamla. Abene agha nimi nhondi yubu ambarelamsisori, “Allahri ‘Walinge tatsinun,’ seogne neneko tomnepnena, ot Musari aruksirop yubu saelbameberi, ul palamebe taneogna, Allahri wali nenehiroba tatsinepne tobukap,” aro nimiri lepso tanena, yubu nene tiptangkamla kom. Musari aruksirop yubu saelba ul piropne pere agha nimiri Allahri saeag agha tomnep tanena Allahri, “Walingena mo tatsinun,” aro salag lero pibogne pere agha torop kom. Aghana Allahri wana yororopne agha Abrahamag tarognena, Eldamneri salag lero pibogne pere agha tarog.
19 Undop pagha tanena, nimiri hailamsori, “Sa'a sembe Allahri El aruksirop yubu Musa ponekoag ma'aro ambarog?” aro haibanep. Allahri Abrahamag “Walingena tatsinun,” aro salag lero pibog sum anabi, Abrahamdi nimi yina likto pilulne agha El walinge poneko yale sum anabiag, nimiri mali-malia ulamekpa, Allahri nimi irikahiogne maiknoro philamek. Allahri irikahiogne philamek, ane sembe Allahrina, “Abrahamdi nimi yina likto pilulne agha yalulne poneko anam yingkin komag mog so'oag nimiri sikne el taukang,” aro Allahri El aruksirop yubu Musa ponekoag ma'aro ambarog. Allahap nimiap anabiag uropne Musa ponekoag Allahri El arukna imagnang malaikat pere agha yubu ma'aro ambarogpa, Musa ponekori aruksirop yubu nene tipto mome toro pibog. 20 Musa poneko anabiag uropne wamog tanena, nhonag sip tan koma yubu tara siba tara siba ambattangtopne agha mo ambatsinep. Aghana Allahrina El babe nhonog wamogti, El mori wanaag agha salag lero pibog.
21 Undop pagha tanena, nimiri haibanepnena, “Musari aruksirop yubu mome toro pibogne nenekori Allahri salag lebogne yubu toraplamlari, ‘Allahri Abrahamag salag lebog yubu neneko kom taho,’ alamla, te?” aro haibanep. Allahri yubu toraptangto kom tanep kom! Allahri nimiag aruksiropne, “Awe nene tolapmundi kamag neneptalulom,” aro arukahinepne nhon babe orog. Arukahinep yubu undo saogne wamso tanena, Allahri aruksirop yubu undo saogne nunag ambatsiso. Allahri nunag ambatsiso andarina, saelba ul piropne pere agha nu mog so'oag nimi Allah whingag wana porog nimi tahabe. 22 Aghana aruksirop yubu undo saogne nhon babe wamla kom. “Wana porog nimi taukang,” aro aruksirop yubu orog aghana, Allahri yubu mome toro palilamekneri lag nembarelamsildi, “Nu mog so'oag nimi niri mali-malia ulamapneri nu haing sae kaupsiloa saog uro nu seklem taraplamsil,” aro lag nembatsiog. Allah yubu mome toro palilamekneri nunag undo lag nembatsiog andarina, Allahri “Walingena tatsinun,” aro salag lero pibogne neneko sunsunum uro mog so'oag nimiag tatsinep. Nimi etneri Allahri wepto poghogne Yesus Kristus ponekoag sikne aro wana palilamle tanena, Allahri samenag, “Walingena tatsinun,” aro salag lebogne sunsunum uro Yesusag seneragtop nimi tanekoag sik uro tatsilul. 23-24 Allahri wepto poghogne Kristus poneko samenag mog so'oag anam yan komag, nu mog so'oag nimiri elag wana paliropne sembe anam ekon uro wamubu. Ekon uro wamubu li enekoag Allahri seneraglamognena, “Amik sum nari wepto poghogne so'oag yale tanena, elag wana palirop nimiag nari salag leropne sunsunum uro wana porog nimi nembahinun. Aghana el anam so'oag yale komag mog so'oag nimiri ekonne agha mali-malia ulamikag,” aro Allahri aruksirop yubu nenekoag agha nu mog so'oag nimi iriklamsiog. Iriklamsiogti yae piamsiog andarina, Allahri wepto pogtopne Kristus poneko amik sum yaog tanena, nuri El sembe el uro wamnep. Nu el uro wamnep nena, “Kristus ponekoag sikne aro wana palilamebenge pere agha Eldi nu wana porog nimi nembahilul,” aro seneraglamukapne sembe Allahri samenag Musaag aruksirop yubu enekori nu el nenelamsil. 25 Ot wene wamapnena, Yesus Kristus mog so'oag yaogne ponekoag, “Allah whingag na wana porog nimi nembanelul,” aro wana palilamap. El yaogne ponekoag wana palilamap ane sembe, Allahri aruksirop yubu nenekori nu nen irikto yae paiamsil kom.
26-27 Wenena, a'undi Yesus Kristusag sikne aro wana palilamlomdi, Yesus Kristusap ma'aldalamlom ane sembe, Allahri samenag Musa poneko pere agha aruksirop yubu enekori a'un irikto yae paiamsil kom. A'un wanaag agha, “Na Kristusap ma'aptahaneme,” aro a'unag kekneba nenero maghag pelengkahiong tanena, a'un niri, “Kristus poneko Ili Allahap sae tiptangto wamdangneap, Eldi wana seneragtopneap nanag taho,” aro unulamlom. Ane sembe Elap ma'aptangtopne agha Allah Elmabo taom. 28 A'un Kristus Yesusap ma'aptangtop nimi ni Allah Elmabo wamlom tanena, “El Yahudinge, el Yunaninge,” aro nhon paliag nenero a'eptangto seneldalamseng kom. Nimi sisa aghabog kom aghana, mo sektop nimi anabi, nimiri arukna nenerop nimi anabiag nhon paliag nenero a'eptangto seneldalamseng kom. Nengaboap kelaboap babe, nhon paliag nenero a'eptangto seneldalamseng kom. A'un Kristus Yesus ponekoag “Sikne” aro wana paliro Kristusap ma'aldalamlomdi, a'un mamun nikag ma'aptaom. Ot nhonog wamlom ane sembe, nhon paliag nenero nhon umag nenero a'eptangto seneldalamseng kom. 29 A'un Kristusap ma'aldalamlomdi, Eldi nimi taom tanena, Kristus poneko Abrahamdi nimi yina likto piropne wamla saog uro, a'un babe Abraham elmabo wamlom. Ane sembe Allahri Abrahamag “Tatsinun,” aro salag lekto pairopne, a'un Abraham elmabo wamlom nimiag babe tipto tatsilul.