4
1 Nari yubu ambatsinne nen sunumna sunuro so'opto ambatsinun. Nimi nhon elme wamnaba iliri, “Naringe saeag agha wamlange amik nameri saeag nembanun,” sembanep. Elme eneko ngauk wamnabog, amik sum iliri saeg wamlange ngai tanep. Aghana meneko anam nubu tan kom tanena, iliri awe torop nimi arukna taneko aruksirop yubu ka'elamseng saog uro meneko iliri aruksirop yubu babe ka'ero ulamnep. 2 Ilirina elme wali wamnepne sembe seneraglamnari, “Menekoap el saeag tanepne anekoap yae wamlulom,” aro paia urop nimiri saeag tarelamna. Ot iliri, “Wene nameri ni saelbamsilul,” aro lerop sum enekoog meneko ngainge tanep. 3-4 Ane saog uro Allah Elme anam mangaptan komag, nuri Elag seneragnep komdi, me ologne saog uro wamuburi, mo sekamnep kom wamubu. Nong nimiri elmeag arukto, “Undo ualulam. Undo unuaheng kom,” aro arukloa saog uro, nu babe arukna saog wamubu. Arukna saog wamubu aghana Allah Eldamne wanari, “Wene Naba Name mog so'oag pognun,” sembaog sumeneko, kelabo nhonag me monag taogpa, Allah Elme mangkaog. Me eneko mangkaogpa, Allah Elme eneko babe Allahri aruksirop yubu Musari mome toro pibog yubu neneko ka'elamogti, sunsunum uro ul palamog. 5 Musari aruksirop yubu umag piptangka yalamog andarina, Musari aruksirop yubu umag arukna saog urop nimi, “Allahringe taukang,” aro taulbahinep. “Arukna saog urop nimi taulbahinun,” aro ulamog andarina, sin Allah Elmabo tangom agha Allahri, “Namaboag walinge tatsinun,” seneropne sunsunum uro Elmabori ni tomnep. 6 A'unna Allah Elmabo wamlom ane sembe, Allah Elmeri Yame Walinge neneko Allahri poghogpa, a'unag babe nunag babe nuri wana topsilul aro poghog. Allah Elmeri Yame nunag wanaag tahiogti, Nuni Allahag yubu lelamlangena, “Naba naniong! Naba naniong!” aro haum alamla. 7 Ni wene undo uro yabalamogne agha, aruksirop yubu umag uropne wamlom komdina, Allah Elmabo wamlom. A'un Allah Elmabo wamlom, ane sembe Allahri, “Namaboag tatsinun,” aro weroba wamlange neneko tatsilul.Paulusti Galatia nimi sembe, “Welaro wamukang,” aro o'ona senelamsiogha
8 Samenag a'un Galatia nimi Allah sembe ekon uro wamlumag, so'oag urop mema phalamlumne neneko Allah mikip sirikne sunsunum urop kom mema a'undi phalamlum. A'undi mema phalamlumneri a'un wana sao kaupto arukna nembamsiog. 9 Aghana wenena a'undi Allah el wamlom. Sik lemna tanena, Allahri a'un el wamsil. Allahri a'un el wamsil aghana, na olog wana samsam ololamnelnena, a'undi nen samoro aruksirop yubu mikip urop kom yubuag nelepto, “Saelba ul palamukap,” aro ulamlom te? A'undi samenag “Teba'en,” aro sae liplumne neneko nen samoro, “Aruksirop yubu ene saelba ul palamukap,” aro arukna neneldalamlom te? 10 A'undi seneragto ul palamlomnena, “Ik sumene sum, ik wal ene sum, hengkun ene sum, li ko'o eneag to undo-undo ul palamebe taneogna, Allahri nu sembe wali sembahilul,” aro aruksirop yubu saelbom agha ul palamlom. 11 A'undi undo ul palamlomne sembe ka'ebandi, log senelamnangena, nari a'un sembe kilim weang aro yubu walinge ambatsisi aghana, “A'undi nari yubu sae lipmunag,” aro wana ikin wamna. 12a Nangkabo, na Yahudinge samenag a'unag yahiri, Yahudi nimiri aruksirop yubu saelban koma a'un Yahudi sisa kom nimi saog tahiri yubu ambatsisi. Wene wanaag agha yubu mikip uro a'unag mololamsinnena, “Nandamne aruksirop yubu nene umag arukna neneptan koma wamna saog uro, a'undi babe a'undam nimi arukna neneptaheng kom,” aro mololamsin.
12b-13 Nangkabo, a'un el wamlomne, na samenag ik selek sum a'unag yubu walinge Yesus sembe ambarelamsisingena, nanag nikna pukom agha saelbaneogpa, a'un nusamag wamsiri, alniro Yesus yubu ambatsisi. Na a'unap nikag wamuburi, a'undi nanag malinge nhon unne babe orog. 14 Nanag nikna pukom agha saelbaneogpa, a'undi na loba semban koma yeplamnelum. Na yeplamnelumne a'un sembe olog eraruk aghana, a'undi loba aro kemelopnilum komdi, a'un na Allah arukna imagne malaikat wamseneba, kipto tomnehom saog uro kipto tomnelum. Na Yesus Kristus Eldamne wamseneba, kipto tomnehom saog uro a'undi na sae salero kipto yepnelum. 15 A'undi na sae salero kipto yepnelum ko'o abenekoag a'un wana yeng sirik uro uanepneog loloro wamogpa, a'undi nanag, “Haing wana kwehero tatkehebe,” aro ulamnelum. Aghana wenena, sa'ange agha a'undi wanaag agha yeng senenne samenag ipsinge nene kom tao? 16 Nari sikne ambatsisinge sembe wene a'undi na aisange nembamnelom te?
17 Nimi orange a'un nusamag wamang nimi taneri a'un sembe mon sek uro, “Wana topsukap,” aro yubu ambarelamsiang. Ot sindi wanaag malinge seneraglamangnena, “Galatia nimi tanekori Paulus elkaboap lilobia agha nunag sip taikti, wana maikno senenne agha nunag neleplamsukang,” aro a'un wana toro ulamsiang. 18 Nimiri wana maikno senenneag agha sop-sop walia uropne nenena wali. Na a'unap nhon wamnange babe, na weag wamnange babe, sop-sop wana maikno senenneag agha walia ulamlulom. 19 Namabo nari o'ona sembamsin nimi. Wene na a'un sembe nen wana ikin uro seklelamna. Na seklero wamnangena, “A'undi wanaag Yesus Kristus ponekori wana seneragtopne a'undi wanaag meptaho,” aro kelabori me mangaro anep me maghan tihirop saog uro na a'un sembe nen wana ikin uro seklelamna. A'unag Yesusti seneropne anam a'undi wanaag meptan komag tanena, na seklenne seklebatsinepneog wamnun. 20 Wene nari senelamnangena, “Na a'un anabiag wamseneri, yubu mikip uro wembahin koma win-win aro yubu wenero a'un ambatsisene,” sembamna. Ot wene a'undi ul palamlomne lelamangne ka'ebandi, na wana samsamolamnel.
Sunumna Abraham elkelabo Hagarap Saraap sembe Paulusti sunuro ambatsiogha
21 Nangkabo a'un nimi agha, “Musari aruksirop yubu mome toro pibog yubu umag wameberi, saelba ul palamukap,” senerop nimi wamlom tanena, a'un nimiag olog haibahinun. “Aruksirop yubu umag wamukap,” alamlom aghana, Musari mome toro pibog yubu lomag uropne olog seneraglamlom kom te? 22 Musari mome toro pibog yubu enekoag wamlangena, Abrahamdi mabo phende likto piog. Me nhon neneko ilinna, Abraham elkel taptopneri arukna nenerop kel Hagar kelenekori me mangkarog. Me nhon neneko ilinna, Abraham elkel taptop kel nimiri arukna nemban koma urop kel Sarari me mangkarog. 23 Arukna nenerop kel Hagarag agha mangaptaog me eneko, nimiri sop-sop, “Kelabo topseberi, nimi likna liksebe,” senenne sunsunum uro kel eneko me monag taogpa, me eneko mangaptaog. Aghana me nhon arukna nenerop kom kelag agha mangaptaog me enekona, Allahri, “Me tatkenun,” aro salag lebogne sunsunum uro yepsiog andarina, Abraham eldi kel Sara me monag taogpa, me eneko mangaptaog.
24 Kelabo phende abenekoag agha Abraham elme phende mangaptarekne nenekori sunumna sunuro el nenelamsil. Kelabo phende abenekoag likiptopne sunuro sumbanepnena, Allahri, “Nimiap ma'aptaukap,” aro yubu nikne piptangtopne saog wamla. Allahri Sinai Yimag agha, “Nimiap ma'aptaukap,” aro nimiap yubu nikne piptangtop yubuna, arukna nenerop kel Hagar keleneko saog wamla. Eldi me mangkanep mabo ni arukna nenerop mabo agha mangkahinep. 25 Sinai Yim neneko Arab yubuag Hagar engerop. Si kekhaektop kel Hagar keleneko nimiri arukna nenerop kel wamog. Arukna nenerop kel wamogpa, Yahudi nimiri so'oag as nubunge Yerusalem wamang nimi anekori babe aruksirop yubu Sinai Yimag lag taog yubu ene saelba ul pirop nimi wamang. Ane sembe, Hagar keleneko sin Yahudi nimi sikinin wamloa saog kelenekori sin likipto sunumna sunulamsil. 26 As Yerusalem nimi mog so'oag wamang nimi tanekori aruksirop yubu saelba ul palamang aghana, nu Yesusag wana palirop nimiri asna, Allahri weptop as walinge Yerusalem imag wamlaba, nimiri arukna nembahinep kom. Arukna nenerop kom kel eneko nuri kaen wamloa saog kel enekori likipto sunumna sunulamsil. 27 Tam nene sembe nimiri samenag Allah yubu mome toro palilamogti,
“Elkel ela'ange liptangtop kom keleneko elmabo maikno lag taukang kom aghana,
Elkel ela'ange liptangtop kelenekona, elmabo maikno lag taukang.
Ane sembe an ibili urop kel, an me mangkanep kom kel,
wana awi sembalulam!
An me mangkanep komdi me mon telangkel komag,
yeng uro yubu haum aro lolo'oplamlulam!”
aro mome toro pibog.
28 Ishak samenag Allahri salag lero pibogne sunsunum uro Abraham elkel Sarari me mangkarog. Nangkabo, ane saog uro a'un babe Yesusag wana paliropne pere agha Allahri salag lero pibogne sunsunum uro mangaptangtop mabo wamlom. 29 Samenag Abraham elmabo phende abeneko wamdekag, Abraham elme samne nimiri sop-sop uropne sunsunum uro mangaptaogpa, Allahri Eldamne Yame mikipne pere agha Abraham elme amikne babe mangaptaog. El sop-sop uropne agha mangaptaog menekori Allahri tatsiog me eneko “Luknubanun,” aro malia ulamog. Wene babe sin mog so'oag nimiri likto piropne sunsunum uro Abrahamdi mangalamsiek nimiri, “Sin luknubahukap,” aro a'un Allah Eldamne Yameri mikipne pere agha mangaptalum nimi malia ulamsiang.
30 “Luknubahukap,” aro malia ulamsiang aghana, Allahri samenag yubu ambarogne mome toro palilamogti, “El arukna nenerop kom kel agha mangaptaog menekori ili saeag agha tomnepne ologha babe arukna nenerop kel agha mangaptaog menekoag talul kom. Ane sembe arukna nenerop kelap elmeap yag lambahilulam,” aro yubu leropne mome toro pibog. 31 Nangkabo! Yubu neneag agha nun Yesusag wana palirop nimina, arukna nenerop kel agha mangaptabu kom aghana, Allahri salag pibogne sunsunum uro arukna nenerop kom kel agha mangaptabu.