Kristus ponekori uaogneag agha nu wali sae lopsiogha
5
1 Allahri wepto poghogne Kristus ponekori nu sembe uaognena, “Sin arukna neneptangtop kom nimi wamukang,” aro nu sae lopsiog. Ane sembe, a'un khapto Yesusag wana palilapmundi, “Nimiri nen arukna nembi agha nunag ikinne pibukang kom,” aro khapto sekamlulom. 2-3 Ka'ebahut! Na Paulusti a'un el nenero ambarelamsindi, a'undi Musari aruksirop yubu saelbom agha nengabo kon tepto ul palapmun tanena, Kristus ponekori a'un yeplamsilul kom. Nen so'opto wenero ambarelamsindi, nengabo etneri Musari aruksirop yubu saelbom agha, “Allah whingag wana porogne neneptanun,” aro nengabo kon kareptangtop tanena, ni wali uro ul pinepneog wamla. Musari aruksirop yubu kiki nhonog wali uro ul pirop kom tanena, Allah whingag wana porog nimi neneptalul kom. 4 A'un nimiag agha, “Musari aruksirop yubu saelba ul palamneri, Allah whingag wana porogne neneptanun,” senelamlom tanena, a'unap Kristus ponekoap ina purum kareplolamlom. “Wana porogne neneptanun,” senelamlom tanena, Allahri wana nunag yorobahinneag agha, “Wana porog nimi nembahinun,” senelamlange nene wa'epto laplolamlom. 5 Aghana nunna, undo unurop kom. Allah Eldamne Yame Walingeri nunag el nenelamsilne pere agha nuri Yesusag sikne aro wana palilamap andarina, “Nu Allah whingag wamebeba, wana porog nimi sembahilul,” aro wana awiri nang-nangaro tilamap. 6 Nuri Kristus Yesusag wana paliro Elap ma'aldalamap tanena, Allahri nu kembi agha, “Nengabo kon teptangtop nimi to, kon teptangtop kom nimi to,” aro nhon paliag nembamsilul kom. Ot nhondi Allah wana wali nembanepnena, Allahri wepto poghogne Kristus ponekoag sikne aro wana palilameberi, lag nembi agha nimi o'ona senehiro ulamsibe taneogna, Allah wana wali nenelamukap.7 Samenag a'undi, “Yesusti yubu sikneag agha nelepto saelbamukap,” aro wali uro merero ul palamlum. Ot wenena etneri a'un merelamlom ina karepto wana wag nembahioba, a'un wana phende tangom agha, “Yubu nene sik to, kom to,” aro seneraglamlom? 8 Nimiri a'undi wana wag nenero, “Undo-undo ulamlulom,” aro ambarelamsiongdi, ambarelamsiang. Undop yubu ambarelamsiangnena, Allahri a'un, “Nanag yalulom,” aro yopsiogne ponekori senenneag agha ambatsirop kom. 9 Nimiri yubu sik komne ambarelamsiang yubu enena, “Kwaneng roti weneroba nong nubu talul,” aro yamoroba saog wamla. Ologha yamoro meptaho tanena, luksiriro pongkaloa saog sabo tangom agha nubu neneptanep. 10 Sindi a'un wana toro yubu sik komne ambarelamsiang. Aghana nari sik uro seneraglamnangena, a'un nanap nu Saelba Uhiropneap ma'aptangto wamap. Ane sembe, nari yubu ka'ebom agha sik sembamundi, orangeag nelebel pululom kom sembamna. Aghana nimi etneri babe a'un wana wag nenero yubu sik komne ambatsirop tanena, nimi enekoag Allahri tam ikinne pelengkalul.
11 Nangkabo, Yesusag wana paliro ma'aptangtop nimi wamlom. Nari sop-sop nimiag yubu ambarelamsinnena, “Ot Yesus kalag siplobekpa tebaogne ponekoag wana palilamebe taneogna, Allahap ma'aptanep,” aro ambarelamsin. Yubu undo ambarelamsinne nenekoag agha sin Yahudi nimi kon teptop nimi wana mali talamsilba, karong alamneang. Undop pagha tanena, nimiri na sembe yubu lelamsengdi, “Paulus eldamneri nimiag, ‘Nimi nengabo kon teplamseng,’ aro ambarelamsio,” seheng tanena tam karebi agha seneraglamlulom. Na Paulusti, “Kon teplamlulom,” aro yubu tapto ambarelamsisene tanena, sa'a sembe sin Yahudi nimi konteptop nimiri na, “Seklebalul,” aro wene babe malia ulamneang? Nari nimiag, “Kon teplammunne pere agha Allahap ma'aptanep,” aro ambarelamsisene tanena, sindi wanaag mali talamsiso komba, aisa nembaneheng kom. Aghana undo yubu ambarelamsin kom. 12 Nari nimiag, “Nengabo kon teplamlulom,” aro ambarelamsin kom aghana, sindi a'un wana tungmai nenelamsiang nimiri, “Kon tepto kareplamsebe,” alamangneri na wana yo nenelamnel. Wana yo nenelamnelba, nari sinag, “Hae, kon mo kom aghana, ni karebahut!” aro ambatsisene sembamna!
13 Nangkabo, Allahri a'un yopsiogpa, Elmabo talom nimi wamlomne, “Arukna neneptangtop kom nimi taukang,” aro yopsio. A'un samen arukna neneptangtop nimi wamlumdi, aruksirop yubu saelba ul palamlum aghana, Allahri a'un sae wali lopsiog. Sae lopsiog aghana, wene a'undi wanaag senelapmunne, “Na arukneropne orog ane sembe, yeng nembanepne mo uahane,” aro ulamlulom kom. A'un arukna neneptangtop nimi wamlum aghana, Allahri a'un sae wali lopsiog ane sembe, a'un mamun o'ona seneldalapmundi, yebeldalamlulom. 14 Musari aruksirop yubu mome toro pibog yubu ni eneko yubu tam nhonag ni kaupto wamlangena, “Andamnang nong ningki o'ona seneptangkamlam saog uro andi so'oag nimi babe o'ona sembamsululam,” aro mome toro pibog. 15 “O'ona seneldalamlulom,” aro mome toro pibog aghana, haing whi uro yae togtangkamlulom. A'undam nimiri si yoabari si singiptangto menaghal dalamlonga saog uro a'un mamun optangkapmun tanena, a'undam nimi loba neneptalulom.
“Allah Eldamne Yame Walingeri senenne a'undi wanaag palilamsilne sunsunum uro ul palamlulom,” aro ambatsiogha
16 Nari a'unag wenero ambarelamsinne ane. Allah Yame Walingeri seneropne a'undi wanaag palilamlange sunsunum uro ul palapmun tanena, a'undam nimi yeng neneropne, “Uahane,” aro seneropne agha ul palamlulom kom. 17 A'undam nimi yeng neneropne agha ul palamlulom kom sennena, nimiri sop-sop wanaag, “Uahane,” senenne nenekoap Allah Eldamne Yameri senenneap sunurop komdi, wa'ebil dalamdang. Ane sembe a'un Allah Eldamne Yameri senenneag nelepto ul palapmun tanena, a'undam nimiri wana senenneag agha mo ul pinep kom. 18 Aghana Allah Eldamne Yameri a'undi wana saelba ulamsile andarina, a'undi Allah Yameri senenneag nelepto ul palapmun tanena, a'unna Musari aruksirop yubu mombolag wamlulom kom. Allah Yameri senenneag nelepto ul palamlulom.
19 Nu mog so'oag nimi yeng neneropne agha ul piropne lag wamlaba, nimi ni el wamap. Nu mog so'oag nimiri “Uahane” senenne agha ul piropnena,
kelabo nengabo toptangkamna koma salik-malik tektangtop,
Allahri senenne semban koma sembenga kaluro piptangka ul pirop,
wanaag bobonge walel ananba agto yaboho aro ul pirop,
20 mema pharop,
mili lerop,
nimi aisa nenehirop,
nimiap yubu neneltarop,
“Ora nimiringe nanag taho,” aro wana mali senerop,
wana yo uro nimi wahirop,
nimi luknuhiro “Paliag tanun,” aro ul pirop,
nimi pali telektangtop,
“Nanag sip taukang,” aro nimi wana tohirop,
21 ora nimi tup taleag aro wana mali palihirop,
mag yonge terogha nenek saelba uhiropba,
nimiri seneragna koma mali-malia salik-malik uro urop,
yogneap maikno nimi nong yeng neneropne agha ul pirop. Nimiri undo unuropne sembe samenag ambatsisinge wene babe nen wenero elnenelamsin. Nimiri undo urop tanena, Allahri nia mangkina saelba uhiropne ponekori nimi taneko sembe, “Namabo kom,” sembahileri, taluro saelbamsilul kom.
22 Nimi nong yeng neneropne agha ul piropne lag wamla aghana, Allah Yame Walingeri senenne nimi wanaag pipsile tanena, nimi tanekori ul piropne lag talulne undo saog wamlul.
Eldi nimi o'ona senehirop
El wana awi urop
Wana aingniro nimiap ma'aro urop
Wana palingkina nia ul pirop
Wana walingeag agha nimi yepsirop
Nimiag elem uro pogto tatsirop
Sol wali uro sikne ua urop
23 Wana yo pimna koma win-win aro uahirop
“Malia uahane,” seneropne iriktangtop
Nimiri undo walia uropne sembe Musari samenag aruksirop yubu enekoag, “Undo unuaheng kom,” aro mome toro pibog kom. 24 Nimi etneri Allahri wepto poghogne poneko Yesusag wana paliro seneraglamang tanena, sindam nimi taneko Yesustinge taong. “Yesustinge tanun,” aro Yesusap ma'aptangtop nimi taneko sembena, nimiri kalag sipto oloplonga saog uro, Yesusap ma'aptangtop nimi tanekori sindam nimiri, “Malia uahane,” seneropneap, “Bobonge nari wanaag wamlange agto yaboho,” seneropneap laplobi agha, “Tebal,” aro Yesusap ma'aptaong. 25 “Nundam nimiri senenne tebal,” aro Yesusap ma'aptaboba, Allah Yame Walingeri nun kamag nenelamsiog. Kamag nenelamsiog tanena, Eldamne Yame seneropne nuri wanaag palilamlange sunsunum uro ul palameberi, 26 nundam nimi maibildalamukap kom. A'unkaboag wana aluktop yubu ambatsiseng komdi, “Ora nimi tup taleag” aro wana mali palilamsiseng kom.