Paulustina, “Nu nimi ni yebeldalamukap,” aro ambatsiogha
6
1 Nangkabo, a'un nimi nhondi irikna phiro malia ulamleba ipmun tanena, a'un Allah Yame Walingeri a'undi wanaag palirop yubu sunsunum uro ul palamlom nimiri malia urop nimi eneko wenelapmundi, ina walingeag samoro payalamlulom. Wenelamlulom aghana, a'undi wanari babe nimi enekoag yo semban koma wana waliag agha winwin aro wenelamlulom. A'undi nimi eneko wenelapmun nimiri babe a'undam nimi yae togtangto, “Na wana tomneleba malia uaneagti,” senelapmundi wenelamlulom. 2 A'un nimi nhonag ikinne wamle tanena, a'undi wanaag, “Nari babe keyagman nembanun,” aro yeplamsululom. Undo yeplamsimunne pere agha Allahri wepto poghogne Kristus ponekori, “Ulamlulom,” aro aruksirop yubu sunsunum uro ul palamlulom. 3 “Yeptangkamlulom,” senne tam nene sembe. Nimi nhondi eldamne sembe, “Mikipne wamna,” seneptangkamna aghana, sik uro mikip kom tanena, eldamneri haing kunuptangkamna. 4-5a A'un nimi a'ero-a'ero a'un mori wanaag seneragto ulamlomne kemeptangto miptamundi, “Wali to, kom to,” aro seneraglamsut. “Nimi orangeri ulamangne mombolag to, naringe paliag to,” semban koma a'undam nimi miptamundi, “Walia uan,” sembamun tanena, an mori ualamne sembe sik wali seneptanep. Allahri nimi ni sa'oag awe a'ero-a'ero tarelamsilne neneko ot elag tatle nimi enekori mo tol pinep. Ane sembe a'un nimi ni agha an mori wanaag seneragto ulamlamne, “Wali to, kom to,” aro mipto seneraglulam.5b-6 Allahri nimi niag, “Ualulam,” aro a'ero-a'ero awe tatsirop tanena, nimi eneko mori tol pinep aghana, a'un mamun yebeldalamlomne babe wamla. Nimi etneri Allah yubu wali uro ka'eamle tanena, wali-waliaba ni el saeag wamlange agha, nimi enekori Allah yubu sinag ambatsirop nimiag wali pogto tatsilul.
7 A'undam nimi el talamsut. Allahna, nimiri El sembe mo yubu nepto u kwa'en pa'abanep kom. Nimiri meropne agha amik yongoro terop. Ane sembe, a'undam nimi haing kunuptaheng kom. 8 Nimi etneri, “Nadamne yeng uanelul,” seneropne agha mero tolongorop tanena, halo aro loba tangtopne yongoro toplul. Aghana nimi etneri Allah Eldamne Yame Walingeri, “Ualulam,” aro yubu pairopne agha mero tolongorop tanena, wali pongkaleba, ya'ag kamag nenehiroba yongoro toplul. 9 A'unap nunapti ta'ap sen koma sol wali uro walia ulamebe tanena, amik Allahri, “Wene tatsinun,” sele sumeneko walinge agha yongoro tobukap. Ane sembe, “Sololamna,” semban koma tipto walia ulamukap. 10 Ane sembe nunag pa'asea olog wamle tanena, nimi niag walia ulamsukap. Nungkabo Yesusag wana palirop nimi kopto o'omne nembamsiberi, Yesusag wana palirop nimiag babe walia ulamsukap.
Paulusti, “Yesusag mo wana palilamlulom,” aro wenelamsiogti kipsiogha
11 Wene abene nandamne saeri mome toro palilamna ane. Nari so'opto ambatnuahinne nene mome toro pairopne nubu uro saeri tolamnange ane kembamsut!
12 Sin nimiri a'unag yubu mikip uro, “Nengabo kon teplapmun babe taneogna, Allah whingag wali wamlulom,” aro ambatsirop nimi tanekona, sindi wanaag, “Nimiri wali nu maiplamsukang,” aro a'unag undo ambarelamsiang. Sindi a'unag arung-arunga, “Kon teplamlulom,” alamsiangnena, sin logti, “ ‘Kristus kalag seklero tebaogne ponekoag mo wana palilamlulom,’ aro nimi ambarelamsisebeba, Yahudi nimiri nu yubu nepto opsiikag,” senelamangdi, “Kon teplulom,” aro aruklamsiang. 13 Sin Yahudi nimi nengabo kon teptop nimi taneko babe Musari aruksirop yubu mome toro pibogne wali uro saelba ul palamang kom. Aghana sindi a'unag, “Kon teplulom,” alamangnena, a'un sindi lelamangneag nelebahisomdi, kon teptahom tanena, sindi a'un nongag kon teptoba sembe, “Nunag neleplamsiang,” aro sindam nimi paliag neneptanep. 14 Sindi, “Paliag neneltalamukap,” aro ambatto tongolamsiang aghana, nandamneri ologha babe paliag neneptanep kom. Ot tam nhonog nanag wamlange agha paliag nenelamnangena, nu saelba uhiropne Yesus poneko el kalag siplobekpa, tebaogne pere agha nu mog so'oag nimi taluro wali nenehiropne mo paliag nenelamna. Allahri wepto poghogne Yesus Kristus kalag siplobekpa tebaogne mo kopto o'omne nenelamnange pere agha, mog so'oag nimiri sop-sop nelepto ul piropne nari kemenagna tebaloa saog loba tao. Apna mog so'oag nimiri kemenagna na babe loba tao senelamneang. 15 Wene nimi nengabo kon tepto ul piropne neneri nimi yepsinep kom. Aghana nimi nengabo kon teptop komne neneri babe nimi yepsinep kom. Wene nhonog paliag uropne anena, Allah Yame Walingeri seneragna wendogne wanaag nenelamsilne mo o'omne wamla.
16 Nimi etneri nari wene aro ambatsin yubu eneko saelba ul pirop tanena, sin nimi taneko sembe, “Allahri nimi eneko yareag sembahileri, wana aingnibahilul,” aro molbarelamsin. Israel nimi babe, Allahri wepsirop nimi sembe undo molona molbarelamsin.
17 Wene komoptobagna, nari Yesus si paliag nenero ambatto tongolamsinne abeneko pere, nimiap sa'a-sa'aapti na omneekpa, meneng sisua lag talbana, “Na Yesustinge wamna,” senenne kekneba nari nongag wamla. Ane sembe nimi nhondi babe na yubu nepto eraruk nembaneheng kom.
18 Nangkabo, a'un Yesusag wana palirop nimi sembe nari molbarelamsinnena, “Nu Saelba Uhiropne Yesus Kristus ponekori wana a'unag yorolamsileba, wana wali wamlulom,” aro molbarelamsin. Sikne agha saekag lebap.
Abenda.