Efesus
Nimi Sembe
Paulusti Mome Toro Pibogne
El nenerop yubu palilamap
Paulusti mome toro pibog yubu ene, nimiri el sae kaupto kop aeag tobongkibekpa, Kristusag wana palirop nimi as soro kalurop as Efesus wamek nimi sembe mome toro pibog. As Efesus aneko Asia so'oag as nubunge wamog. Mag longorop mag nubunge laut abolag wamogpa, nimi kabongag mag alip toman yabirop nimi maikno as Efesus anekoag saingnil alamek. Efesus nimi sembe mome toro pibog yubu eneag, Paulusti yubu tam etpare sembe ambarelamsiog. Tam nhon ambarelamsiognena, Kristus ponekori nu taluro saelbamsil nimi wamap ane sembe, “Nu Yesusag wana palirop nimi seneragna nhonog uro ma'aldalamsebe,” aro nubu nenero mome toro pibog. Yahudi nimi babe, Yahudi sisa kom nimi babe, Yesus Kristusag wana palilamap tanena, nong nhonog saog tangom agha ma'aldalamap.
Nen tam nhon ambarelamsiognena, Yesusag wana palirop nimiri ua uropne sembe tibin nenero ambarelamsiog. Samen nu mog so'oag nimiri seneropne sunsunum uro, “Malia uahabe,” seneropne nelepto ulamubu aghana, wene Allah Eldamne Yame Walingeri seneropne sunsunum uro ulamnepne sembe mome toro pibog. Yubu eneag Paulusti Yesusag wana palirop nimi wenero ambarelamsiogti, “Undo-undo ulapmunba, nu Saelba Uhiropne ponekori yeplamsileba, malinge luknuro mikip talulom,” aro wenelamsiog.
Paulusti Efesus nimi sembe mome toro pibogha lomag wamlange
Paulusti Efesus nimi kiplamsiogne sembe (1:1-2)
Kristusap Elag wana paliro winiptangtop nimiap sembe (1:3-3:21)
Kristusag wana palirop nimiri wana wendogneag agha ua uropne sembe (4:1-6:20)
Paulusti mome komobanebag kipsiogne (6:21-24)
Pogsiognang 18:19-21 (1:0)