Filipi
Nimi Sembe
Paulusti Mome Toro Pibogne
El nenerop yubu palilamap
Paulusti samenag as Filipi piogti, yubu walinge Yesus sembe ane ambatsiogpa, as Filipi nimi agha nimiri wali uro ka'ebaek. As Filipi ane Makedonia so'oag wamlaba, Paulus wamog li ko'oag Roma nimiri saelbamsiek. Yesusag seneragtop nimi as kaluro sorop as Filipi wamek nimi sembe mome toro pibogne nenena, Paulus kop aeag wamogpa, yin saleropnangdi “Lambaleag,” aro yae piamekpa, Paulusti mome nene toro pibog. Paulusti mome nene toro palilamogpa, Allah yubu ka'elamek nimi nenneri, “Undo-undo unulapmun taneogna, a'undi malia uropne agha Allahri taulbahilul,” aro sengkwanektop yubu ambarelamsiek. Sindi sengkwanektop yubu ambatsiekne sembe ka'ebaogti, Paulusti Filipi nimiag, “Ot Yesusag wana paliro seneraglapmundi, Allahri taulbahilul,” aro mome ane mome toro pibog.
Paulus sae kaupto kop aeag wamogti, Filipi nimi sembe, “Ina selepne toman piikag,” aro wana ikin wamog. Eraruk wamog aghana, Paulusti Yesusag wana palilamogne sembe, wana awi uro, “Tapto ya'ag wali tanun,” aro seneraglamog.
Paulus eneko elenge wanaag agha Filipi nimi sembe o'ona sembamsiogti, “Nanag kwema ulamneoba, a'un Filipi nimiri wali yeplamnelom,” senelamsiogti, kiplamsiog. Paulusti Filipi nimi sembe o'ona senenneag agha sembaogti, “Wembahineri, ‘A'un babe tam ikinne a'unag talamle tanena, khapto wapmundi, Yesusag aghabog wana paliro seneraglamlulom,’ aro mome ane toro pimnun,” sembaogti mome toro pibog.
Nen nhon, Paulusti wenero ambarelamsiogti, “Yesusti Eldamne kibiang towalengeptan koma wamog saog uro, a'undi babe, ‘Nu nubunge paliag uro wamap,’ aro maiptan koma wamlulom,” aro mome toro pibog.
Paulusti Filipi nimi sembe “Ekon wamikag aro el nembahinun,” sembamog. El nembahinun sembaognena, nu mog so'oag nimi anabiag agha Allahri nimi wepsiogti, Allah Elme Yesusap ma'aptangtop nimi nembahiogne sembe Paulusti sin el nembahiog. Allahri, “Nimi mog so'oag nimi agha Yesusti ualenge pere agha Nanap ma'aptaukap,” aro uaognena, nu mog so'oag nimiri wali-walia ulamapne sembe uaog kom. Allah Elba Eldi wana nunag yorobahinneag agha, “Yesusti ualenge pere agha ma'abahinun,” aro uaog. Undo unuaog aghana, Yahudi nimi agha nhon-nhondi Yesus yubu ka'elamek aghana, wana phende saog wamek. Nimi sisa Yahudi nimi agha Yesusag seneragtop nimi wamek aghana, sin wana phende saog urop nimiri seneraglamekti, “Nimiri Yesusag seneragnep aghana nuni nunisagti ul palamekne sunsunum uro ul palamebe taneogna, Allahri nu sembe wali sembahilul,” aro ulamekti ambarelamsiek. Tam nene sembe Paulusti karong sirik senelamogti, “Nen sap sarikto Filipi nimiag sikne ambatsinun,” aro mome toro pibog.
Paulus haing sae kaupto wamogne sembe wene wamang nimi maiknori seneraglamangnena, as soro kalurop as Roma wamogti, mome nene mome toro pibog aro seneraglamang. Paulus haing sae kaupto kop aeag wamogti, “Tam lelekto kemero kareptop nimi whingag pelebeltanan yubu ambatsinun” aro nang-nangaro wamogti, mome nene mome toro pibog. Mome nene yubu lilim ka'ebi agha Paulustinge wanaag wamlange el tanep. Filipi nimiri maiknoro Paulus yeplamekpa, Paulusti sin sembe awi sirik o'ona senelamsiogti, “Mikip nembahinun,” aro mome nene mome toro pibog.
Paulusti Filipi nimi sembe mome toro pibogha lomag uropne
Filipi nimi kipsiogha (1:1-11)
Paulusti eldamne wamogne sembe ambatsiogha (1:12-26)
Yesusag wana palirop nimiri ulamukangne sembe ambatsiogha (1:27-2:18)
Elkabo Timotiusap Epafroditusap abeneko sembe, “Undo unuarukang,” sembaogti ambatsiogha (2:19-30)
“Haing whi uro yae togtangto wamlulom,” aro wenero ambatsiogha (3:1-4:9)
Paulusti “A'unap nanap sae tiptangto nimi pali wamap,” aro kipsiogha (4:10-23)
Pogsiognang 16:12-40 (1:0)