Filipi 1

Filipi

Nimi Sembe

Paulusti Mome Toro Pibogne

Paulusti Filipi nimi sembe kipsiogha

1 Nungkabo! Na Paulusap nangkae Timotiusap Yesus Kristus ponekori arukna wamnamdi, mome eneag agha a'un kiplamsinam. Allahri a'un sembe, “Namabo taukang,” aro wepsiogpa, a'undi Yesusag “Sikne” aro wana palilamlomdi Elap ma'aptaom. Elap ma'aptaomdi, Allah Elmabo taom nimi as soro kalurop as Filipi wamlom nimi ni, “Nungkabo,” aro kiplamsinam. Apna nungkabo as Filipi nimi sembe Allah Elmabo paia uhirop nangap, Allah Elmabo yepto tongohirop nimiap a'un kiplamsinam. 2 Nuri a'un sembe Allahag molbarelamsinamne enena, “Nuni Allah nuringeap Yesus Kristus nu Saelba Uhiropne ponekoapti wana a'unag yorolamsirikti, a'un wana aingnilamsurukang,” senelamnamdi molona molbarelamsinam.

Allahag “Naba Naniong” aro wana awi uro Filipi nimi sembe molbatsiogha

3 Nari sop-sop a'un sembe seneraglamsindi, nari wanaag agha, “Naba Naniong,” aro Allah kiplamna. 4 Nari a'un ni sembe sop-sop Allahag molbarelamsindi, molona ni wana yengag agha a'un sembe molona molbarelamsin. 5 Nari wana yengag agha a'un ni sembe Allahag kipto molona molbarelamsinnena, tam nene sembe. Na samenag Filipi so'oag yahiri, yubu walinge Yesus sembe a'un ambatsisiba, a'undi alniro Yesusag “Sikne” aro wana palilamlum sumag agha yeplamnelum. Alnirop sumag agha yeplamnelumba, a'unap sae kerektangto tolamuburi, wene babe awe nikne toro yubu walinge Yesus sembe nimiag ambarelamsiap. 6 A'unag uro yabiogne neneko, Allah Eldamneri a'un yepto alnibaogpa, Yesusag wana palilamlum. Nari wana to'opto sik sembamnarina, Eldi a'unag walinge alnibaogne ponekori a'un sae lipsin koma tipto walinge tolamle paghabog Yesus Kristus El nen samoro yalamle sumeneko agha a'unag tolamsilne komobalul.

7 A'un nari nimi wanaagne wamlom ane sembe, nari a'un ni sembe, “Khapto wamukang tiog,” senelamsindi, yeng sirik uro seneraglamsinne nene sunsunum. A'undi nanap sae kerektangto awe nikne tolamap ane sembe, a'un sembe undo yeng senelamsin. Allahri wana nunag yorolamsilneag agha na yepto awe nene tatneori, a'un babe yepto tatsio andarina, Yesus yubu walinge nikne ambarelamsiap. Na wene wamnangena, Yesus yubu walinge sik senerop kom nimi whingag Yesus yubu walinge pelepto sikne lag nenelamsinneag babe, nimiri na haing sae kaupto salero piamneangneag babe, a'undi na sae limnen koma Allahri yeplamsilneag agha awe nikne tolamap. Ane sembe, “A'un nari nimi wanaagne wamlom,” senelamsin. 8 Nari a'un sembe “Sik uro a'unap haiptahabe,” senenne nanag loloro wamlange sembe Allah Eldamneri el wamla. Yesus Kristus ponekori o'ona senelamsilneag agha a'un sembe o'ona senero, “Haiptahabe,” senelamna.

9 Nari a'un sembe molona Allahag molbarelamsinnena ane. Allahri a'undinge wana heksinne maikno nembamsileba, a'unag el wamsilulne babe maiktangto yabalamlul. Allahri undo a'un yeplamsilul andarina, a'un mamun o'ona senehinne maikno ma'aro seneldalamlulom. 10-11 Allahri a'undinge wana heklamsileba, a'undi nia mangkina mipsinne agha, “Malinge nene, walinge nene,” aro el talapmundi, walinge sirikne aghabog saelbamlulom. Mipsinne agha walingeog saelbapmun tanena, Yesus Kristus nen samoro yale sumeneko tam lelekto kemero kareplamleri, a'undinge wanaag malinge nhon babe iplul kombana, nimi nhondi babe a'unag tam pimnep kom. “A'un undo wamsom,” sembamnangena, Yesus Kristus ponekori a'unag ulamsileba, a'undi walia sikne ulbanne a'unag to'opto wamleba, wanaag malinge orogha a'unag tam pimnep kom uro wamlulom. Undo wapmun tanena, a'undi ulapmunne sembe nimiri Nuni Allah omektoba El sembe kibiang towalengelamukang. Ni ane a'unag undo uro yabilul tiog sembamnari Allahag, “Yepsululam,” aro molbarelamsin.

Paulus sae haing kauptoba wamogti ambatsiogha

12 Nangkabo, a'un babe eltahiso sembamnangena, nanag uro yabalamlangeag agha yubu walinge Yesus sembe nimi maikno ka'elamangpa, Yesus yubu walinge nene sabo talamla. 13 Undo yabalamlaba, as eneag wamang nimi niri na sembe el uro wamangnena sindi, “Paulus nenekori, ‘Yesus Kristus si nubu talul,’ aro ambarelamsilne sembe nimiri el sae kaupto kop aeag tobongkibong,” aro na sembe ka'elamangdi, el uro wamang. As eneag wamang nimiri babe, Roma nimi sembe yubu sia leropne ponekori ae yae ua uro yin salerop nang babe ka'ebaongdi, el wamang. 14 Na haing sae kaupto kop aeag wamnange nungkabo Yesus Saelba Uhiropne ponekoag wana palirop nimi as taneag wamang nimiri kembamneong. Kembamneong aghana, na sae kaupto wamnange neneri Yesusag wana palirop nimi wana mikip nenelamsilba, sin Yesusag wana palirop nimi maiknori log kom uro Allah yubu Yesus sembe nen ma'aro lag phoro nimiag ambarelamsiang.

15-17 Nimiri Yesus yubu sikne ambarelamsiangnena, sin nimi agha nimi nhon-nhondi, “Nimi nubunge tanun,” aro ambarelamsiangba, nhon-nhondi “Ora nimi luknubahineri, paliag tanun,” aro ambarelamsiang. Sin undop saog nimiri wanaag tapto seneragna koma, na haing sae kaupto kop aeag wamnange sembe el wamangdi, “Paulus sembe ikin nembaukap,” aro seneragto ulamneang. Seneraglamangdi, “Yesus sembe ambarelamsibenge agha nimiri nu omeklamsikpa, nubunang tabenge sembe Paulusti wana saplul,” aro Yesus yubu sembe ambarelamsiang. “Nimiri nu mipsukang,” aro ambarelamsiang aghana nenneri otsik uro o'ona senehinneag agha, “Yepsinun,” aro Yesus sembe yubu sikne ambarelamsiang. Sin undop saog nimi el wamsilba, na haing sae kaupto kop aeag wamnange nenena, Allahri kop ae aneag sekitneo andarina, pelebeltanan yubu ambatsirop sumeneko sembe nang-nangkalamna abeneko pere Yesus yubu walinge babe sik uro ambarelamsindi ambarelamsinun. Sin undop saog nimi el wamsilba, na wamnange sembe o'ona senelamneangdi, yubu walinge Yesus sembe tipto ambarelamsiang.

18 Nimi eneri wana walingeag agha Yesus yubu walinge ambarelamsiangpa nenneri, “Nubunge tanun,” aro Yesus yubu sikne ambarelamsiang. Tam nene nanag ikin kom. Na sembe o'omnena, sa'a-sa'a uro yabileba, nimiri Yesus sembe, “Allahri wepto poghogne Kristus wamla,” aro sik uro ambarelamsiang tanena, na yeng ulamnel. Na yeng ulamnelba, amikne babe yeng uro wamnun.

19 Na haing sae kaupto kop aeag wamnari, “Na yeng sirik uro wamnun,” senennena, tam nene sembe. Yesus Kristus ponekori nunag Yame Walinge tatsiogneap, a'undi na sembe Allahag molona molbarelamnelomneap pere agha, “Eldi Yameri na yepto paiamneleri, wali nembanelul,” aro na elwamna.

20 “Allah Yame Walingeri sik uro na yepto paimnelul,” senelamnari yeng uro tiboglamnangena angaro yabinep komdi, ali sembanun kom. Nari nongag sa'a-sa'a uro yabioba, nari nong ningkiri, “Yesus Kristus poneko si nubu talul,” aro sop-sop ulamna. Wene babe, Allah Yame Walingeri yepneleba, kamag wamneag babe, ya'ag omneikag babe, “Yesus Kristus si nubu talul aro log kom uro ambarelamsisene,” senelamna. 21 Nari senenne ane, na wene kamag wamnangena, Allahri wepto poghogne Kristus ponekoringe wamna. Na tebanne babe, tebaneba kamna walinge nanag talul. 22 Aghana na mog so'oag wene wamnange nenena, “Awe walinge wero nimi wali yepsinun,” senelamna. Ane sembe, “Yaghe, nela agha wepto whingag nembanun?” senelamnari, 23 na tara sip agha kilim, tara sip agha kilim aloa saog ulamnel. Nari wanaag agha senelamnangena, “Yesus Kristus saramag piheneri, nhon wamseneme,” senelamnange nene, ot nene agha wali sirik senelamna. 24 Aghana nari, “A'un wenehiro yepsisene,” senelamnange nenena, na tebane tanena a'un eka'uk wapmunag ane sembe, “Mog so'o neneag agha wamsene,” senelamna. Kamag wamneba, a'un sembe wali wamlul.

25 Tam nene sembe na sik uro el wamna. Ane sembe, “A'unap nhon na kamag wamnun,” aro wepto whingag nenelamna. Mog so'o neneag a'unap nhon wamsebe andarina, a'un yeplamsinun. Nari a'un yeplamsinunnena, “Yesusag wana maiktangto pailapmundi, awi senenne a'un wanaag nubu tangto yabalamlul,” aro yeplamsinun. 26 “Kamag wamnun,” aro wepto whingag nenelamna andarina, na a'un wamlomag samoro yane tanena, a'un Yesus Kristus ponekoag nhon ma'aldalamlom nimi awi sembamlulom. Na a'unag samoro yanenge sembe a'undi senelapmundi, “Yesus Kristus ponekori Paulus tebanebag agha taulbaoba yal,” senelamlulom tiog. Undo senelapmunneag agha, awi senenne siriro la'analamloa saog uro a'unag wamlul tiog sembamnari, “Nen haiptahabe,” senelamna.

Yesusag wana palirop nimiri ulamukangne sembe ambatsiogha

27 “Nen haiptahabe,” senelamna aghana, a'un wamlomag yaneri, a'un haingdi ipsinun to, ya'ag weag wamebeba, nimiri a'un sembe yubu lena aghabog ka'ebanun to, amik el taukap. Ot sa'a-sa'a uro yabileba, a'un wali wamlulom aro el tahane sembamnari, nari wanaag wamlange a'un ambatnuahin. A'undi sop-sop ulapmunnena, Yesus Kristusap ma'aptangtop nimiri unuaheng senenne sunsunum uro ulamlulom. Allah Eldamne Yame Walingeri a'un yeplamsileba, Yesus yubu sunsunum uro a'un seneragna nhonog khapto wamlulom. Khapto wapmundi, a'un mamun seneragna nhonog agha sae kerektangto kilim weang alapmundi, Yesus yubu sikne pelepto ambarelamsululom. 28 A'undi nia ulapmunneag a'un aisa nenelamsiik nimi sembe log semban koma khapto sekamlulom. A'un log kom uro khapto sekapmunne nene sindi kembongkia, “Allahri Yesusag wana palirop nimi taulbahileri, Yesus yubu ingisaptop nimi oro luknubahilul,” aro keknep uro yabilul. 29 Allahri a'unag walia tarelamsilne nenena, Yesusag “Sikne” aro seneragnange nene tarelamsildi taulbahilul. Ot nunag tatsiogne nenena Yesusag seneragnange aghabog tatsiog kom aghana, Allahri wepto poghogne Yesus Kristus poneko sembe seklero ulbanne babe nunag tatsiog. 30 Nunag tatsiogpa, nari kilim weang aro ulamsinge neneko a'undi haingdi ililamnelum. Wene babe ikinne nanag uro yabalamlange sembe ka'elamlomdi, a'undi babe kilim weang aroba nikne seklelamlom.