“Nimiri, ‘Allah whingag sik nembanelul,’ aro nimiri ul piropneag wana pimnep kom,” aro ambatsiogha
3
1 Wene nangkabo Yesusag wana palirop nimi, nari a'un sembe mome komoptopne palilamnarina, nu Saelba Uhiropne ponekoap ma'aldalamapne sembe awi uro wamlulom. Tam nene mome toro pimna aghana, nari nen sarikto a'unag ambatsinenge na sembe ikin komdi, “A'un pelebahinun,” aro nen sap sarikto ambarelamsin.2 A'un togtangto wapmundi, haing whi uro yae wamlulom. Sin Yahudi nimi agha nimiri ambarelamsiangdi, “Ot kon karepto kon teptangtop nimi aghabog Allahap ma'aptangtop nimi tanep,” aro ambarelamsiang nimi taneko sembe haing whi uro yae wamlulom. Sindi undo ambarelamsiangdi, nengabo kon karebiagha sisua nenehirop nimi tanekori malia sirikne ulamangdi, kam yonge saog urop nimi wamang. Sin sembe haing whi uro yae wapmundi, sindi ambarelamsiangne sik semban koma a'un togtangto wamlulom. 3 Sindi ambarelamsiangdi, “Kon karepto kon teptamun taneogna, Allahap ma'aptangtop nimi talulom,” alamang aghana, nunna Allah Yame Walingeri yeplamsilba, Allahri wepto poghogne Kristusag wana palilamapti, Allahap ma'aptangtop nimi wamap. Kristus Yesus ponekoag wana palilamapti, El paliag nenelamapti, Allah Eldamne Yame Walingeri yeplamsilneag agha sik uro Allah omeklamap. Allahri wepto poghogne Kristusag wana palilamap aghana, nimiri nongag ul piropneag wana palilamap kom. Sin Yahudi nimi agha kon teptangtop nimiri ambarelamsiangdi, “Kon karepto kon teptamun taneogna, Allahap ma'aptangtop nimi talulom,” alamang. Aghana nuri, “Allahri wepto poghogne Kristus ponekori Allahap nunap ma'abahinep,” aro Elag wana palilamap tanena, kon teptangtop nimi taptopne wamap senep.
4 Nimi nhondi el wanaag sik senelamsori, “Nari nongag ul piropne sembe na Allah whingag wali wamna,” aro seneragnep. Undo seneragnep aghana, nari undo seneraglamna kom. Nimi nhondi, “Nimi nongag ul piropneri Allah whingag nimi wali nembahinep,” aro seneragsoba, sik uro wamso tanena, nandamne sembe olog ambatsisene sembamna. Ora nimiri nongag ul piropne ologha wamlaba, na Paulusti nongag ul piropne maikno sirik wamla. Nari nongag ul piropne maikno sirik wamlange sembe, “Nimi ni anabiag agha na nimi wali sirikne wamna,” sembahane. Ka'ebalulom!
5 Na Israel ponekori nimi sisa liktoba taptopne wamna!
Israel poneko elmabo aobare agha, elme wanaagne Benyamin nimi sisa liktoba agha mangkaneek!
Mangkaneekpa Allahri samenag Abrahamag babe, Musaag babe aruksirop yubu sunsunum uro na mangaptahia, ik lin sumeneko taogpa, nanag kere kon tepto karebaneek.
Nu Yahudi nimi nunisag Abraham poneko Ibraninge alamek tanena, na Ibraninge taptopne wamna.
Allahri aruktop yubu Musaag ambarogpa, Musari tipto mome toro pibog yubu sembe, sol wali uro el talamsiri, sunsunum uro ulamsi. Nari sik tapto Musari aruktop yubu mome toro pibogne sunsunum uro ul palamsinge sembe “Farisi nimi,” aro kiplamneek.
6 Na undo Musa yubu el wamsiri, sunsunum uro ulamsiba, nimi nhondi babe nari ulamsinge sembe Allah yubu takto tam nanag pimnep kom.
Na Allah sembe wana maikno sembahingena, “Imagne sae tanun” aro yeng sirikne nanag loloro wamneog andarina, Yesus yubu neneko orolena yubu sembahiri, “Yesusag seneragtop nimi seklebaik,” aro olamsisi.
7 Undo wamsiri ulamsiri, samenag nari, “Allah whingag wali neneptanepne maikno nanag poloptal,” sembanep aghana, wenena undo senelamna kom. Wenena, Allahri wepto poghogne Kristus poneko Yesus, “Si nubu talul,” aro ulamna, aghana nari samenag, “Wali neneptanepne poloptal,” senelamsiri ulamsinge ni neneko teba'en senelamna.
8 Neabene aghabog kom. Wene na el wamnangena, Allahri samenag Kristus poneko sembe salag lebogti, “Nari wepto pognenge nhon yaleri, mog so'oag nimi anabiag agha taulbahileri, mog so'oag nimi saelbamsilul,” aro salag pibogne neneko, “Yesus sembe lebog,” aro el taneo. Samenag Musari aruksirop yubu sunsunum uro ulamsinge Allahri, “El yalul,” seog nimi Kristus poneko sembe nang-nang aro ulamsi. Nang-nang aro undo unulamsi aghana, “Yesus poneko el Kristus wamla,” aro el taneog kom. Ane sembe ni samenag ulamsinge neneri yepneog komdi, pham ti yaroba wamloa saog senelamna. Wali sirik phelektopne nhonogne anena, “Yesus sik uro Kristus wamla,” aro el taneoba, Yesus Kristus ponekori na saelbamnel. Nia mangkina sae limno andarina, Yesus Kristus na Saelbamnelne ponekoap sae tiptangto wamnemeri, 9 sik tapto Elap nhon ma'aptangto wamnunam. Musa yubu mome toro pibog yubu saelbiagha nimi nhondi Allah whingag, “Malia uan komdi, sik urop nimi wamna,” senep kom. Nari babe samenag Musa yubu saelbamsiri, ulamsingeag agha “Nimi sikne wamna,” senun kom. Aghana nari Yesus sembe sik senelamnari, “Allahri wepto poghogne Kristus wamla,” aro seneraglamna andarina, nanap Yesus Kristus ponekoap ma'aptangto wamnam. Nari Yesusag “Sikne” aro wana paliropne nene sembe Allah Eldamneri nanag ililamneldi, nanap Kristusap ma'aptangto wamnamne ililamsildi, na sembe, “Wana porogne,” senelamnel. 10 Ot nhonog nanag taho senelamnangena, Allahri wepto poghogne Kristus poneko el tahaneri, sae tiptangto wamseneme senelamna. Allah Eldamne Yame Walingeri Yesus Kristus teptobag agha kamag nembaonge mikipne neneko nanag babe taho. El samenag seklero tebaog saog uro na babe El sembe seklero tebahane andarina, 11 El samenag teptobag agha kamag taogne saog uro na babe kamag tahane senelamna.
“Saramag wamlange sembe ul tongolamlulom,” aro ambatsiogha
12 Nari lemnange nenena, “Ni ane nanag uro yaboho senenne nanag taoba, Allahri nanag komopto tobitnel,” alamna kom. Aghana nari tipto ulamneba, “Yesus Kristus ponekori na sembe wero tatnilulne tomnun,” aro tipto ul tongolamna. Nene sembe na taluro tomneori Eldinge nembaneo. 13 Nangkabo a'un Yesusag seneraglamlomne, nari sik uro seneraglamnangena, “Na sembe weroba wamlange tatnelulne neneko na saeag tal,” senelamna kom. Aghana ot nhonog nari uanunne wamla. Uanunne wamlangena, na wailag wamlange sembe limneri, saramag wamlange sembe mikip uro ulamnun senelamna. 14 Ane sembe, “Komobitneba na sembe weroba wamlange na saeag talul,” aro kilim weanga yubu ambatto tongolamna. Na saeag tatnelulnena, “Allah imag ua urobag kamag uro wamnunam,” aro Allahri Yesus Kristus pere agha na taluro yopneogti tatnelul.
15 Nangkabo, nu wana whi uro seneragnep nimi wamap tanena, weneog lemnange sunsunum uro nun niri undo seneraglamukap. Aghana nangkabo, nari lemnange sembe saelbanep komdi, saekag kom tanena, hae Allahri tam nene sembe a'un tibin nembatsilul. 16 Ot wenena, nunag tibin nembahioba, nunag wamlange sunsunum uro saekag wameberi ulamukap.
17 Nangkabo, a'un Yesusag wana palirop nimi. A'undi na kemelamnelomba, nari ulamnange sunsunum uro a'undi babe ulamlulom. Nuri sikne agha ul palamoboa sunsunum uro ul tongolamang nimi babe ipsimun tanena, sin sembe babe wailag nembahin koma kemelamsimunba, sindi walia ulamikne sunsunum uro ulamlulom. 18 “Nuri ulamapne kembamsimundi, sunsunum uro unulamlulom,” aro ambatsinnena tam nene sembe. Samenag nimiri Yesus kalag sibekpa, nu sembe tebaog aghana, nimi maiknori ul palamangne pere agha nu sembe tebaogne ponekoap aisa neneldalamang. Undo ul palamangneag agha nari wana saplamnelba, samenag ik sulu ambarelamsino saog uro wene babe hail mag tiniro ambarelamsin. 19 Sin undo urop nimi eneri mog so'oag nimi nongagne sembe wana to'opto seneraglamangdi, “Na mon sek,” senenne paliag nenero tena aboap ulamang. Sindi ali nenero ul piropne sembe maibildalamang. Undo ul palamangneag agha sirikagne seklero loba taukang.
20 Aghana nu Allah Elmabo wamapti, nuringe as taptopnena, El imag wamlange ponekoap nhon wamukabag wamla. Anikoa nu Taluro Saelba Uhiropne poneko Yesus Kristus amik yalul aro seneraglamapti, wana yeng uro tibogto El yalulne sembe nang-nang alamap. 21 El yalulne poneko saeag mikipne wamla andarina, nia mangkina El umag nembahilul. Mikipne nenekoag agha nuri nong kon polbanepne nene El imang warero polbanep kom nong saog uro nembahileri, wendog nembahilul.