“Wana seneragna nhonog uro wamukap,” aro ambatsiogha
4
1 Nangkabo! Nanap nu Saelba Uhiropne ponekoap ma'aldalamnamne sembe haing sae kaupto kop aeag tobongkimneong. Ni yubu ambatsinne nene kilbi agha, nari a'un wenelamsinnena, Allahri a'un yopsiori, “Nari mabori undo unulamukang,” senenne sunsunum uro ul palamlulom. 2 A'undi ul palapmunne, sop-sop wana mamleba, nimiag win-win aropneog ulamsululom. Nimiri a'unag malinge ulamikpa wana pailangkalapmundi, malinge piptan koma o'ona seneldalamlulom. 3 Allah Yame Walingeri nu wana aingniro ma'alamsildi, nu wana nhon seneragtop nimi nenelamsil. Allah Yameri nu ma'alamsil ane sembe a'undi, “A'eptabeag,” aro wali uro yae uptangkamlulom. 4 Yame nhonog wamlari, nu ma'abahilne agha nong nhonog nembahiog. Eldi a'un yopsiogne sunsunum uro, “Nu amik wali wamukap,” aro tiro nang-nang aro seneraglamapne babe nhonog wamla. 5 Nu Saelba Uhiropne ot nhonog wamla. Nuri Elag sikne aro wana palilamapne, seneragna nhonog. Nu Kristusap ma'aptangkamapne sembe maghag pelengkipsinne saelba ulamapne anena nikne, nhonog wamla. 6 Nu ni sembe Nuni Allah ot nhonog wamlari, ni saelbamsildi, ni pere agha awe tolamlari, niag ua ulamla.7 Nu ni a'ero-a'ero wamap nimi sembe, Kristusti “Tatsinun,” senelamlange sunsunum uro nunag wana yorobahinneag agha tarelamsil. 8 Tarelamsilne nene sembe, anamag Allahri Yubu mome toro pairopne nhon wamlange ane.
“El alikin sirikag walelamogti, Elap mal tarop nimi agha
nimi sae haing kaupsirop nimi menangaro poa waelbahiogti,
mog so'oag nimiag walia-walia tarelamsiog,”
aro mome toro pibog.
9 “El waelbaog,” aro mome toro pibog tanena, anam waelban koma samen el mog so'o eneag kulukulaogti wamog. 10 El kulukulaogne poneko, El babe imag alibag alikin sirikag waelbaog. El undo waelbaogne nenekona, “Ni to'opto libahinun,” aro imag paliag waelbaog.
11 El mori, “Nimiag tatsinun,” senelamlari tarelamsilneag agha, nenne eldi wepto pogsirop nimi nenelamsildi, nenne Allah yubu silimu tiptop nimi nenelamsil. Nenne Allah yubu walinge pabiro ambatsirop nimi nenelamsildi, nenne nimi amohirop nimi nenelamsildi, nenne Eldi Elmabo paia uhirop nimi nenelamsil. 12 Eldi nimiag, “Awe tolamlulam,” aro undo tarelamsil andarina, nu Elmori wepsirop nimiri wero yebeldalameberi, nu Kristus nongag tangtop nimi taneko noro mikip taukap. 13 Eldi nunag tatsiropne sunsunum uro awe tolamebe paghabog, nu niri Allah Elme ponekoag wana paliro elap nimi pali wamapne pere agha, wana seneragna nhonog uro taukap. Nu Kristusti nongag wamap nimiag ni to'opto palilamsilne sunsunum uro, “Wana whi uro wamsebe,” aro wana seneragna nhonog uro wamukap.
14 Wana whi uro wamebe tanena, olog mabori limituk uro wamlori orolenange sik seneraglamloa saog uro yog nimiri yubu mo ka'ero saelbamukap kom. Orolenange nimiri amberelamsiang yubu sik senero neleptopne anena, khao phoalamlari, tara sip yomolbang tara sip yomolbang ulamla saog uro orolena yubu nelepto ka'elamang. Undo nelepto ka'elamangnena, mag kula'eptobari nimi kiliro opsilonga saog uro orolena yubu neneri ina selepne toman poa palamsiang. Aghana nu wana whi uro wamebe tanena, nimiri sindam nimi wana seneragtopneag agha, “Haing kumbahineri, yubu ambatsinenge nelepto ka'ebanukang,” aro ambatsiik yubu neneko saelban koma nen nelepto sik sembamukap kom. 15 Orolenange nelepto saelbamukap kom aghana, ot o'ona senehinneag agha yubu sikne mo saelbamukap. Yubu sikne mo saelbameberi, nia mangkina ul palamebengeag agha nuri usog Kristus ponekoap ma'aptangto wana khaptangkamukap. 16 Elap ma'aptangto El nongag tangtop nimi wamap. Nimi nongag yo'o kopkobap, yo'o luluagneap ni wali uro tiptangkamlari, usogap nhon tiptangkamla taneogna, nimi nong mikip talamlari nolamla. Nangkabo, a'un Kristus nongag tangtop nimi wamlomnena, Eldi awe tarelamsilne sunsunum uro yepto o'ona seneldalamebe tanena, El nong nolamloa saog uro Elag agha nubu talamukap.
“Samen ul piropne lilobi agha wendogne ul palamlulom,” aro ambatsiogha
17 Kristus nongag ma'aptangtop nimi wamap ane sembe, nu Saelbamsilne si kekhaekto wamapneag agha nari ambatnuahinne nene so'opto ambatnuahin. A'undi samen Allah ekon nimiri loba seneragtopneag agha ul palamangne saog uro ulamlum aghana, nen undo unulamlulom kom. 18 Sindi seneragna inibin wamsilba, wanaag ka'ebanep kom saog ane sembe sin ekondi, Allahri kamag nenehinne sinag tahinepne neneko a'eldalamang. 19 Wanaag ali sembanep komdi, sindi wanaag bobo walelamsilba, agto yaboho senenneog neleplamangdi, aboapti kelabo nengabo salik malik tekloldalamang.
20 Aghana a'unna, Allahri wepto poghogne Kristus el talom nimiri undo unuanep kom. 21 A'un sik uro el sembe ka'ebomdi saelbaom, te? Yesusti yubu ka'ebaomdi, elap ma'aptaomneag agha a'un amoro Yesusti yubu sikne sunsunum uro ambatsiong, te?
22 Sik uro a'un amoro ambarelamsiongnena, “A'undi samen, ‘Uahane,’ senenne nenekori a'un haing ubahiogti, ina malingeag poa palamsiogpa, a'undi wana loba nenelamsiog. A'un samen wamlumneap, samen ul palamlumneap kwiripto wail ibare agha liplulom,” aro ambatsiong. 23 Sindi babe a'unag, “Lipmunba a'undi wanaag seneragnange Allahri Yameri wendog nembahilul,” aro ambarelamsiong. 24 Nimi wendogne nembamsilnena, Elba Eldi, “Nimi wendogne sumbahineba, wana porogneap sikne Nari seneropne sunsunum uropneap mo sol wali uro ulamukang,” aro Allahri nimi wendogne nembamsil. “A'undi samen ul palamlumne kwiripto liapmunba, nimi wendogne nembamsilne sunsunum uropne agha a'un nongag wangaro ul palamsut,” aro amoro ambatsiong.
25 Undop pagha tanena, nu ni Kristusti nong nhonoghag nembahiog nimi wamap ane sembe, a'un ni orolenange libom agha, yubu sikne aghabog a'un mamun leldalapmundi uldalamlulom. 26 A'un wana yo senelapmunneag agha, malinge uaheng kom. Ik nhon sum wana yo sembamun tanena, heng anam purukan komag sumene agha wana yo senenne neneko liamlulom. 27 Wana yo senenne liapmun tanena, phia sikini neneko a'un nusamag wa'inebag kolo tatlulom kom. 28 Nimi haoghaba tohiropne wamle tanena, haogha toro ulamlenge neneko liplul. Nen haoghaba toplul kom aghana, eldi walinge agha sol wali uro saeri awe tolamle andarina, nimi kwema ulamsile nimi taneko yepto tarelamsilul.
29 A'un a'unkaboap yubu lelapmun tanena, loba nenehirop yubu a'undi pamag agha lepseng kom. A'un wana walingeag agha nimi eka'uk uropne kemelamsimundi, wana mikip nenelamsimundi, sunsunum urop yubuag agha a'un kaboag lelamlulom. Undo lelapmunne pere agha ka'elamik nimi wali taukang. 30 A'undi yubu lelapmunneri Allah El Mori Yame Walingeri wana ikin neneropne lepseng kom. Allahri Eldamne Yame Walinge nunag palilamsilneag agha “Naringe,” senenne kekneba pipsioba, El Yame nunag ya'ag wamle paghabog komopnag sum nu sae lopto taulbahilulne lag talul. 31 A'undi wanaag yonge meso punguropne to, nimiag wana yo senehinne to, nimiag wahinne to, a'undi wanaag ulamsile tanena lipsululom. Nimiag yubu maikno haum aro wahinneap, san tilipsinneap, nimiag korosekal nenehinneap ni lipsululom. 32 Undopne liapmundi, a'undi a'un-a'un wana walingeag agha yebeldalapmundi, a'un-a'un o'ona seneldalamlulom. A'undi samen malia ulamlum, aghana wene a'un Kristusap ma'aptalomne sembe Allahri a'unag wana yorolamsildi, opsin koma tam kom nembaog. Ane saog uro a'un-a'un wana yoroldalapmunneag agha a'un mamun tam piptan koma walia ulamsimundi ulamlulom.