Paulusti Yahudi sisa kom nimiag ambatsiropne sembe ambatsiogha
3
1 Ane sembe na, Paulus kop aeag tobongkimneeknena, Kristus Yesusti a'un Yahudi kom nimi wali nenehinne sembe ulamsiba, nimiri na sae kaupto kop aeag tobongkimneek.2 Allahri samen nanag wali tatneogne sembe ka'ebalum. Allahri a'un sembe, “Nari wana nimi sisa Yahudi kom nimiag yorolamsildi, talulamsinunne sembe ambatto tongolamsululam,” aro na Paulus saeag pibog. 3 Na saeag pibognena, samen tognoro wamogne nanag lag nenero tatneog. Tam nene sembe ologha olog tintinaple saog uro a'unag mome toro pimna. 4 Nari mome toro pimnange neneko mome kemelapmunne pere agha a'un babe el tanep. Samen Kristus sembe tognoro wamog yubu na wana hekaneong. Wana hekaneongpa, mome toro pimnange ipmundi a'un babe eltalulom. 5 Samenag tognoropne wamogne neneko samen mog so'oag wamek nimiag lag nenero ambareamsiog kom. Aghana wenena, Allah Yame Walingeri lag nenero El mori wepto pogsirop nangap, Elmori yubu silimu tiptop nimiabag lag nenero ambareamsil. 6 Tognoro wamogne nenekona ane. Yubu Walinge nene toman agha Yahudi kom nimi babe Allahri, “Nari mabo Yahudi nimiag walia uahinun,” senelamogti weroba tatsinepne neneko Yahudi kom nimiag babe tatsinep. Yahudi kom nimi babe Kristus Yesusap ma'aptangtop tanena, Yahudi nimiap nong nikne tanep. Ane sembe Allahri, “Tatsinun,” aro salag paliropne neneko sin Yahudi kom nimiag babe tatsinep. Tam nene samenag tognoro wamog aghana, wene lag tangto palamlange ane a'unag ambatsin.
7 Yubu walinge Kristus sembe anena, Allahri wana nanag yorobaneogneag agha, “Yubu ambatto yebel phululam,” aro awe tatneog. Na tatneogne nenekona, Allahri el mikipne na nongag pibogti, “Na mikipne pere agha ambatto tongolamsululam,” aro awe tatneog. 8 Awe nanag tatneognena, ora nimi Allahri wepsirop mabo nubu sirik nimi wamangbana, nana, na mo nimi ologne wamna. Ologne wamna aghana, Allahri wana nanag yorobaneogti, awe tatneog. Awe tatneognena, Kristus yubu enekori nimi tup nembahineba maikno sirikti, nimiri sumbanep kom aghana Eldina, “Yubu walinge eneko Yahudi sisa kom nimiag ambatto tongolamsululam,” aro nari saeag pibog. 9 Allah el nia mangkina sumbaogne ponekori samen, “Nimiag Nari wanaag agha walia uahinun,” senenne El mori el wamogpa, lag tan koma tognoro wamog senenne nenekona samen wamek nimiri ekon uro wamek. Tognoropne neneko ekon uro wamek aghana, wenena nari saeag pibog andarina, Allah wana waliri senenne neneko nimi niag tibin nenero ambarelamsin. 10 Samen tognoro wamogne wene Yesusag wana paliro ma'aptangtop nimi pere agha lag tangto palamla. Allahri yeng senelamognena, “Nari Yesusag wana paliro ma'aptangtop nimi pere agha ulamneba, imag mikipnang sumbahisingeap imag nubunang sumbahisingeap taneko whingag lag tale andarina, Na Allahri tam nia ni sembe wana hektopneag agha uanne el taukang,” sembaogti uaog. 11 Allahri undo unulamognena, nia mangkina anam sumban komag Elba Eldi, “Kom tanep komne uanun,” sembaogti undo unuao. Sembaogne nene sunsunum uro Kristus Yesus nu Saelbamsilne pere agha uaog. 12 Kristusag wana paliro seneraglamapne pere agha, Elap ma'aptangkamapne sembe Allah whingag poa yalamsilba, nu log kom uro wana sepsebek aro mololanep. 13 Nu Allah whingag mololanep ane sembe, “Sololamap,” sembaheng kom. Na wene a'un sembe seklelamnange sembe, a'undi, “Sololamap,” sembamunagti wana ikin aro seneragseng kom aro a'unag mololamsin. Na seklelamnange anena, “Nari a'un wali kiplamsin,” senelamnari seklelamna.
Paulusti Efesus nimi sembe Allahag molbatsiogha
14 Tam nene sembe Nuni Allah whingag nari yabu sanukto u amupto pulingkina kiplamna. 15 Elag agha nimi sisa ni wamangne, imag uropne babe, mog so'oag uropne babe, ni Elag agha mangaro likto palamlaba, El umag sisa nikne wamap. 16 Nari a'un sembe Allahag molona molbarelamsin andarina, wali-waliaba maikno El sae agha tupne wamlange sunsunum uro Allah El mori Yame Walinge pere agha mikipne a'unag pipsileri, a'undi wana mikip nenelamsilul. 17 Nari molbarelamsinne, wana mikip nenelamsile andarina, a'undi Kristusag wana paliro seneraglamlomneag agha Kristus a'un wanaag ua ulamlul. Kristus a'un wanaag wamleba, kal yareng pelengero pongolamlori, meptaloa saog uro a'un Kristus ponekori o'ona senehinneag ikto meptangkapmundi, mikip talamlulom. 18-19 Kristus ponekori o'ona senehinne mog so'oag nimiri seneragnep kom aghana, Eldi o'ona senehinne nubu sirik wamlange sembe a'undi el tahom senelamna. A'unap Allahri wepsirop mabo orange niap ma'aptangto o'ona senehinne nenekoag meptangkapmun taneogna, a'undi seneragnepti, “Kristusti o'ona senehinne nubu sirikti, wena undo, sabona undo, taina undo,” aro seneragto saelbapmundi, tapto el tanep. O'ona senehinneag meptangkapmundi, el talapmun andarina, Allahri nia a'unag, “To'opto tatsinun,” senelamlange sunsunum uro a'unag to'opto liptangkamlul. “Ni tam nene uro yaboho,” aro Allahag a'un sembe molbarelamsin.
20 Allahri El mikipneag agha nunag awe tolamla. Nuri wanaag seneraglamapti, “Ualulam,” aro Elag mololamap aghana, nuri molona phelekto Allah mikipneri uanepneog nunag maikno sirik awe tolamla. 21 Nunag awe tolamlange poneko paliag nenero kiplamukap. Kristus Yesus pereap nu Kristusag wana paliro ma'aptangtop nimi pereap Allah paliag nenero kiptoba lagtale. Nu nimi wamapneap, amik nimi wamikneapti Allah paliag nenero omeklameberiog wameberi wamebe paghabog ya'ag omeklamukap.
Sikne agha lemna.