“Teptop nimi saog wamubu aghana, Kristusap ma'aldalamapne sembe kamag nembahiog,” aro ambatsiogha
2
1 Samenag a'un wamlumne Allahri, “Uaheng kom,” aro irikto pibog yubu ingisapto irikna philamlumdi, malia ulamlum abeneko pere nimi teptop nimi saog uro wamlum. 2 A'un samenag wamlumnena, mog so'oag nimiri wene ul palamang sunsunum uro a'undi babe samenag nelepto ulamlum. A'undi nelepto ulamlumne nenena, mog so'oag urop mema mikipne im mombolag wamlangeri a'un saelbamsiogpa nelepto ulamlum. Im mombolag wamlange enekona, phia enekori wene babe nimi saelbamsilne pere agha Allah yubu ka'eban koma sik senelamang kom. 3 Samen nu ni wamubunge babe sin wene wamang saog uro ulamubu. Samen nu wamubunge nuba nuri seneragnari, “Uahane,” senenne agha ulamuburi, nu nongag bobo ulamsiogne sembe, “Agto yaboho,” senenneog ulamubu. Samenag nu wamuburi ulamubunge nene sembe, Allahri nimi mali ulamang nimi orange walamsilul saog uro, nu babe samenag waro opsinepne wamog. 4 Nu opsinep aghana, Nuni Allah wanaag agha yareag maikno senelamsilne ponekori nu o'ona maikno uro sembamsiog. 5 Nundam nimiri irikna philamuburi, Allah yubu ingisapto ulamubunge neneko agha nu nimi teptop nimi saog uro wamubu. Teptop saog wamubu aghana, Allahri nu o'ona sembamsiog ane sembe, Eldi wana nunag yorolamsilneag agha nu taulbahiog. Allahri wepto poghogne Kristus ponekoap ma'aptangkamubunge pere agha Allahri Kristus kamag nembamog saog uro nu babe kamag nembahiogti taulbahiog. 6 Nu Kristus Yesusap nhon ma'aptangkamapne sembe Allahri nu kamag nembahiogti towalengkahiogti, “Namabo tanuko Kristusap nhon pulingkukang,” aro nu pukitsiog. 7 Allahri nunag undo pukitsiogne nenena, Allahri wana nunag yororo seneraglamogti, “Nari nimiag walia phelektopne uahineri, Nari wepto pognenge Kristus Yesus pere agha yeplamsinun. Yeplamsineba, amik sum Nari wana yororopne agha ulamnange lag taleba, nimiri kembaikti, ya'ag el taukang,” aro Allahri nu pukitsiog. 8-9 Nuni Allahri nuri malia uroba sembe nu opsinep aghana, nunag wana yorolamsildi, a'un opsin koma taulbahiog. Taulbahiognena a'undam nimiri ulamlomne pere agha taulbahiog kom. Allahri a'un taulbahiognena a'undi Yesusag “Sikne” aro wana palilamlomne pere agha Elba Eldi wana waliri nu sembe, “Walia uahinun,” aro nu opsin koma taulbahiog. Ane sembe nimi nhondi babe, “Na mo walia uitna andarina, Allah whingag wali wamna,” aro omektangkamnep kom. 10 Nundam nimi omektangkamnep kom sennena, tam nene sembe. Nu walia ulamap tanena, nunag agha ulamap kom. Nunna Allahri nu taulbahiogti, “Wali-walia ulamukang,” aro nu wendog nimi nembahiogti, Kristus Yesusap ma'aptangtop nimi sumbahiogpa wamap. Samenag agha Allahrina, “Nari taulbahine nimi tanekori wali-walia aghabog ulamukang,” aro wero pibogti, nu taulbahiog.Kristus pere agha nu ma'abahiogne sembe ambatsiogha
11 Nangkabo, abene agha a'un samen wamlumne seneraglamsut. A'un nimi sisa Yahudi kom nimi wamlomba, Yahudi nimiri a'un sembe, “Kon teptop kom nimi,” alamsiek. Sin Yahudi nimi kon teptop nimi wamang nimiri a'un sembe “Kon teptop kom nimi,” alameknena, sin kekneltana nimi saeri nongag uropne sembe lelamek. 12 A'unna, Israel nimi wamlom kom ane sembe, Allahap Israel nimiap yubu nikne lebekneag agha Allahri salag pibogne neneko a'unag wamog kombana, mog so'o aneag mo wamlum. A'un mog so'oag wamlumnena, “Allahri wepto pogtopne Kristus ponekori taulbanelul,” aro seneragna koma Allahag wana palilamlum komdi, “Ya'ag wali tanun,” aro tiro nang-nangkanep kom. 13 Samen a'unap Allahap a'eptangto weag wamlum aghana wenena, a'un Kristus Yesusap ma'aldalamlom. Ane sembe, Kristus eneng lanaro tebaogne pere agha Ili Allah peramag a'un poa yahiog.
14-15 Kristus Eldamne nu mog so'oag nimi sembe ma'asinne wamla ane sembe, peramag poa yahiog. Nimi ma'asinne wamlari, nimi sisa Yahudi nimiap, sisa Yahudi kom nimiap nik nimi nenelamsil. Samen Musari aruksirop yubu Yahudi sisa nimiag ambarelamsiogti, “Undo unulapmundi, undo unuaheng kom,” aro iriktop yubu mome toro pibogne enekori leka wilniro irikto soro towalengkaloa saog uro uoag. Musari samenag iriktop yubu eneko mome toro pibogpa, nu Yahudi nimiap, Yahudi sisa kom nimiap aisa neneptangto wamubu. Aisa neneptangto wamubu aghana, iriktangtop yubu eneko Kristus ponekori el nong pere agha lubogti, aisa neneptangto uropne kwerekto nu ma'abahiog. Elba Eldi seneragtopnena, “Yahudi nimiap Yahudi kom nimiap mog so'o as nhonogne nimi wendogne taikti, Nanap ma'aptangtop nimi taukang,” aro iriktangto uropne neneko lubog. Undo unuaogne neneag agha Kristusti nu ma'abahiog. 16 Nu Yahudi nimiap, a'un Yahudi kom nimiap ma'abahiogti, “Ni phende nong nhonog taikti, Allahap ma'aptukang,” aro Kristus kalag sibekpa tebaog. Kalag sipto tebaogne pere agha nunap Allahap aisa neneptangto uropne kom nembahiogti ma'abahiog. 17 Ane sembe Kristus yaognena, Yubu Walinge nimi ma'abahinep yubu eneko weag urop nimiag babe, peramag urop nimiag babe ambarelahiog. Ambarelahiog nena, a'un Yahudi kom nimi a'un Allahap weag neneptangkamlum nimiag babe, Yahudi nimi Allahap peramag urop nimi babe, “Yubu Walinge nimi ma'abahinep yubu eneko ambatsinun,” aro yaog. 18 Yubu walinge nenekona, Kristus pere agha nu Yahudi nimi babe, a'un Yahudi kom nimi babe, ni phende Allah Yame Walinge nhonogti Nuni Allahag poa yalamsil. 19 Allah Yame Walingeri Kristus pere agha poa yalamsil tanena, a'un sekelanan nimi mo wamlom kom. Wenena a'un Allah Eldamneri wepsirop mabo taom ane sembe, Allahri nimi saelba uhirop nimiap nikag ngainang saog taom.
20 A'un Allah Elmabo nikag ma'aro palilamsilnena, ae soro kirik paia ubu solingkirop ae saog palilamsil. Kristus Yesus yangan kirik o'omne saog uro meptangkamlaba, Yesusti wepto pogsiog nangap, Allah yubu silimu tiptop nimiapti yubu yangaro ambarelamsiek. Sindi ambatsirop yubu eneko alibag a'un nimi babe paia ubu Allahri ae soro towalengelamloa saog uro o'oro palilamsil. 21 Kristus Yesus yangan kirik o'omne saog wamlaba, ni ae soroba aneko elag sunuro tipto o'olamla. Abene agha ae ni solingkirop ae aneko nu Saelbamsilne Elmori Mem Ae walinge waelba soldalamla. 22 A'un Kristusap tiptangkamlomne pere agha, Allah Yame Walingeri a'un mamun o'oro ma'alamsil andarina, Allah El mo a'undam nimi nusamag ya'ag ua ulamlul.