Efesus
Nimi Sembe
Paulusti Mome Toro Pibogne
Paulusti Efesus nimi kipsiogha
1
1 Nangkabo! Na Paulusti a'unag mome nene toro palilamna. A'un as soro kalurop as Efesus nimi agha Allahri a'un, “Nari Mabo taukang,” aro wepsiog nimi wamlom nimi kiplamsin. A'undi Yesus Kristus ponekoag sikne aro wana khapto palilamlomne pere agha Elap ma'aptaomdi, as Efesus wamlom nimi “Nangkabo,” aro kiplamsin. Yesus poneko sembe, Allahri el wepto “Nimi mog so'oag nimi talulamsimendi, saelbamsululam,” aro poghogpa, Yesus yaogne poneko sembe Kristus aro engero yabiog. Allahri wanaag yeng seneropneag agha Yesus Kristus ponekori na Paulus wepto, “Nari yubu ambatto tongolamsululam,” aro pogneogpa, a'unag mome toro palilamna.2 Nari a'un sembe Allahag molbarelamsinnena, “Nuni Allah nuringeap Yesus Kristus nu Saelba Uhiropne ponekoapti wana a'unag yororo walia ulamsirikti, a'un wana aingnilamsurukang,” senelamnari, molona molbarelamsin.
Nimiap Kristusap ma'aptangto uropne agha Allahri mikip nenehinne tatsinepne sembe Paulusti ambatsiogha
3 Nuni Allah omeklamapne ponekori Elme Yesus wepto, “Mog so'oag nimi taulbahimendi, saelbamsululam,” aro poghogne Kristus ponekori yubu sia lero nu saelbamsil. Nu Saelba Uhiropne Yesus Kristusap ma'aptangto wamapne sembe Ili Allah Imagne ponekori nunag wali-waliaba tarelamsiog. Sa'a-sa'ari nuri wana yame mikip nembahinep tanena, Ili Allah Imagne ponekori ni aneko nunag tarelamsiogba, nuri El paliag nenero omeklamap. 4 Nu Kristusap ma'aldalamapne sembe Allahri wali-waliaba tarelamsiog saog uro, anam im so'o sumban komag agha Allahri Kristus pere agha nu wepsiog. Nu wepsiognena, “Namabo taikti, malia uan koma nari senenne sunsunum uro ulamikti, sinag tam pimna koma Na whingag wali wamukang,” aro Allahri anam imap so'oap sumban komag agha nu wepsiog. 5 Allahri nu o'ona senelamsiogti, anamag Allahri Eldi wanaag “Uahane,” aro seneraglamogne agha, “Nari Name wepto pognunne Yesus Kristus ponekori sin taulbahilulne pere agha Nari mabo taukang,” aro nu wepsiog. 6 Elme wanaagne ponekoap ma'aptangto wamapne pere agha nunag babe wana yorobahinneag agha, “Na mabo,” senelamsiog. Ane sembe Eldi nunag wana yororo wepsiogne sembe nuri Allah paliag nenero omeklamap. 7-8 Elme nu sembe poghogne ponekona, tam nene sembe. Allahri nu mog so'oag nimiag, “Uaheng kom,” aro iriktop yubu ingisaplobubu. Eldi yubu ingisaplobubu aghana, Elme Yesus nu sembe eneng lanaro tebaogne pere agha tam wailag nenelamlari, nu taluro toro palilamsil. Eldi nu talulamsilnena, Allah wana hektopne poneko el wamogti, nunag wana yorolamsilneag agha o'ona maikno senelamsilne sunsunum uro Elme nu sembe nubu uro tatsiog. 9-10 Allahri samenag seneraglamogti, “Nia mangkina imap so'oabag wamlange Nari wepto pognenge Kristus poneko umag nembahineba saelbamsilulne wali,” aro seneraglamog. Allahri wanaag seneraglamogne nene samenag tognoro wamog aghana, wenena Allahri wana awi uro nunag lag nenero el nembahio. Amik Allahrina, “Wene Nari wepto pogtopne Kristus ponekori lag tangto nia mangkina saelbamsilul,” senen sumeneko sunuptaleba, Yesus Kristus poneko El mo usog tangom agha saelbamsileri, nia mangkina imap so'oabag uropne El umag wamlul.
11 Nu Kristusap ma'aldalamapnena, Allahri yum-yum samenag nu wepsiogne nene sembe, “Na Namabo taikpa, Kristusap nhon ma'aptangto wamukang,” aro wepsiog. Elba Eldi “Uanun,” senenne karepto pairoba sunsunum uro nia mangkina awe tolamla. 12 Allahri nu Yahudi nimi samenag wepsiognena, Kristus poneko anam ik selek sum yan komag, nu Yahudi nimirina, “Allahri wepto poglulne Kristus poneko yaho,” aro tibogto nang-nang alamubu. Nu Yahudi nimiri sam nang-nang alamubunge pere agha Allahrina, “Na Allah paliag nenero omeklamnukang,” aro nu wepsiog. 13 A'un Efesus nimiri babe yubu walinge Kristus ponekori a'un taulbahinepne sembe yubu sikne ka'ebalumdi, sikne aro Elag wana palilamlum. A'undi Kristus ponekoag sikne aro wana palilamlumne sembe Yesusti samenag salag lekto pibogne sunsunum uro Allahri Eldamne Yame Walinge a'unag pipsiog. Eldamne Yame Walinge a'unag palilamsiogne abeneko pere, “Kristusap ma'aptangtop nimi,” senenne kekneba a'unag pipsiog. 14 Allahri wene Eldamne Yame Walinge nunag tarelamsilne nenekona Allahrina, “Nari Yame mikipne sinag piamnange ibikpa, Nari sinag, ‘Amik Namaboag nen tipto tatsinun,’ aro salag pimnange babe sik sembaukang,” aro Allahri Eldamne Yame Walinge nunag tarelamsil. Allahri, “Nen tipto tatsinun,” seogne amik nu Elmabo nenelamsil nimi lag uro taluro toro pipsile sumeneko tatsileba, El si paliag nenero kiplameberi, omeklamukap.
Paulusti Efesus nimi sembe Allahag molbatsiogha
15-16 A'un babe Allahri Elmabo nembahiog ane sembe, nari ka'ebanoba, a'un Efesus nimi sembe yubu lelamongdi, “Nu Saelba Uhiropne Yesusag sikne aro wana palilamangdi, Allah Elmabo wepsiog mabo ni o'ona senelamsiang,” seongbana nari ka'ebano. Ka'ebanori, papna koma nari Allahag, “Naba Naniong, wali yepsilam,” aro kiplamna. Allah kiplamnari, a'un sembe ekon tan koma nari a'un sembe sop-sop Allahag molona molbarelamsin. 17 Nari Allahag moloro kiplamnangena, Allahri Elme wepto nu Saelba Uhiropne Yesus Kristus nu sembe poghatsiog ane sembe, Ili Allah paliag nenero kiplamukap. El kiplamnari, a'un sembe molona molbarelamsindi, “Nuni Allah, Andamne Yameri nimi wana hekahimendi, lag nembatsululam andarina, Efesus nimi tanekori Andi wana seneragna tapto el taukang,” aro sop-sop a'un sembe Allahag molbarelamsin. 18-19a Nari Allahag a'un sembe molbarelamsinnena, Allahri a'undi wana seneragna tibin nembahiso andarina, Allahap nunap pali wamapne sembe a'un el tahom. Allahri nu wepto, “Namabo taukang,” aro yoplamsilne pere agha nuri, “Amik Allahri nu Elmaboag maiknoro tatsileba, wali wamukap,” aro tibogto nang-nang alamap. Wene babe Allahri nu Yesusag wana palirop nimi sembe mikip phelektopne nunag to'opto palilamsilne nene nimiri sumbanep kom. Aghana nari Allahag molbarelamsindi, “Nani, Andi mikip phelektopne nunag palilamsilamneap, amik nunag wali-waliaba maiknoro tatsimenneap, kiptoba nunag uro yabinepneap, ‘Nubu sirik wamla,’ aro el taheng. Ane sembe Andi sindi wana seneragna tibin nembahisomba, el taheng,” aro a'un sembe molbarelamsin.
19b-20 Allahri nunag mikip phelektopne palilamsilne nenekoag agha samenag babe Eldi wepto poghogne Kristus poneko nimi teptobag agha kamag nembaog. Eldi mikip phelektopne neneag agha kamag nembaogti, imag agha kiliro tobogti, Allah Eldamneri sae sirik sip pukirog. Kristus poneko Eldamne Allahap lelero imag pukamdangti, nia mangkina saelbamdang. 21 Kristus puka urobag pukamlangena, alikin sirikag pukamlari saelbamla. Kristus ponekori nia mangkina salero puka urobag anena, mog so'oag uropne nhon babe sunurop komdi, Eldi nia mangkina salero puka urobag pukamnep kom. Mog so'oag urop mema mikipne ni aneko agha, mog so'oag saelba ulamsiangne babe, ni yubu sia lelamangne babe, mog so'o ngainge babe, mema nubunge si paliag towalengeropne babe, sunurop kom. Kristus el mori ni saelbamlari, alikin sirikag pukamla. Wene wamap ko'o eneag babe amik ko'oag babe, nubunge nhon Kristus sunuropne wamnep komdina, El mo paliag wamle paghabog wamlul. 22 Allahri Kristus poneko towalengkirogti, ni el saeag pibogti, nia mangkina Kristus yan mombolag nembahiog. Nimiri El Kristusag wana paliro winiptangtop nimi sembe, Allahrina Kristus ponekoag, “Sindi usog wapmendi, ni saelbamsululam,” aro towalengkirog. 23 Nuri Kristusag sikne aro wana palirop nimi wamapnena, Kristus nuri usog wamlaba, nunna Kristusti nong wamap. Kristus nuri usog wamlari, Eldi nia mangkina nunag to'opto palilamsildi, nia ni ul palamla.