Galatia 1

Galatia

Nimi Sembe

Paulusti Mome Toro Pibogne

Paulusti Galatia nimi kipsiogha

1-5 A'un Galatia so'oag wamlomdi ubu pilamlom nimi, nangkabo! Na Paulusap, nungkabo Yesusag wana palirop nimi nanap wamapne niapti a'un Yesusag wana paliro nikag winildalamlom nimi kiplamsiap. Kiplamsiapti a'un sembe molbarelamsiapnena, Nuni Allah nuringeap, Eldi nimi mog so'oag nimi “Taulbahileri Saelbamsilul,” aro wepto poghogne Kristus Yesus ponekoap, sin phende abenekoag a'un sembe molbarelamsiapti, “A'undi wana yorolamsilneag agha walia ulamsurumundi wana aingnilamsururom,” aro a'un Galatia nimi sembe molbarelamsiap.

Nu Saelba Uhiropne Yesus Kristus ponekona Nuni Allahri wepto poghogpa yaogpa, nimiri el ya'ag obek aghana, Nuni Allah ponekori el nen kamag nembaog. Yesus Kristus samenag tebaognena, Yesus Elba Eldi Nuni Allahri wanaag seneropne el uro wamogti, sunsunum uro yaog. Yesustina, “Mog so'oag nimi wene wamang nimiri sop-sop mali-malia ulamangne sembe sinag tam pipsileagti, sindi mali-malia uropne kom nembaneba, tam nene nanag taleba, sin sembe lunuro tebanun,” aro nu taulbahiog. Nuni Allahri Elme nu sembe pogto tatsiog ane sembe, El paliag nenero kiplameberi, ya'ag uro omeklamebe paghabog omeklamukap. Sikne agha saekag lebap.

Na Paulusti Allah Yubu ambatto tolongolamsinnena, nimiri na wepto towalengkaneek kom aghana, Yesus Kristusap El kamag nembaogne Nuni Allah ponekoapti na wepto pognerekpa, yubu ambarelamsin.

“Allah Yubu Walinge Yesus sembe ot yubu nhonog sikne wamla,” aro Paulusti ambatsiogha

6 Allahri Yesus Kristus wepto poghogne ponekori wana a'unag yororo uaogneag agha Nuni Allahri a'un yopsio. A'un yopsio aghana, nari a'un sembe, “Map yaghe,” senelamnangena, ko'o we uro pin koma a'unba a'un yopsionge poneko wail ibare agha lililamlomdi, yubu orange nelepto salelamlom. Yubu orange neleplamlom yubu nene nimiri, “Yubu walinge,” alamang aghana, 7 yubu sengkwanektopne agha a'unag ambarelamsiang. Allah Yubu walinge sik uropne nhonog wamla. Ot nhonog wamla aghana, nimi etpare anekori yubu walinge Yesus Kristus sembe sengkwanekto ambarelamsiangneag agha a'un wana seneragna samsamo lolamsiang. 8 Yesus Yubu Walinge nuri samenag a'unag ambatsibunge ot sikne agha ambatsiburi, yubu nene a'ero tanep kom. Nimi nhon nunag agha yalenge babe, imag agha yubu payalenge babe, nuri samenag yubu walinge Yesus sembe ambatsibu sunsunum urop kom yubu ambatsile tanena, Allahri nimi enekoag tam pelengkahoba, ya'ag seklero wamle paghabog wamlul. 9 Nuri irikto yubu lebubunge nen sap sarikto lemnun! Nimi nhondi babe yubu ambatsilengena, nuri a'unag wali yubu sikne Yesus sembe ambatsibuba, toro saelbalumne sunsunum urop kom yubu ambatsile tanena, Allahri nimi enekoag tam pelengkahoba, ya'ag seklero wamle paghabog wamlul.

10 Wene aro yubu lemnange nenena, wela sembalom? Nari lemnange, “Nimiri na wali sembaneikti maiplamnukang,” aro yubu lelamna to, “Allahri na wali sembanelul,” aro yubu lelamna to? Nari ulamnangena, “Allahri wali sembanelul,” aro ulamna. Ot naba, “Nimiri na wali sembanukang,” aro mo ulamsene tanena, na Yesus Kristus ponekoringe arukna sik uropne wamsene kom.

Allah Eldamneri Paulus wepto poghogha

11 Nangkabo, “A'un babe el uro wamsom,” aro tibin nenero ambatnuahin. Nari Yubu Walinge Yesus sembe ambarelamsinnena, nimiri lero ambatneropne agha ambarelamsin kom. 12 Na Yubu Walinge Yesus sembe el tahingena, nimi nhondi babe, “Yubu nene saelbamlulam,” aro ambatto el nembaneekpa, eltahi kom. Aghana Yesus Kristus El mori Yubu Walinge lomag uropne neneko lag nenero ambatneogne agha eltahi.

13-14 “Yesus Kristus El mori ambatneog,” sennena tam nene sembe. Na samenag anam Yesusag seneragna komag wamsinge sembe nimiri yubu na sembe lelameka ka'ebalumdi el wamlom. Na samenag Yahudi nimiri Allah yubu saelba ulamekti, ul palamekneag kas mi agha saelbamsiri ulamsi. Yahudi nimiri saelba ulamekne ul palamsiba, nanap nhon likubu ko'oag nangkabo wamekneap nanap sunsunum uro wamsi komdi, nari agha phelekto ulamsi. Phelekto ulamsiba, naniyabo Yahudi nimiri, “Nuri ul palamapne nene saelbamlulom,” aro amolamsiekne sik yeng uro ulamsi. Yahudi nimiri ul piropne kas mi agha saelba ulamsi aghana, Nari samenag Yesusag sikne aro wana pimna koma sin Yesusag wana paliro winiptangtop nimi sembe na wana yongeag agha, “ ‘Seklebaik,’ aro orog nembahinun,” senelamsisiri ulamsisi. 15-16 Undo senelamsisiri ulamsisi aghana, na anam mangaro yabin komag agha Allahri na sembe el wamogti, wana yorolamnelne agha wepto yopneog. Samenag agha na wepto yopneognena, Allahri na Paulus sembe, “Yahudi sisa kom nimiag Name Yesus sembe ambatsileba, yubu ambatsilenge pere agha Name Yesus sembe sin el taukang,” sembaog. Sembaog aghana, na mangkaneekpa hengkun taibuka taubuka yalamogha nari Yesusag seneragtop nimi yo uro ulamsisiba, Allahri na Paulus sembe senelamogti, “Name Yesus sumene Paulus whingag lag nembanun,” sembaog. “Sumene,” sembaog sumeneko Allah Elme nanag lag taogpa, Elag sikne aro seneragsi. Undo nanag lag taogne neneko sembe, “Nimiri nanag ‘Undo ulamlulam,’ aro ambatto wembanukang,” aro nimiag phi kom. 17 Yesusti wepto pogsiognang as kaluro sorop as Yerusalem anikoag wamek nimiag babe phi kom. Yesusti samenag wepto pogsiog nimi wamek aghana, amik Allah Elme na whingag lag taogpa, “Sin as Yerusalemnangap haiptaukap,” aro sinag babe phi kom. Sinag phi kom aghana, na Arab so'oag sip phi, tanena amik sum nen samoro as soro kalurop as Damsyik sip yahi.

18 As Damsyik yahiri, hengkun wilindi wamsia, “Nanap Petrusap haiptanemeri, nimi pali neneptanunam,” aro as Yerusalem waelbahi. Na Petrusap haiptanumua ik naual tara pareog nikag wamnumu, 19 aghana Yesusti wepto pogsiognang agha yogne haiptabu kom. Ot nu Saelba Uhiropne Yesus ilipsae taptopne Yakobus agha haiptanumu. 20 Nari momeag liro palilamnange nene orolenange agha palilamna kom. Nari a'unag ambarelamsinnena otsikne agha ambarelamsinne sembe Allah El mori ililamneldi el uro wamla. 21 Yerusalema palamsiri, Siria mog so'oag babe, Kilikia mog so'oag babe phi. 22 Undo wamsiri yabalamsinge Kristusap ma'aptangto winiptangtop nimi Yudea so'oag wamek nimiri pekto nari whing iamneek kom. 23 Nari whing pekto iamneek komdi, sin elwameknena nimiri lelamekti, “Samenag nu, ‘Seklebaukang,’ aro olamsiog nimi eneko wene, ‘Kom nembanun,’ aro ulamog yubu eneko salero sik senelamlari, yubu ambarelamsil,” alameka agha ka'elamekti elwamek. 24 Wene nanag uro yabiogne sembe wene alameka ka'elamekne agha sindi Allah omeklamek.