Allah whingag wana mombolag neneptangtopne sembe
4
1 A'un nimi mamun mal tangtopneap optangtopneap lag nembahinepne sembe seneragsut. A'un nimi mamun mal talamlomdi, oldalamlom nena, a'undam nimiri, “Nanag taho,” senenne wanaag agha kilim weanga ulamlomne sembe a'un mamun optangtopne lag talamla. Sikne agha lemna te? 2 A'undi wanaag, “Nanag taho,” senelamlom aghana, a'undi saeag orog. “Naringe taho,” aro nimi olamsilom, aghana a'undi salero tomnep kom. A'undi Allahag molban koma ulamlom ane sembe, a'undi saeag orog. 3 Mololamlomne babe, “Nadamne wana yeng seneropne agha topsene,” aro wana malingeag agha mololamlom ane sembe, a'unag tatsinepne saelbaneba salelamlom kom. 4 A'un Allah wail ibare agha urop nimi wamlom.a A'un ekon uro wamlom te? Mog so'oag nimiri ul piropne wana yeng uro sae tiptangto neleplamna tanena, Allahap sae tiptan koma aisa nenerop. Nimi etneri mog so'oag nimiri ul piropne nelepto sae tiptangka urop tanena, Allahap aisa neneptangtop nimi wamla. 5 Allah yubu mome toro pibekneag, Allahri Yame nunag ua ulamlangeri, “Naringe mo wamseng,” aro wana maikno uro senelamsil. Allah Yameri seneropne sembe mome toro pibek yubu ene, “Salik-malik uro mome toro pibek,” senelamlom te? 6 Aghana Allahri nen ma'aro wana yorolamsildi tarelamsilne poneko wamla. Allah Yubuag mome toro pibognena,“Metmereng arop nimiag Allahri aisa nenelamsil,
aghana wana mombolag urop nimiag wana yorolamsil,”
aro mome toro pibog.
7 Ane sembe, Allah umag neneldalamlulom. Phia sikini nenekoap aisa nenero khaplapmunba, a'un laplobi agha merero pilul. 8 “Allahap sae tiptangkamnunam,” aro Elag yamunba, El babe a'unag yalul. A'un malia urop nimiri malinge yagto sae wali neneldalamlulom. Wana phende senelamlom nimi a'undi wanaag malinge wa'epto, “Allahringe mo wamnun,” aro neneldalamlulom. 9 Malinge ulamlomne sembe haum alapmundi, amang piro engelamlulom. Wana awi uro og soro ulamlomne liapmundi, wana ikin uro amang piro engelamlulom. 10 Nu Saelba Uhiropne poneko whingag wana mombolag neneldalapmunba, a'un kiliro paliag nembahilul.
Elkae tangtop nimiag nimiri tam karepto pelengkanepne sembe
11 Nangkabo, a'un mamun san tilibildalamseng kom. A'un nimi etneri a'unkae san tiliplamlom to, a'unkaeag tam pelengelamlom to tanena, “O'ona seneldalamlulom,” aro aruksirop yubu babe mombolag nenero tam kareplamlomdi, yubu toraplamlom.b 12 Eldi aruksirop yubu lemnepti, tam karebanepne poneko ot nhonog wamlari, nimi yogne taulbahinepti, yogne kom nembahinep. Aghana ankae mombolag nenero tam pelengelamlam tanena, “Etne wamna,” senelamlamdi tam karepto ankaeag tam pelengkanep?
Nimiri eldamne maiptangto yubu lemnepne sembe
13 A'un maiptangtop nimiri ka'ebahut! A'undi yubu lelamlomdi, “Ambhum to, amni to as soro kalurop as nhonag agha nhonag piberi, hengkun nhon kamna kapto tolameberi, tup neneptaukap,” alamlom. 14 Wene aro yubu lelamlom aghana, ambhum uro yabinepne babe a'un ekon uro wamlom. A'un kamag uropne sembe seneraglamsut! A'un kamag wamnepne ibya saog wamlom. Ibya sesog sembe keknep aghana, ko'o olog wamleba, kom tanepneog wamla. A'un kamag uropne babe undo wamlom. 15 A'undam nimi maiptangto lemna koma a'undi yubu wali lelamnep nena, “Nu Saelba Uhiropne ponekori yeng sembaleba, nu kamag wameberi, awe ene to, awe nene to tol palamukap,” aro yubu lemnep. 16 Undo yubu lemnep aghana, wene a'undi metmereng aro a'undam nimi maibildalamlom. Metmereng aro yubu lanarop yubu ni lelamlomne eneko malinge lero ulamlom. 17 Ane sembe nimi etneri senelamlari, “Nari walinge ene uanep,” aro el wamna aghana, walinge nene uan koma lipla tanena, nimi enekori malinge ulamla.