Tup nimi wenehirop yubu
5
1 A'un tup nimi seneraglamsut! Seklenne a'unag uro yabinepne sembe haum aro engelamlulom. 2 Tup neneptangtoba a'un saeag wamlange polbanualba, a'un nongag ag wangaroba mapliogti tenual. 3 A'undinge leng-leng aroba emasap perakap taneko mombai kulubao. Mombai kulubaonge nenekori a'un kon telamsileri, a'un malia ulamlomne keknebalul. Keknebaleri, aukti terop saog uro telamsileba, a'un kon iki ulamsileba seklebalulom. Tup neneptangtoba komoptop sum sembe poloro winilamlom, te? 4 Kembahut! A'undi aweag toro yongorop nimiag kamna tatsisom aghana, sinag kamna tatsin koma tup neneptangtoba poloro pibomne taneko wamlari, malia ulamomne sembe nimiri haum arop saog uro kekneldalamla. A'undi aweag yongorop nimiri babe engero haum alameka Nuni Allah Mikip Sirikne ponekori aori ka'elamog. 5 A'un mog so'oag wamlomne teko wamna koma a'undi wanaag ot, “Yeng neneptahane,” seneropne agha ulamlom. Pham mesa yag pham nhondi, “Amik omnukang,” aro el wamna koma maiknoro telamloa saog uro a'undi maikno telamomdi, mesa yagne neneptaom. 6 Wana porog nimiag tam pelengelamsiomdi, ya'ag olamsiom. Olamsiomba, sindi a'un yubu toraplamsiong kom.Seklenag wana khapto wamnepne sembe
7 Ane sembe, nangkabo, wana palingkina Elag tipto seneraglapmun paghabog, amik nu Saelba Uhiropne poneko yalul. Awe wero merop nimi sembe seneraglamsut. Eldi aweag melamlori, “Amik pongoro wana maubaleba, kamna kapto tobaukang,” aro wana palilamlori, mag li samenneap amikneap tiro nang-nang alamlo. 8 Ane saog uro, a'undi babe wana khapto wamlulom. Nu Saelba Uhiropne poneko samoro yanepne peram wamla ane sembe, wana paliro tipto Elag seneraglamlulom. 9 Nangkabo, a'un mamun parog-parog arop yubu lelamseng kom andarina, tam pelengkahinepne a'unag talul kom. El tam karepto pelengkatsinepne poneko, “Yanun,” aro ina siramag sekamlari yanual. 10 Nangkabo, Allah yubu silimu tiplamek nimiri wana paliro ulamekne sembe seneraglapmundi, sunsunum uro ulamlulom. Sindi yubu tipto, “Nu Saelba Uhiropne si paliag talul,” aro ambarelamsiekne sembe seklelamekti, nen tipto wana palilamekti ambarelamsiek. 11 Sin papna koma wana paliro tipto ulamnep nimi maiplamsiapne sembe seneraglamsut. Ayub poneko samenag seklelamog aghana, papna koma tipto wana paliro ulamogne sembe ka'elamlom. Seklelamoghag wana paliro tipto ulamogpa, nu Saelba Uhiropne ponekori el sembe uirogne ka'elamlom.a Nu Saelba Uhiropne ponekori wana maikno uro yareag senelamsildi yeplamsil. 12 Apna ni yubu lelamnange agha o'omnena, a'undi yubu lelapmunne otsikne agha lelamlulom. Tam kemero karebatsile sumeneko Imagneri tam a'unag pipsileagti, a'undi yubu lero, “Orolena lelamnange toman agha imag wamlangeri omnelul,” aro yubu so'opto salag pipseng kom. Apna, “Mog so'oag wamlangeri omnelul,” aro babe yubu so'opto salag pipseng kom. “Sa'a-sa'a wamlangeri omnelul,” aro babe yubu so'opto salag pipseng kom. Ot a'undi wanaag, “Yo sik,” senelapmun nena, “Yo sik,” sululom. A'undi wanaag, “Kom,” senelapmun nena, “Kom,” sululom.
Allahag wana paliro molbanepne sembe
13 A'un nimi nhon wana ikin uro seklelamlam tanena, Allahag mololamlulam. A'un nimi nhon wana awi uro wamlam tanena, Allah omektop sepna seplamlulam. 14 A'un nimi nhon naiklamlam tanena, Kristusag wana paliro winiptangtop nimi wenehiropnang yopsimenba, an sembe Allahag molbatkukang. Naiktop nimi eneko molbarelamikti, zaitun wana lolterop mag pelaghi agha nu Saelba Uhiropne si yopto molbarelamukang.b 15 Allahag wana paliropne pere agha molbarelamikne enekori naiktop nimi eneko wali nembalul. Naiktop nimi enekori malia uropne wamsori, naikna ulamso tanena, malia uroba neneko nu Saelba Uhiropneri tam kom nenero wailag nembanepti, sekiro wali nembanep. 16 Ane sembe a'undi mali uropne lag phoro ambareldalapmundi, a'un mamun molbareldalamlulom andarina, a'un nongag naikna uropne wali nembalul. Wana porog nimiri molbatsiropne nenekona mikip sirikne wamlari, nimi yeplamsil.
17 Elia ponekona, nu mog so'oag nimi wamap saogne wamog. Elia ponekori wanaag agha, “Mag timban koma ebare mo wamlul,” aro molbaogti, hengkun wilindiap nen ma'aro wal no'opbareap talamogpa, mog so'o anekoag mag tinilamog kom. 18 Nen mololamogti, “Mag yalul,” aro mololamog andarina, imag agha mag tinilamogpa, mog so'o anekoag pongoroba sai lumlum aro pongolamogti, wana maulamog.
19-20 Nangkabo, a'un nimi nhondi sik senenne lilobi agha ekel ina palamnep. Ekel ina palamnep aghana, nimi nhondi nimi eneko samoro ina walinge toman payanep tanena, el wali nembanep. Tam nene sembe el uro wamlulom. Nimi etneri ekel ina pirop nimi samoro ina walinge toman payanep tanena, malia urop nimi payale nimi eneko tebanepneag agha taulbaleri, malia uroba maikno nikniro luplul.