Wenehirop yubu komoptopne pibogha
13
1 “Naro naipsae” aro nen tipto o'ona seneldalamlulom. 2 Nimi nhon-nhondi ekonneag agha sekelingirop nimi kiplamsiap senenne toman Allahri yubu poa yingkirop malaikat kipto topsiek. Ane sembe, sekelingirop nimi kipto tolamsimunne sembe ekon tan koma ulamlulom. 3 Sin haing sae kaupto kop aeag tobongkipsiek nimi taneko sembe a'undi wanaag, “Nanap nhon kop aeag haing sae kaupto wamap,” aro seneragto ulamsululom. Apna ora nimiri yog nimi malia ulamsiekpa, seklelamang nimi taneko sembe a'undi wanaag, “Nong nhonog wamnamdi seklelamnam,” aro seneragto ulamsululom.
4 Nengabo kelabo haogha torop nimiap, salik-malik waleptangtop nimiap Allahri tam karebatsileri pelengkatsilul. Ane sembe nengabo kelabo toptangtopne wali kiplapmundi, elkel ela'angeap maptangto uanepne, “Phibabeag,” aro yae uptangkamlulom. 5 Allahri yubu lelamogti,
“Ik nhon babe an laplopkenun komdi,
ik nhon babe liangkenun kom,”
seog. Ane sembe a'un saeag wamlange “Sunurop” aro seneraglapmundi a'undi, “Wana kal ma'alag palilamebeag,” aro yae uptangkamlulom. 6 “Lipkenun kom,” seog ane sembe nuri wana khapto lelamap nena,
“Nu Saelba Uhiropneri yeplamnelba,
mog so'oag nimiri nanag sa'a uanep?
Na log senelamnun kom,”
alamap.
7 A'un saelba uhiro Allah yubu ambatsirop nang sembe ekon tahin koma seneraglamlulom. Sindi Kristusag wana paliro ul palamekpa, wana mauro yabalamlange seneraglapmundi, nelepto ul palamlulom. 8 Yesus Kristus samenag wamogha sumene babe undo wamlari, amik babe undo wamle paghabog wamlul.
9 Nimiri a'erop yubu nhon-nhon ambarelamsinep. Aghana nimiri kwaneng tenepne iriksiropneag nelepto ul piropneri nimi wana mikip nenero yepsinep kom. Ot Allahri nunag wana yorolamsilne toman agha nuri wana khapto ulameberi, wali wamukap. Ane sembe, a'erop yubu ekel ina ambatsinep yubu enekoag kiliptangto neleplamsiseng kom. 10 Samenag Allahri mem ae kalun aeag yeplamsiek nangdi Allah sembe paliropneag agha toro telamek. Ot wenena, nu wali nembahinepne ponekori Eldamne Allah sembe piptaog. Allah sembe piptaogne neneko sin Allahri mem ae kalun aeag yeplamsiek nangdi saeag tanep kom.
11 Memnang sikini ponekori nimiri malia uropne sembe, “Allahri opsileag,” aro lebe aroba olamlari, eneng poa Memneri Memag wa'ina Allah sembe palilamla. Eneng poa wa'ilamla aghana, lebe aroba teptoba poa kalun ae kanero solingkiek asag agha lanalamangdi, paiag sip aukag tal palamang. 12 Ane sembe Yesus tebaogne babe, as kanero solingkiek leka ina toman nimiri Yesus poa lambaek. Yesus poa lambaekpa Eldi, “Nari eneng lanaro tebanenge toman agha Allah sembe wali nimi nembahinun,” aro paiag sip seklero tebaog.
13 Ane sembe kalun ae solingkiekne neneko laplobi agha, “Nimiri El san tilibaekne nunag babe tahile,” aro lamba Elag pukap. 14 Elag pukap nena, nuri ya'ag urop as taneag wamla kom aghana, amik uro yabilul as nang-nang aro tilamap.
15 Ane sembe Yesus pere agha El si lag phoro, “Ma'aptanam,” aro pamag agha lelamap yubu toman Allah sembe omektoba papna koma palilamukap. 16 Apna ora nimiag pogto walia ulamsiap nena, Allah sembe palilamneba Eldi wana yeng neneropne wamla. Ane sembe ora nimiag pogto tatsinepneap walia ulamsinepneap lilopseng kom.
17 A'un saelba uhiropnangdi yae paiamsiangdi, “Awe tolamapne ene amik Allahri tam karebatsilul,” aro a'un wali wamnepne tibarelamsiang. A'un yeplamsiangne ikin nembamun tanena, a'undam nimi sembe eraruk neneldalamnep. Ane sembe sindi yubu ka'elapmundi, “Nu yae paiamsiangne sembe wana yeng senelamukang,” aro sin umag neneldalamlulom.
18 Nuri wanaag, “Sa'a-sa'a ulamnepneag walingeog ulamsebe,” senelamap. Nuri sik senelamap nena, “Sikneog ulamap,” aro seneraglamap. Ane sembe, Allahag nu sembe molbarelamsululom. 19 Tam nubunge Allahag na sembe molbarelamnululom nena, “Na elem uro a'un nen haiptahabe,” senelamnaba, “Uro yabilul,” aro Allahag molbarelamnululom.
20 Nari a'un sembe nimi wana aingniro ma'asinne poneko Allahag molbarelamsin. Nu Saelba Uhiropne Yesus poneko pham domba wali uro yae paia uhiropne saog wamla. Samenag, “Allahap nimiap yubu nikne ya'ag uropne nembanun,” aro eneng lanaro tebaogneag agha nu paiamsilne nubunge taogpa, Allahri El teptopneag agha epto kamag nembaog. Kamag nembaogne ponekoag a'un sembe molbarelamsin nena, 21 “Eldi senenne sunsunum uro ulapmunne sembe a'unag teko uahinepne ni walinge wero tarelamsilul,” aro molbarelamsin. Nunag ulamsildi, Eldi haingag wana yeng nenelamnepne Yesus Kristus pere agha nunag ulamsilul. El paliag nenero kiplamebe paghabog ya'ag uro paliag nenero kiplamukap. Sikne agha lebap.
22 Nangkabo, olog yubu ene a'unag mome toro pimna ane sembe, “Nari wenehirop yubu ene saelbamlulom,” aro mololamsin.
23 A'un el tahom senelamnange, nungkae Timotius haing sae lobong. Elem uro nanag yaleba, elap nhon hale aro yanunam. 24 A'un saelba uhiropnang niap, Allahri wepsirop kelmabo me niap kipsululom. Sin Italya siba yaong nimiri a'un kiplamsiang.
25 A'un nimi niag Allahri wana yororo wali ulamsiso senelamna.
Abenda.