Allahri Eldi kelmabo me wenelamsinepne
12
1 Wene sin nimi taneko maikno sirik wamekti, sikne aro seneraglamekne neneko toa pololonga niknihirop saog uro nunag kanero niknilamsil. Sikne aro seneraglamekne nenekori nunag sikne ambatto el nenelamsil. Ane sembe Allahri nu sembe yarebatsiog ina toman wana khapto merero palamukap. “Wana khapto merelamukap,” aro ikinne ni pesa nembahinepne kwiripto laplolameberi, “Kekhaekeldalamebeag,” aro nuri malia uropne kom nenelamukap. 2 Nuri wana Allahag paliro sik senelamapne sembe Yesus alniro ina yarebatsiogne wamlari, ni komopto sunsunuptaogne wamla. Eldi wana amik yeng uanepne tiro wana khaplamogpa, El kalag sipto ali nenelamekne sembe log kom uro hae omnukang seog. Kamag taogti, Allahri saelba uhiro puka urobag sae sirik sip pul ingkiog. Ane sembe yogne kemban koma nuri Elag mo tilamukap. 3 Malia urop nimiri mikip uro El yubu toraplamekpa, wana khapto ulamog. A'un pesa talapmundi wanaag, “Sololamna,” sembamunag aro El wana khapto ulamogne sembe seneraglamlulom.4 A'undi, “Malinge luknubaukap,” aro kilim weanga ulamlomneag agha ora nimiri a'un ohiro eneng lanahirop koma wamlom. 5 Apna a'un ekon taom nena, nimi nhondi a'unag, “Nari mabo wembahineba seneraglamukang,” aro wenehirop yubu mome toro pibogne ekon taom. Mome toro pibog nena,
“Naba name, nu Saelba Uhiropne ponekori wenero el nembahinepne teba'en sembaheng kom.
Eldi mikip uro wenelangkelneag babe wana mali aro ‘Sololamnel,’ sembaheng kom.
6 ‘Sololamnel,’ sembaheng kom alamnangena, nu Saelba Uhiropneri o'ona sembamsil nimi wenero el nenelamsildi,
‘Nari kelmabo me,’ senelamsil nimi ni taepto wenelamsil,”
aro mome toro pibog.
7 Allahri a'un sembe, “Nari kelmabo me wana whi taukang,” aro wenelamsil. Ane sembe a'un seklelamlomag, “Nu el nenelamsil,” aro wana khapto ulamlulom. Tam nene sembe sunumna nhonna, ili nhondi me nhon el nenero wemban kom tanena, etneri me wamla sembanep. 8 Ane saog uro Nai ponekori a'un el nenero wembahiso kom tanena, “Anabiag me,” seneropne agha, “Nari mabo kom,” aro lilopsil sembanep. Aghana Eldi kelmabo me ni el nenero wenelamsil. 9 Mog so'o eneag babe naiyabo nangdi nu el nenero wenelamsiangba, sin kiplamsiap. Undop pagha tanena, Nuni nuri wana saelbamsilne poneko umag neneptanepneog wamap. El umag neneldalameberi kamag wamukap. 10 Nu el nenero wenehiropne nenekona, mog so'oag naiyabori sindi wanaag seneropne sunsunum uro sesog sembe nu el nenero wenelamsiek. Aghana Allahri nu wenelamsil nena, “Walingeog seneragto ulamna saog uro Nari kelmabo meri babe seneragto ulamikti, wali taukang,” aro el nenero wenelamsil. 11 Yo sik uro nimiri nu wenehiropne ka'eban sum agha nuri wana sapsinneag agha yeng senelamap kom. Aghana wenero el nenehirop yubu eneko nimi etneri ka'ero ul palamnari, mikip neneldalamna tanena, amik sum kamna elag wana maubanep. Kamna elag maubanep nena, wana porogneap wana aingnibahinepneap elag maubalul.
12 Ane sembe a'un yan pesangeap, sae pesangeap mikip neneldalamlulom. 13 Yan mali nimi ina walingeag agha lambaikag aro a'undi yan pinep ina aneko porog nembarelamsululom, andarina wali taukang.
“Allahri wana yororo senehiropne karong sembaheng kom,” aro wembahiogha
14 A'undi ulamlulom nena, “Nimi niap ma'aptangto wamseberi, Allahri senenne walingeog seneragto ulamsebe,” seneropneag nelepto ul palamlulom. Allahri senenne seneragto ul pinep kom nimi nu Saelba Uhiropne whingag yanep kom. 15 Allahri wana yororo tatsiogne nimiri saelbamnep aghana, nimi nhondi babe sae lipleag aro yae uptangkamlulom. Nimi nhon wana maliri, meso pungkanepne yareng selelep aro pongkanep saog uro nubu tangto pongkanep. Pongkaleri nimi maikno wanaag sembenga pimnep ane sembe, nimi nepsileag aro yae uptangkamlulom. 16 A'un nimi nhondi babe, “Wanaag bobonge agto yaboho,” aro kelabo nengabo salik-malik waleptaheng kom. Esau nenekona, Allahri senenne semban koma ik nhonog, “Tenaba tomnun,” aro nimi yandoa amik el saeag tanepne sae laplobog. Allahri senenne semban koma uaog saog uro ulamseng kom. 17 Esauri ulamogpa uro yabiogne sembe a'un el wamlom nena, amik sum Esau nenekori iliag, “Na yandonge mikip nenero kipnululam,” aro molbaogpa, kom seog. Kom seogpa, engero hail mag sapsabi nen iliag, “Mali uahinge nen uanun kom,” aro molbaog aghana, kom seog.
18 Wene a'un yingkina wamlomag ane, saeri po'obanep yim nhon auk pog tag-tag alamlangeag yingkina wamlom kom. Samen wamekag inibin sogmondo arobag, tuka'ag arobag, khao uanebag yingkina wamlom kom. 19-20 Samen wamekag nimi nhondi terompet pho anba, wa'in yubu lilim lanaropne ka'elamekti peramag yanep saog uro wene wamap kom. Samen Allahri yubu lilim lelamogha ka'ebaekti, sa'obanep kom wamek. Yubu lilim nenekori aruklamsiogti, “Lebe aroba nhon babe yim tamag po'ologle tanena, kirikti teploplulom,” aro arukahiog. Wene aro arukahiogpa sin logti, “Allahri nen nunag yubu piplul kom,” aro molbaek. 21 Sin whingag uro yabiogne nenekori log maikno nenelamsiogpa, Musa ponekori lelamogti, “Pet-pet aro log senelamna,” seog.
22 A'un yingkina wamlomag anena, Sion Mainag Allah kamag uropne ponekori Yerusalem imag soro kalurop as yingkina wamlom. Aneag Allah arukna imagnang malaikat teng-tengne yeng uro poloro winildalamang. 23 Wene yingkina wamlomag anena, nimi yando nimi winiptangto nimi si imag mome toptangtop nimi winiptangtobag wamlom. Wene nimi ni tam karebatsiogne poneko Allah yaghag yingkina wamlom. Sin samenag wana porog nimi tebaek aghana, wanaag sik senelameka sunsunum taogneag aneko yingkina wamlom. 24 Yingkina wamlomag anekona, wendog yubu nikne sunsunum uro Yesusti eneng yamoro ikogne toman agha Allah anabi nimi anabiag uro ma'alamsil. Samenag Habel enengdi nimi yubu leploa saog uro lebogha Allahri ka'ebaog, aghana Yesusti eneng enekori wali phelektopne yubu lelamla.
25 El yubu lelamlange poneko ka'elopmunag aro yae uptangkamlulom. Samenag mog so'oag yubu lero wenelamsiogpa ka'elobekpa opsiog. Mog so'oag wenero ambatsiropne ka'elobek nimi taneko Eldi opsiogne laniptaek kom pagha tanena, El imag agha kulukul aogne poneko wail ibarea libebeba, nu opsinepne laniptanep komneog wamla. 26 Samenag aneko Eldi yubu lilimdi mog so'o lologhaog. Agha wenena, yubu lero salag palilamogti, “Nen ik nhon lologhanun nena, ot mog so'o aghabog kom aghana, imap so'oap abeneko lologhanun,” seog. 27 “Nen ik nhon,” seogne neneko toman agha, “Sumbahinge lologlamneba kom talul,” aro lebog andarina, lologhanep komne mo ya'ag uro wamlul.
28-29 Undop pagha tanena Allahri nu wene saelba ulamsila lologhanep kom ane sembe, nuri wana Elag yororo kiplamukap. Nuni Allah omeklamapne ponekona, harep terop auk saog wamla. Ane sembe log senero Elag wana yororopneag agha nuri wana mombolag neneptangkameberi, Allahri wali senenne sunsunum uro omeklamukap.