3
1 Tam nene sembe seneraglamsut! Nuni Allahri nu sembe maiknoro o'ona senelamsil andarina, nu sembe, “Namabo,” aro si engero palilamsil. Ane sembe Allah Elmabo wamap. Mog so'oag nimiri Nuni Allah sembe sin ekon wamang ane sembe, nu Allah Elmabo wamapne babe ekon wamang. 2 Nangkabo, nari wanaag wamlom nimi, Allah Elmabo wamap. Elmabo wamap aghana, nu amik welaro wamukapne ane sembe anam lag nembareamsil komba wamap. Anam lag nembareamsil kom aghana, nu el uro wamapnena, El wamlange amik lag nembaleba ibukap. El wamlange ibukap ane sembe, nu babe El wamlange saog uro nembahileba wamukap aro el uro wamap. 3 El poneko ot walinge mo wamla ane sembe, nimi etneri, “Kristus wamlange saog tahane,” aro tiro nang-nangalamla tanena, nimi enekori, “Allah Elme wamna,” aro malinge el wanaag wamlange yag lanaro kologlolamlul.4 Nimi etneri malinge ulamla tanena, Allahri aruksirop yubu ingisaplamla. Malinge uropne neneko Allahri aruksirop yubu ingisaptopne wamla. 5 Aghana Kristus ponekori malia uropne orog. Ane sembe a'un el wamlomnena, Kristus lag taogne eneko, “Mog so'oag nimiri malia uroba lupnun,” aro yaog. 6 Nimi etne Elap ma'aptangtop tanena, malia uropne ul palamnep kom. Nimi etneri malia uropne ul palamla tanena, Kristusap haiptan koma Elap sae tiptangtop kom nimi wamla.
7 Namabo, tam nene sembe sengkwanektop yubu ambatsiikpa, a'un ekel ina nelebahiseng kom. Nimi nhondi wana porogneag agha ul palamla tanena, Kristus poneko wana porogne wamla saog uro nimi eneko babe wana porog nimi wamla. 8 Nimi nhondi malia uropne ul palamla tanena, samenag agha phia sikini nubunge nenekori malia ulamog saog uro, nimi enekori babe phia sikini nubunge nenekoringe seneropne ul palamla. Tam nene sembe Allah Elme lag taognena, “Phia sikini nubungeri ul piropne kom nembanun,” aro yaog. 9 Nimi etne ili Allahag agha mangaptangtop tanena, Allahri wana elme enekoag tangtop ane sembe, nimi enekori malia uropne ul palamnep kom. Nimi etne Allahag agha mangaptangtop tanena, nimi eneko malia uropne ul pinep komneog wamla. 10 Tam neneag agha Allah Elmaboap, Phia Sikini Nubunge Elmaboap lag neneptangtop. Nimi etneri wana porogneag agha ul pirop komdi, Yesusag wana palirop nimi o'ona senehirop kom tanena, nimi eneko Allahringe kom.
O'ona seneldalamukapne sembe
11 Samenag ka'ebalum yubu enekona, “O'ona seneldalamukap,” aro ambatsiogha ka'elamlum. 12 Kain nenekori phia malingeri senenne nelepto uaog saog uro uaheng kom. Kain nenekori sa'a sembe ilipsae ya'ag obog aro seneraglamsut! Kain nenekori ulamogne mali aghana, ilipsaeri wana porogne agha ulamog ane sembe, Kain nenekori ilipsae obog. 13 Nangkabo Yesusag wana palirop nimi wamlomne, mog so'oag nimiri a'un loba nimi senelamsiangne sembe lo'om seheng kom. 14 Nun teptop nimi wamubu aghana, wene kamag tangtop nimi wamap. Nunkabo Yesusag wana palirop nimi o'ona senelamsiapne nenekori nu el nenelamsilba, “Kamag nimi wamap,” aro el talamsil. Nimiri o'ona senehirop kom tanena, nimi eneko kamag tangtop komdi, teptopne wamla. 15 Nimi etneri elkae sembe aisa senerop tanena, nimi eneko nimi ohiropne wamla. Apna a'un el uro wamlomne, nimi ohirop nimiag ya'ag kamag uro unne neneko ua urop kom.
16 O'ona senehinne sembe nu el tabungena, Kristus ponekori nu o'ona sembahiogti, nu sembe Eldamne nong tatsiogti tebaog. Ane sembe nuri ulamukapneog wamlulnena, nungkabo Yesusag wana palirop nimi sembe, “Na tebahane babe kamag wamnange sin sembe yepsinun,” aro nuri yepsinepneog wamla. 17 Undop pagha tanena, mog so'oag nimi nhondi saeag teko uahinepne sembe weroba wamnep. El saeag wamnep aghana, elkae nhon Yesusag wana paliropne kamag wamnepne sembe teko urop. Teko urop aghana, sae agha urop nimi enekori wanaag agha yareag semban koma yeptop kom tanena, sae agha urop nimi eneko sembe, “Allahri o'ona senehinne nimi enekori wanaag ua ulamla,” senep te? Undo kom. 18 Namabo, o'ona senehinne nenena, ot pamag agha, “Nimi o'ona senelamsiap,” aro yubu mo lelamseng kom aghana, sikne agha tapto nimi o'ona senehinne ul palamukap.
19-20 Sik tapto o'ona senehinne ul palamebe tanena, “Sikne ponekoag agha mangaptaburi, Elmabo wamap,” aro el uro wamukap. “Elmabo wamap,” aro seneragtopneag agha El whingag log semban koma wana sepsebek uro wamukap. Nuri wanaag seneraglameberi, “Malinge ulamsiri ulamno,” aro seneragnep. Nuri wanaag undo seneragnep aghana, Nuni Allahri ni el wamlari, nubu phelektopne wamla, ane sembe log semban koma wana sepsebek uro wamukap.
21 Nangkabo, a'un nari wanaag wamlom nimi. Nuri wanaag tam lelekto seneraglamebe ina agha, “Nunag tam pimnepne orog wamla,” aro seneragnep tanena, nu wana sepsebek uro log kom uro Allah whingag wamukap. 22 Apna Allahri nunag, “Undo-undo unulamlulom,” aro ambatsiogne saelba ul palamapti, El wana yeng nenelamap. Ane sembe sa'a-sa'a Elag mololamapne tarelamsilba, toro salelamap. 23 Eldi nunag, “Ulamlulom,” aro ambatsiog nena, Allah Elme si paliagne, “Yesus Kristusag wana palilapmundi, a'un mamun o'ona seneldalamlulom,” aro ambatsiog. 24 Eldi, “Undo-undo unulamlulom,” aro ambatsiog yubu saelba ul pirop nimi sembe, Elap ma'aptangka ua ulamangba, El babe sinap ma'aptangto ua ulamla. El nunap ma'aptangto ua ulamlange sembe el uro wamapnena, Eldi Yame nunag tatsiogneag agha, “Nunap ma'aptangto ua ulamla,” aro el nenelamsil.