Yesusti Allahag molona moloropne sembe ambatsiogha
(Matius 6:9-15; 7:7-11)
11
1 Ik nhon sum Yesus eldi yubu ka'ero neleptopnangap nikag wamekpa, Yesusti Allahag molona mololamog. Allahag molona molbaogpa, elag neleptopne nhondi Yesusag lelamogti, “Nai, nu Saelbamsilamne. Yohanesti eldi yubu ka'ero neleptopnangag ambarelamsiori, ‘Allahag molona mololapmundi, undo-undo seneragto mololamlulom,’ aro ambatsio. Ane saog uro andi babe nunag ambatsululam te?” aro Yesusag molbaog.2 Wene aro molbaogpa, Yesusti sinag amoro ambarelamsiogti, “A'undi Allahag molona mololapmun tanena, undo aro mololamlulom.
‘Nuni Imagne,
An saog uro nhonne babe orogti, An si paliag nenero kiplangkeap.
Andi nu yubu sia lero saelbamsilamne mog so'oag nimi ni whingag lag nembatsisom.
3 Nuri sop-sop kwaneng telamukapne sunsunum uro tarelamsilulam.
4 Nimiri nunag malia ulamangne sembe nuri sae lilobi agha wailag nenelamsukap ane sembe,
nuri malia ulamapne sembe babe seneragna koma wailag nembahom.
Nu menangal pabalamsimendi, nu mipsinebag nu poa phiseng kom,’ alapmundi, Allahag molona mololamlulom,”
aro Yesusti yubu ka'ero neleptopnangag ambatsiog.
5 Wene aro ambahiogti, nen tipto sunumna nhon ambarelamsiogti, “A'un wamlom nimi abene agha nimi nhondi a'un kabori aeag ae inipna tomnusam pindi lelamnari, ‘Nangkae! Kwaneng roti wana wilindi tatnehom. 6 Nari nangkae inaag yalamlange neneko weneog, “Tektek papneri pinun,” aro aeag wa'alal. Wa'alalba nari el sembe kwaneng tatnaba, el tenne orogti, anag mololangken,’ aro wene senep.
7 Wene senep aghana, ankae anekori ae lomag agha yubu lemnepti, ‘Namaboap ina soptangka malamapti, nu kaombahiseng kom. Na pukneri tatkununne eka'ukti, yepkenep kom,’ aro lemnep.
8 Wene ae lomag nimiri, ‘Nangkae, eka'ukti yepkenep kom,’ aro lemnep aghana, Nari sik uro a'unag lelamnange, pukleri elag kwema aro molona moloropne sunsunum uro tatlul tiog. Nimi enekori pukleri, tatlenge sembe, nangkae senenne agha tatlul kom aghana, asag nimi anekori ali semban koma molom-molom alamsoba, malamlange poneko puksori, tatlul tiog.
9 Ane saog uro, nari a'unag lelamnange, a'undi Allahag mololapmunba tatsilul. Elapmunba ibatsilul. Ina siramag kaunguro yoplapmunba, ina kubatsilul. 10 Nimi etneri mololamle tanena, saeri toplul. Nimi etneri eltolamle tanena, haingdi iplul. Nimi etneri ina kaunguro yoplamle tanena, ina kuptalul.
11 Sunumnana undo. A'un tane wamlom nimi agha a'undam mabo nhondi mololamleri, ‘Naiong, ikan sop tatnemenba tenun,’ aro molbagheleba, paghae el saeag piplulam te? 12 Andam meri anag, ‘Naiong, winang wana tatnemenba tenun,’ aro molbagheleba, eldi saeag sang nhon piplulam te? 13 A'un mog so'oag nimi wanaag yo urop nimi aghana, a'un maboag, ‘Walinge agha tatsisebe,’ aro ulamlom. Undop agha tanena, a'un nimi etneri A'uni Imagne ponekoag molbapmun tanena, Allahri wana walinge aghabog wamlange ponekori, ‘Name,’ aro phelekto tarelamsileri, Eldamne Yame Walinge neneko tatsilul,” aro Yesusti eldi yubu ka'ero neleptopnang ambatsiog.
Nimiri, “Phia yonge sikini Beelzebul mikipne pere agha Yesusti phia yag lanalamsil,” seekne sembe Yesusti samoro ambatsiogha
(Matius 12:22-30; Markus 3:20-27)
14 Ik nhon sum Yesus wamoghag nimi nhon el kulomag phia pam kauptop phia nhon ua ulamog. Yesusti phia yonge nimi yubu lerop kom nimiag wamogne yag lanalamogpa, phia nimi enekoag wamogne lambaog abeneko nimi eneko yubu lelamog. Nimi eneko yubu lambaogti yubu lelamogpa, nimi wamek nimiri ibekti, “Map, mane agha ual,” aro lo'om seek. 15 Aghana nimi nenneri yubu lelamekti, “Phia sikini nubunge si Beelzebul nenekori Yesusag mikipne pibo andarina, eldi phia yag lanalamsil,” seek. 16 Sin nenneri wene alamekpa, nimi nenneri, “Yesus mibukap,” aro ulamekti, “Allah Imagne ponekori sik uro an pere agha ulamla tanena, kekneba nhon ualulam,” aro Yesusag ambarek.
17 Wene alamek aghana Yesusti sin nimi tanekori seneraglamekne el taogti, Yesusti nimi tanekoag yubu lelamogti, “Nimi nubungeri mog so'o nhon saelba ulamsisoba, mog so'o aneag wamang nimiri pogtangto mal talamseng tanena, nimi nhonog umag khapto wamna koma a'eptangto loba taheng. Ae lom nhon nimi babe mamun aisa neneptangkamna tanena, khapto wali uro wamnep kom. 18 A'undi na sembe lelamlomne, ‘Eldi phia yonge sikini nubunge Beelzebul nenekori mikipneag agha phia yonge yag lanalamsil,’ alamlom. Wene alamlom aghana, phia yonge sikini nubunge si nhon Satanas nenekori eldamne aisa neneptangto elkabo yag lanalamsisoba, sin leya peheng tanena, welaro el mikip uro khapto wamnep? 19 A'undi na sembe lelamlomne, ‘Phia yonge sikini nubunge Beelzebul nenekori mikipneag agha phia yag lanalamsil,’ alamlom. Undop pagha tanena, a'unag nelepsirop nimiri babe phia yag lanalamsiang nena, etneri mikipneag agha phia yag lanalamsiang? Hae, sindi ka'elamikpa, a'undi na sembe yubu lelamlomne yubu kiki telekto seneraglamikti, ‘Phia yonge sikini mikipneag agha phia yonge yag lambahinep kom,’ aro tam karebaukang. 20 Aghana Nari nimi kulomag agha phia yonge yag lanalamsinnena, Allahri sae mikipneag agha yag lanalamsin. Nari yubu lelamnange sembe, ‘Sik lepla,’ aro seneraglapmun tanena a'undi el uro talapmundi, ‘Wene Nuni Allahri yubu sia lero saelba uhiropne nunag lag tal,’ aro el talulom.
21-22 Phia yonge sikini nubunge neneko mikipne wamla. Sunumna nhon sumbatsinun. Mikipne nhondi yin salero seng enekahori, eldinge ae yae wamsoba, orangeri elenge aba taluro tomnep kom tanena, mikipne neneko aingniro wamnep. Mikipne nenekori, ‘Yin salero seng enekamnaba, orangeri na luknubanukang kom,’ aro aingniro wamnep. Ot nimi mikip phelektopne nhon elag wea yahori, oro luknubanep. Mikip phelektopne ponekori el aisa oro luknubongkia nia mal tananne togto topsori, mikipne nenekoringe wali-waliaba saeag agha ni taluro elkaboag pogsinep. 23 A'undi na sembe, ‘Phia sikiniri mikipneag agha yag lanalamsil,’ alamlomne wali uro seneragto ulamlulom. Nimi nanag sip tangtop kom tanena, na aisa nenerop. Nimi etneri nimi winihiro nanag sip poahirop kom tanena, nimi talup lanahirop,” aro Yesusti wenero ambatsiog.
Phia samoro nimi kulomag wa'alingkiropne sembe Yesusti ambatsiogha
(Matius 12:43-45)
24 Yesusti nen tipto ambarelamsiogti, “Phia yonge nhondi nimi kulomag agha la'amba pirop tanena, phia aneko mektop so'oag pang-yang uro tek-tek papto wamnebag sembe el urop. Kanero pirop aghana el wamnebag olog imnep kom tanena, eldi sembanepnena, ‘Na nen samoro samen ae wamnoag aneko wa'al pinun,’ senep.
25 Wene aro leropti, samoro yingkina kembiag agha ae aneko sembenga po'oro wali uro togto ketkeroba irop. 26 Wali uro togto ketkeroba kolo iropti, phia samne olog yo aghana nen samoro pina phia saekbare yo sirikne eldi enero poa wa'alahinep. Poa wa'alahiropti, sin nimi eneko kulomag wamnep. Nimi eneko kulomag ua urop tanena, nimi el samenag wamnepne olog mali aghana, sin wa'iro ua urop tanena, ya'ag mali sirik tanep,” aro ambatsiog.
“Etne awi wamlul,” aro Yesusti ambatsiogha
27 Yesusti wene aro ambatsiogpa, kel nhon nimi maikno wamekne nusamag agha yubu lelamogti, “An mangkagheogti maum timbagheog kel ene wali kel wana yeng uro wamle alamna,” aro wene seog.
28 Wene seog aghana, Yesusti samoro kelenekoag yubu lelamogti, “Na mangkaneogti maum timbaneog kel ene yeng uro wamnep aghana, nimi etneri Allah yubu wali uro ka'ebaikti saelba ulamik tanena, nimi tane yeng sirik uro wamukang,” aro kelenekoag wene seog.
Nimiri Yesusag, “Kekneba nhon ualulam,” seekne sembe Yesusti wembahiogha
(Matius 12:38-42; Markus 8:12)
29 Nimi maiknori Yesusag kemero longolamekpa, Yesusti alniro yubu ambarelamsiogti, “Nimi wene ko'o ene likto palamlange yo sirik nimi wamang. Sindi Nanag molbaneangne, ‘Andi “Allahri an pere agha ulamla” senenne kekneba uamen andarina, nuri Anag seneraglamukap,’ alamang. ‘Kekneba ualulam,’ alamang aghana, undo unuanun kom. Ot sin whingag uro yabileba, el nembahinepne nhonog wamlulnena, Allah silimu yubu tiptopne Yunusag uro yabiogne saog uro sin whingag uro yabileba, sin el nembahinep kekneba talul. 30 Yunus ponekoag uro yabiognena, mog so'o Niniwe nimiri whingag uro yabiogpa, sindi el sembe, ‘Imagne ponekori el pere agha ulamla,’ aro el tanep. Ane saog uro na nimi mog so'oag nimi tahinge nanag undo uro yabile tanena, ko'o wene wamlom nimi sembe, ‘Allahri el pere agha ulamla,’ senenne kekneba kembamundi, el tanep. 31 Samenag weag mog so'o Syeba nimi sembe yubu sia lerop kel enekori, ‘Israel nimi sembe yubu sia lenne Solomo kemel pineri, eldi wana hekahinep yubu ka'eamnun,’ aro im so'o tiptobag agha elag yaog. Solomo samenag wana hekahiropne wamogpa, wene el phelektopne nubunge nhon ane wamla aghana, a'un tane wamlom nimi ka'elamlom kom. Ane sembe Allahri ni tam kemero kareptop sumeneko Allah whingag sekapmunba, Syeba nimi sembe yubu sia lerop kel enekori a'un Yahudi nimiag tam palilamleri, ‘El nimi nubu sirikne ponekori yubu teba'en sembaek,’ aro a'unag tam piplul. 32 Sin Niniwe so'oag wamek nimiri babe Yunusti Allah yubu ambatsiog yubu ka'ebaekti, sindi malia uroba sae lilobi agha Allahri senenne saelbamek. Yunusti yubu ka'ebaekpa, wene Yunus phelektopne nubunge nhon wamla aghana, a'un wamlom nimiri ka'elamlom kom. Ane sembe, Allahri ni tam kemero kareptop sumeneko Allah whingag sekapmunba, Niniwe so'oag wamek nimiri a'un Yahudi nimiag tam palilamikti, ‘El nimi nubu sirikne ponekori yubu teba'en sembaek,’ aro a'unag tam pibukang,” aro Yesusti ambatsiog.
Nimi nongag tibinne sembe Yesusti ambatsiogha
(Matius 5:15; 6:22-23)
33 Yesusti tipto lelamogti, “Nimiri whea timbom agha tognorobag palilamlong komdi, kau agha niknilamlong kom. Nimi nhondi whea timbom agha elba whea tinina yan iktoba anekoag meamle andarina, nimi ni ae lomag wa'ilamik nimiri tibin aneko imnep. 34 A'undi haing wana wamlangena, a'un nong ningki kemeltananne sembe haing whea saogne wamla. A'un wana nong ningki aneko tibin sirik tanena, a'undi haing aneko toa maruklamla saogne wamna kom. Aghana a'un wana nong ningki aneko inibin sog mondo urop tanena, haing whea saogne neneko toa maruklamla saogne maruktop. 35 Ane sembe, tibinne a'undi wanaag wamlange neneko inibin taleagti, wali uro tibin aneko yae wamlulom. 36 Wanaag agha seneraglamlomne ni aneko inibin tan koma tibin sirik wamle tanena, a'undi seneraglamlomne ni aneko tibin whea wareropne saogne tibin warebatsilul,” aro ambatsiog.
Musa yubu ambatsiropnangap Farisi nimiap abenekori ulamekne sembe Yesusti wenehirop yubu ambatsiogha
(Matius 23:1-36; Markus 12:38-40; Lukas 20:45-47)
37 Yesusti nimi yubu ambatsiogti wamogpa, Farisinge nhondi, “Nari aeag kwaneng nhon tununam,” aro enero yobog. Enero yobogpa, Yesus Farisinge ponekori aeag wa'iogti, kwaneng kwaria alibag piroba anekoag pukog. 38 Ae lomag wa'ina pukogti, kwaneng ten uaog. Kwaneng ten uaogpa, Farisi nimi enekori, “Nu Farisi nimiri kwaneng anam ten komag sae maghag a'elero ulamap saog uro Yesusti sae a'elban koma kwaneng ten ual,” aro lo'om seog.
39 Farisinge ponekori wene senelamogne nu Saelba Uhiropne Yesus samenag eltaogti, Farisinge ponekoag yubu lelamogti, “A'un Farisi nimiri ulamlomne sembe sunumna undo. Nimiri mag ma'i lomag sip kwaneng magap inginag a'elban koma, ‘Nimiri ibaukang,’ aro paiag sip a'elerop saog uro ulamlom. A'undi sae a'elelamlom aghana, a'undi wanaag yongeap aboabaap to'opto wamlaba ulamlom. 40 A'un Farisi nimi limituk nimi wamlom! Eldi nimi sumbahiog ponekori nimi kulomag sip babe, nimi konag sip babe ni phende sumbahiog kom te? 41 Ane sembe, a'undi wanaag agha kulomag yareag sembamsimundi, saeag agha orog nimiag tarelamsimun tanena, kulomag sip babe konag sip babe ni phende Allah whingag wali uro a'elerop talul.
42 A'un Farisi nimi seklero wamlulom! A'undi Allahag tarelamlomnena, ni kwaneng yona ologne babe a'undi saeag agha pogto palu sa'obare neneptan tanena, supnabare a'undamne sembe piamlom aghana, sa'onge Allah sembe wali palilamlom. Aghana, Allahri ulalulom senenne o'omne lia ulamlom. A'undi Allah sembe wanaag agha o'ona senelom komdi, nimi wali wamnepne sembe tam sik uro kemero kareplamlom kom. Tam o'omne abeneko senelamlom komdiog, Allah sembe saeri palilamlom. Kwaneng yona ologha ane palilamsomne babe wali, aghana o'ona senehinneap tam sik uro karebahinneap seneragna koma ulamlomne a'undi unuaheng komdi seklebalulom.
43 A'un Farisi nimi seklelamlulom! A'undi yeng senero ulamlomnena, nimi poloro Allah yubu lerop aeag, ‘Nimi nubunang purobag aghabog pukamsene,’ aro pulamlom. A'undi nimiri pail wa'ina torobag wa'alamlomdi, ‘Wali sembanehengdi, kipneheng,’ aro nimi whing toman pang yang ulamlom. Ane sembe a'un amik seklelamlulom.
44 A'un Farisi nimi seklelamlulom! A'un wamlomnena, nimiri kekneba pimna koma nimi teptoba so'oag siktoba saog wamlom. Nimiri nimi teptoba so'oag siktoba ane phibom agha ekonpog sembenga song malia Allah whingag pabinep. A'undi malia ulamlomne nimiri babe ekonne agha neleplamsiangdi, Allah whingag malia ulamang. Ane sembe a'un amik seklelamlulom,” aro Yesusti ambatsiog.
45 Wene seogpa, Musari aruksirop yubu elne amohiropne nhondi Yesusag samoro yubu lelamogti, “Nai, nimiag yubu amolamsilamne. Ot andi wene selamneag agha nu Musa yubu amolamsiap nang babe san tiliplamsilam,” seog.
46 Wene seogpa, Yesusti sikinag yubu lelamogti, “A'un Musari aruksirop yubu amohiropnang babe seklelamlulom! A'undi ikinne poa pinep kom saog ikinne nimiag pobitlamsiloa saog uro ulamlom. A'undi ikinne sinag pobitlamsilomdiog, ‘Keyagman uropne olog yepto pabinun,’ semban koma ologha babe sin yeplamsilom kom. Ane sembe a'un babe seklelamlulom.
47 A'un Musari aruksirop yubu amohiropnang seklelamlulom! A'undi Allah silimu yubu tiptop nimi tebaekne sembe ‘Kipsukap,’ aro sin teptoba so'o siktoba alibag ae solamlom. Undo ae solamlomdiog, a'un isagyabori Allah silimu yubu tiptopnang aneko olamsiek. 48 A'unisagyabori Allah silimu yubu tiptopnang olamsiekpa, a'un mori, ‘Sin teptoba kibukap,’ aro ae solamlom. ‘Kibukap,’ aro ae solamlom aghana, a'undi tapto ulamlomnena, ‘Nunisagyabori sin olamsiekne sembe nu babe wali saekag wamap,’ aro kekneba nenelamlom.
49 Ane sembe Allah wana hektopne ponekori anamag el uro yubu lelamogti, ‘Nari silimu yubu tipto lelamik nimi babe, nari wepto pogsine nimi babe Nari wepto Israel nimiag poglamsinun. Sin poglamsineba, nari pogsine nimi nenne Israel nimiri ‘Seklebaik,’ aro ulamsiikti, nenne ya'ag olamsukang,’ sembaogti pogsiog. 50-51 Pogsiogpa a'unisagyabori olamsiekne sembe, Allahri a'un wene wamlom nimiag tam nene pipsilul. Allahri imap so'oap sumbaog sumag agha wene babe Allah silimu yubu tiptop nimiri lelamlong. Adam elme Habel yum-yum samenag ya'ag obogneag agha, amik sum Zakharia poneko Allahri Mem Ae aramag obekne babe, a'un wene wamlom nimiag Allahri tam nene pipsileri, ‘Nari nimi ni opsiekne lumbanun,’ aro a'unag lumbahilul. Zakharia poneko Allahri Mem Ae aramag obekne, Allah sembe pail pirobag anabi, Allahri Mem Ae anabiag wamogpa obek. Nari a'un ambarelamsinne, Allah yubu tiptop nimi ni olamsiekne a'un wene wamlom nimiag Allahri lumbahilul.
52 A'un Musa aruksirop yubu amohiropnang seklelamlulom! A'un mo el wamsomdiog, Allahri nimi yubu sikne porog ina aneko toman yabihom. Aghana a'undamne porog ina ane wa'in koma nimi orange babe, ‘Wa'iseng kom,’ aro iriklamsilom. Ane sembe a'un seklelamlulom,” aro Yesusti ambatsiog.
53-54 Wene aro ambatsiogti Yesus anekoa piogpa, Farisi nimiap Musa aruksirop yubu amohiropnangap tanekori alnibaekti, “Yesusag monag aluktop yubu maikno haibabeba, Yesusti yubu malinge leplea agha el luknubaukap,” aro wea ulamek.