“Allahri yubu tipto ambarelamsin,” aro orolenange ambatsirop nimi sembe ambatsiogha
2
Ot sin samenag wamek nimi tanekoag nimi nhon-nhondi,
“Allahri ambatneog yubu silimu tipto ambarelamsin,”
aro orolenange ambarelamsiek.
Ane saog uro a'un nusamag babe orolenange ambatsirop nimi wamnep.
Sin orolenange ambatsirop nimi tanekori a'un nusamag ma'ap tandi,
loba nenehirop yubu ekel ina pabahinep yubu ambarelamsukang.
Nu Saelba Uhiropne sin sembe kamna top taogne poneko babe wailag nenero yubu ambarelamsiikne toman agha sindam nimi elem uro loba nenep tanepne apto aukang.
2 Sin nimi tanekori,
“Wanaag bobonge agto yaboho,”
senenneag agha ulamikpa,
nimi maiknori sinag nelepto ekel ina ul palamukang.
Undo ul palamikne toman agha ina sikne neneko sembe nimiri san tiliplamukang.
3 Sin orolenange ambatsirop nimi tanekori aboap sembe kom nebatsirop saog yubuag agha ambarelamsukang.
Sindi undo unulamnepne sembe samenag agha tam kareptopne ponekori sinag pelengkanepne wero pibogpa,
angap tanep komdi,
sin loba nembahinepne poneko marop komne wamla.
4 Sinag tam pelengkatsinepneog wamlangena undo.
Allahri arukna imagnang malaikat pogtopne tanekori malia ulameka sembe Allahri lipsin koma haing sae kaupto selenga inibinneag pelengelopsiogti,
“Ikinne sinag pelengkanun,”
aro yae paia ulamsil.a
5 Sin samenag mog so'oag wamek nimiri babe Allahri senenne ingisaplolameka sembe Allahri lipsin koma mag pelengkaogpa,
nikniro opsiog.
Aghana Nuh ponekona,
wana porogneag agha yubu ambarelamsiogne wamogpa,
elap ma'aro sin nimi linbare wamekpa,
Allahri yae wali uro paiamsiog.b
6 Apna as Sodom nimiap as Gomora nimiap sembe tam karebaogti,
auk pog pelengero kom nembahiog.
Kom nembahiogne abeneko pere Allahri senenne ingisaplorop nimiag uro yabinepne sembe sunumna lag nembatsiog.c
7-8 Ot wana porogne nhon Lot poneko sin nusamag ua ulamog.
Sin nusamag wamogpa,
sin nimi tanekori salik-malika lero ulamekne sop-sop ka'elamogti,
ililamsiogne toman eldi wana porogne ikin talamog.
Sindi wanaag,
“Bobonge agto yaboho,”
senenne agha salik-malika ulamekne sembe wana porogne Lot poneko seklebaog aghana,
Allahri taluro pibog.d
9 Nu Saelba Uhiropneri seneropne sunsunum uro ul pirop nimi eraruk urobag agha taulbahinepne ekon tan koma wamla.
Aghana sin wana sengkwanektop nimi sembe tam karebatsinepne el uro wamlari,
“Tam karebatsinep sum agha sinag ikinne pelengkatsinun,”
aro yae paiamsil.
10 Eldi tam karepto pelengkatsinep nimi ekon tanep kom nimina,
“Nari nong yeng neneropne uahane,”
aro sindam nimi sembenga kalup tanepneag neleptop nimiap,
sin saelba uhirop nimi sembe teba'en senehirop nimiap,
sinag babe tam pelengkatsinepneog wamla.
Undop nimina,
ali semban koma metmereng arop nimi wamangdi,
log kom uro Allahri imang wareroba tatsiog nang san tiliplamsiang.e
11 San tilipto yubu lelamsiangne neneko imagnang malaikatti babe nu Saelba Uhiropne whingag undo tam pelengero san tilipsirop yubu poa ambatnep kom.
Allah arukna malaikat mikip phelekto wamang aghana,
nimi tanekori Allahri imang wareroba tatsiog nang san tiliplamsiang saog uro malaikatti babe log kom uro yubu lelamang kom.
12 Sin nimi tanekori seneragna koma sin ekonneag agha san tiliplamsiang.
Sindi wanari,
“Uahane,”
seneropne agha pai phamdi wanaag seneragtop komne saog uro ulamang.
Pai pham mangap tanba,
nimiri salero omnep saog uro,
sin nimi taneko babe salero opsinba,
loba tanepneog wamang.
13 Sindi malia ulamsiekne lunuro mali nembahilul.
Sindam nimi nong yeng nenep tanep nena,
wana yeng uro tognop tan koma yo'obi sese ulamang.
A'unap nhon sani telamlom abeneko pere sin nenek salero ulamangdi,
yeng uro ali nenep tanepneap,
sembenga kalup tanepneap ulamang.
14 Sin nimi taneko,
“Ora nimiri kelabo haogha topsisene,”
senerop kelabo tanekoag haingdi keme nenelamsiangdi,
papna koma sop-sop malia ulamang.
Wana khaptop kom nimi wana kiliro malingeag nenelamsiang.
Sindi wanaag aboapti,
“Topsene,”
senenne mikip nenelamang.
Sin loba nenero yo'obahinep nimi agha wamang.
15 Porog ina laplobi agha ekel ina ul palamang.
Beor elme Bileam ponekori samenag kamna yeng senenneag agha malinge ul piog saog uro sindi babe ekel ina ul palamang.
16 Bileam ponekona,
Allahri yubu silimu tiptopne wamog aghana,
Allahri irikna pibogne phiro ul pinuaog.
Palamoghag aneko eldi aba poa pinep pham keledai aneko nimi saog uro yubu lemnep kom pham eldi pabalamog.
Pabalamogti,
“Nenek salerop nimiri uanepne saog uro Bileamdi ualeag,”
aro pham keledai enekori nimiri yubu leploa saog uro yubu lebogti,
irikto wembaog.f
17 Sin nimi taneko mag lu mektopne saog wamang.
Khaori poa urop iba saog wamang.
Sin sembe inibin sogmondo arobag kolo weroba wamla.
18 Sin nimi tanekori yubu kamolange metmereng arop yubu lelamang.
Ora nimi selep ina agha weneog lamba yananba,
kamolange ambatsirop nimi tanekori wana tolamsiangdi,
“Wanaag bobonge agto yabohoba,
nundam nimi nong yeng neneropne uahabe,”
aro malingeag nenelamsiang.
19 Sa'a-sa'ari nimi nhon luknubanep tanena,
el luknubanepne umag arukna tangtop nimi wamla.
Ane sembe,
sin orolenange ambatsirop nimi tanekori polbanepneag nelepto arukna nenep taong.
Arukna nenep taong aghana ora nimiag,
“Mo sektop nimi talulom,”
aro salag lero ambarelamsiang.
20 Nu taluro Saelba Uhiropne Yesus Kristusap nimi pali nenep tangto el uropne toman agha mog so'oag nimiri sembenga kalup tangtopne laplobi agha lambanep.
Anam lamban komag olog eraruk aghana,
sin hae yepsinep.
Ot mog so'oag nimiri seneragto ul piropne laplobi agha lambandi,
nen sap samoro mog so'oag nimiri seneragto ul piropneag kekhaekel dalamsengpa,
luknubahiso tanena,
komoptobagna eka'uk sirik urobag wamnep.
21 Wana porog nimiri ul pinepne sembe ekonne agha nimiri malinge ul pin tanena,
sin sembe olog ikin wamnep.
Aghana Allah Memneri aruksirop yubu ambatsiogne tiplamongpa,
el uro saelbamang.
El uro saelbamang agha amik wail ibare agha laplopnep tanena,
nimi eneko sembe sunsunum komdi,
nen phelekto ikin sirik talul.
22 Sindi undo ulamnepne sembe nimiri yubu likipto lelamekne sik uro sunulamsil.
“Kam tunguna samoro telalul,”
alamang.g
Apna,
“Kel pham a'elbanba,
samoro pensalag phindal pilul,”
alamang.