Yohanes
Ponekori Mome Toro Pibogha Selekne
El nenerop yubu palilamap
Yohanesti alnirobag mome toro pibog yubu enekona, tam phende uro yabilul aro mome toro pibog. Tam selek nena, “Nimiri mome ene kemero nimi wanaag seneraglamikti, ‘Allahap Elme Yesus Kristusap ma'ap tahabe,’ aro wana yeng uro senelamukang,” aro mome toro pibog. Tam phendep nena, “Sengkwanektop yubu ambatsirop nimiri Yesusag wana palirop nimi kiliro ekel ina poa pihiikag,” aro mome toro pibog. Sengkwanektop yubu ambarelamsiek yubu enekona, “Nia mangkina mog so'oag uropne nimiri haingdi kemeropne aneko ot malinge agha wamla ane sembe, Yesus Allah Elme wamogne sik uro mog so'oag nimi nongag tanep kom,” aro ekel ina ambarelamsiek. Sindi sengkwanektop yubu ambarelamsiekne sunsunum uro, walia uropneap, nimi o'ona senehinneap tam nubunge senerop kom. Sengkwanektop yubu ambatsirop nimi tanekori, “Nia mangkina mog so'oag uropne ot malinge agha wamla,” senenneag agha nimiri nongag malinge to, walinge to uropne sembe seneraglamek kom. Sin sembe tam o'omnena, “Ot tognoroba nimiri ekonne nu el tahabe,” aro sarekereplamek.
Mome eneag Yohanesti, “Sengkwanektop yubu aneko ka'ebaikag,” aro Yesusag wana palirop nimi sembe mome toro pibog. Yohanestina, “Ot sik Yesus mog so'oag nimi nongag taog,” aro tibin nenero ambatsiog. Apna nimiri mog so'o enekoag ul piropne sembe ekon tan koma, “Yesusag wana palirop nimiri ora nimi o'ona sembahinepneog wamla,” aro mome toro pibog.
Yohanesti mome toro pibogha selekne lomag wamlange
1:1-4 - Nimi kamag nenehirop Yubu sembe ambatsiogha
1:5—2:29 - Inibinneap tibinneap sembe ambatsiogha
3:1-24 - Allah elmaboap, phia sikini nubunge elmaboap lag tangtopne sembe ambatsiogha
4:1-6 - “Sikne to, orolenange to,” aro mipto el tanepne sembe ambatsiogha
4:7-21 - Nimi mamun o'ona seneptangtopne sembe ambatsiogha
5:1-21 - Yesusag wana paliropne pere agha mog so'oag nimiri seneragto ul piropne luknubanepne sembe ambatsiogha