Nu Saelba Uhiropne yalulne sembe ambatsiogha
3
Nari wanaag wamlom nimi,
yubu nene mome phendepne a'un sembe mome toro palilamna.
“A'un ekon tamunag,”
aro samenag pimno yubuag babe,
wene yubu neneag babe nari el nenelamsindi,
“Wanaag agha ot walingeog seneraglamlulom,”
aro mome toro palilamna.
2 A'un ekon tahileagti,
Allahri yubu silimu tiptop nimi wepsiog nimi tanekori samenag ambatsiek yubuap,
nu taluro Saelba Uhiropne ponekori eldi a'unag wepto pogsiog nang pere agha arukahiog yubuap,
“El talulom,”
aro mome toro palilamna.
3 A'un samenag el talulom nena,
mog so'oag wamapne amik kom tanep sum peram taleba,
yubu nepsirop nimi yalamikti,
sinba sindi wanari,
“Uahabe,”
senenneag agha yongeap malingeap ul palamukang.
A'un yubu nepsirop nimi tanekori og solamikti,
4 “Eldi samenag,
‘Samoro yanun,’
aro salag pibogne neneko no?
Nuni yabo tebaek aghana,
Allahri alniro mog so'o sumbaog sum agha uro yabalamog saog uro anam uro yabalamla.
El yanepne ililamap komdi,
sik uro yabinep te?”
aro yubu neplamsukang.
5 Undo yubu nepto lelamukang nena,
Allahri yubu lebogneag agha imap so'oap sumbaogne sembe sindi wanaag,
“Seneraglamnun kom,”
aro yubu neplamsukang.
Im aneko yum-yum samenag agha wamogpa,
Allahri yubu lebogpa,
mag anabiag agha mog so'o mag toman agha lag taog.
6 Mag toman agha lag nembaog mog so'o neneko magti nikniro kom nembaog.
7 El yubu lebogne toman agha imap so'oap sumbaogne ponekori babe imap so'oap wene wamlange,
“Aukti tehilul,”
aro paiamog.
Aukti tehile sum eneko sin Allahri senenne ul pirop kom nimi,
“Kom nembahinun,”
aro Allahri tam kemero karebatsilenge sembe wene imap so'oap wamlange paia ulamsil.
8 Nari wanaag wamlom nimi,
tam nhon nene a'un ekon taheng kom.
Nu Saelba Uhiropne poneko sembe,
ik nhon sum hengkun teng-tengne (1.000) saog uro wamla.
Apna hengkun teng-tengne (1.000) el sembe ik nhon sum agha saog uro wamla.
9 Mog so'oag nimiri seneragnep nena,
“Nemen-nemen yalamla,”
sembanep aghana,
nu Saelba Uhiropne ponekori salag pibogne ul pinepne sembe eldi nemen uro ul pirop kom.
Nemen kom aghana,
eldi yeng senelamlangena,
“Nimi nhon babe loba taheng kom,”
senelamla.
Ane sembe eldi wana pailingkina,
“Nimi niri malia seneragto uroba lipsengdi,
Allahri seneropne salero ul peheng,”
aro a'unag ko'o tarelamsil.
10 Nu Saelba Uhiropne yalul sum enekona,
haoghaba torop nimiri lo'om aro yingkirop saog uro yaleba,
im kurut aro kom talul.
Mog so'o ene sunuroba aukti telamleba,
mog so'oap nia mangkina mog so'oag wamlangeap kom talul.
11-12 Nia mangkina undo kom talul ane sembe,
a'undi hulamnepne sembe seneraglamsut.
A'undi,
“Nu Saelba Uhiropne elem uro yaboho,”
aro Allahri weptop sum nang-nangaro tilapmundi,
Allahri seneropne sunsunum uro eldi mabori ulamnepneog ulamlulom.
Sum eneko auk singkaleri,
im aniko harep telamleri,
ni mog so'oag uropne kwerero pog singkalul.
13 Aghana eldi salag pibogne sunsunum uro im wendogneap so'o wendogneap wana porog uropne ua urobag nang-nangaro tilamap.
14 Nari wanaag wamlom nimi,
ni undo uro yabilulne sembe a'undi nang-nangaro tilamlom ane sembe,
a'undi wanaag seneraglapmundi,
“Nuri uroba kemelamsileri,
walingeog iplul.
Nunag tam pimna koma elap nhon ma'ap tangto wamukap,”
aro sol wali uro ulamlulom.
15-16 A'undi seneraglamlulom nena,
nu Saelba Uhiropne ponekori wana pailingkina ulamsilne agha nimi taulbahinepne sembe pa'asea tarelamsil.
Tam nene sembe Allahri nungkae wanaagne Paulus poneko wana hektoba ambarogpa,
a'un sembe undo mome toro pibo.a
Eldi mome niag yubu ambatto mome toro palilamonge,
Allahri wana pailingkina taulbahinepne sembe ambatto mome toro palilamo.
Eldi mome toro palilamo yubu lomag wamlange seneragtopne olog eraruk uro seneraglamnep.
Nimi nhon-nhon ekondi,
wana khapto koma seneragto ul palamangdi,
Allah Yubu mome toro pibek yubu kwaneklolamang.
Allah Yubu yogne loba nenelamang saog uro Paulusti mome babe yubu kwaneklolamang.
Undo unulamangne sembe sindam nimi loba nenel dalamang.
17 Nangkabo nari wanaag wamlom nimi,
a'un wana khapto yubu sikne salelamlom.
Sin salik-malik urop nimiri ekel ina pabalamsiang nimi sembe anamag el uro wamlom.
Ane sembe,
a'undam nimi yae up tangkapmundi,
“Sik yubu sae liro timbabeag,”
aro ekel ina pabalamsiang nimiag nelebahiseng kom.
18 Ot nu taluro Saelba Uhiropne Yesus Kristus wana yororo senehinne a'unag wamlange nubu nenelapmundi,
el sembe el tangto pongolamlulom.
Wene el paliag nenero kiplameberi,
ya'ag uro omeklamebe paghabog omeklamukap.
Sikne agha lebap.
Abenda.