Petrus
Ponekori Mome Toro Pibogha Selekne
El nenerop yubu palilamap
Petrus ponekona, Yesus mog so'o eneag wamogti, aobare nang wepsiogpa, eldi yubu ka'ero neleptop nang nhon wamog. Yesus tebaogti, kamag taogpa, Petrus ponekori yubu walinge ambatto tongolamsiog. Yesus kamag taogpa, hengkun teng nhon saog uro yabalamog abeneko Petrus as soro kalurop as Roma pina wamogti, yubu ambarelamsiog.
Petrusti mome toro pibog yubu enekona, Asia so'oag as nhon-nhonag wamek nimiri Kristusag wana palilamekpa, ora nimiri sin sembe karong senelamsiekti, san tilipto neplamsiek. Neplamsiekpa seklelamekne sembe el wamogti, “Wana mikip nembahinun,” aro Petrusti yubu ene sin sembe mome toro pibog.
Wene Kristusag wana palilamekne sembe nimiri neplamsiekpa seklelamek. Aghana seklelameka ina toman, sin Kristusag wana palirop nimi taptop nimi wamekne lag talamog. Wana mikip nembahinep yubu ambarelamsiog nena, “Yesus Kristus tebaogti, kamag taogne poneko nen amik yaleri, taluro kamna tatsilul. Ane sembe, ‘Allahringe mo wamna,’ senenne agha wana khapto ul palamlulom,” aro wenero ambatsiog.
Petrusti mome toro pibogha selekne lomag wamlange
1:1-2 - Petrusti kipsiogha
1:3-12 - Allahri talulamsila sembe el nembahiogha
1:13—2:10 - “Allahringe wamna,” aro ul palamlulom seogha
2:11—4:19 - Kristusag wana palirop nimiri seklelamnebag ulamnepne sembe ambatsiogha
5:1-11 - Kristusag wana palirop nimiri wana umag nenep tangto ulamnepne sembe ambatsiogha
5:12-14 - Komobanebag wembahiogha