Yakobus 5

Tup nimi wembahiogha

A'un tup nimi seneraglamsut! Seklenne a'unag uro yabinepne sembe haum aro engelamlulom. 2 Tup nenep tangtoba a'un saeag wamlange polbanualba, a'un nongag ag wangaroba mapliogti tenual. 3 A'undinge leng-leng aroba emasap perakap taneko mombai kulubao. Mombai kulubaonge nenekori a'un kon telamsileri, a'undi malia ulamlomne keknebalul. Keknebaleri aukti terop saog uro telamsileba, a'un kon iki ulamsileba seklebalulom. Tup nenep tangtoba komoptop sum sembe poloro winilamlom te? 4 Kembahut! A'undi aweag toro yongorop nimiag kamna tatsisom aghana, sinag kamna tatsin koma tup nenep tangtoba poloro pibomne taneko wamlari, malia ulamomne sembe nimiri haum arop saog uro keknel dalamla. A'undi aweag yongorop nimiri babe engero haum alameka imap so'oap Saelba Uhiropne Mikip Sirikne ponekori aori ka'elamog. 5 A'un mog so'oag wamlomne teko wamna koma a'undi wanaag ot, “Yeng nenep tahane,” seneropne agha ulamlom. Pham mesa yag pham nhondi, “Amik omnukang,” aro el wamna koma maiknoro telamloa saog uro a'undi maikno telamomdi, mesa yagne nenep taom. 6 Wana porog nimiag tam pelengelamsiomdi, ya'ag olamsiom. A'un yubu toraplamsiong kom aghana, ya'ag olamsiom.

Seklenneag wana khapto wamnepne sembe ambatsiogha

7 Ane sembe, nangkabo, a'un wana pailingkina wapmun paghabog, amik nu Saelba Uhiropne poneko yalul. Awe wero merop nimi sembe seneraglamsut. Eldi aweag melamlori, “Amik pongoro wana maubaleba, nimiri kamna kapto tobukang,” aro wana palilamlori, mag li samenneap amikneap tiro nang-nangalamlo. 8 Ane saog uro seneragto ulamlulom. Nu Saelba Uhiropne poneko samoro yanepne peram wamla ane sembe, a'undi wana pailingkina nang-nangaro wana khapto wamlulom. 9 Nangkabo, a'un mamun parog-parog arop yubu lelamseng kom andarina, tam pelengkahinepne a'unag talul kom. El tam karepto pelengkatsinepne poneko, “Yanun,” aro ina siramag sekamlari yanual. 10 Nangkabo, Allah yubu silimu tiplamek nimiri wana khaplamekne sembe seneraglapmundi, sunsunum uro ulamlulom. Sindi nu Saelba Uhiropne siag kekhaektopneag agha yubu tipto ambarelamsiekne sembe nimiri malia ulamsieka seklelamekti, nen tipto wana khapto ambarelamsiek. 11 Sin papna koma wana khapto ulamnep nimi maiplamsiapne sembe seneraglamsut. poneko samenag seklelamog aghana, papna koma wana khapto ulamogne sembe ka'elamlom. Seklelamoghag wana khapto ulamogpa, nu Saelba Uhiropne ponekori el sembe uirogne ka'elamlom. Nu Saelba Uhiropne ponekori wana maikno uro yareag senelamsildi yeplamsil. 12 Apna ni yubu lelamnange agha o'omnena, a'undi yubu lelapmunne otsikne agha lelamlulom. Nangkabo, Imagneri tam a'unag pipsileagti, a'undi yubu lero, “Nari orolena lemnepne sembe imag wamlangeri omnelul,” aro yubu so'opto salag pipseng kom. Apna, “Mog so'oag wamlangeri omnelul,” aro babe yubu so'opto salag pipseng kom. “Sa'a-sa'a wamlangeri omnelul,” aro babe yubu so'opto salag pipseng kom. Ot a'undi wanaag, “Yo sik,” senelapmun nena, “Yo sik,” sululom. A'undi wanaag, “Kom,” senelapmun nena, “Kom,” sululom.

Allahag wana paliro molbanepne sembe ambatsiogha

13 A'un nimi nhon wana ikin uro seklelamlam tanena, Allahag mololamlulam. A'un nimi nhon wana awi uro wamlam tanena, Allah omektop sepna seplamlulam. 14 A'un nimi nhon naiklamlam tanena, Kristusag wana paliro winip tangtop nimi wenehirop nang yopsimenba, an sembe Allahag molbatkukang. Naiktop nimi eneko molbarelamikti, zaitun wana lolterop mag pelaghi agha nu Saelba Uhiropne si yopto molbarelamukang. 15 Allahag wana paliropne pere agha molbarelamika anekori naiktop nimi eneko wali nembalul. Naiktop nimi enekori malia uropne agha naiklamso tanena, malia uroba neneko nu Saelba Uhiropneri tam kom nenero wailag nembanepti, toro seki agha wali nembanep. 16 Ane sembe a'undi malia uropne lag phoro ambarel dalapmundi, a'un mamun molbarel dalamlulom andarina, a'un nongag naikna uropne wali nembalul. Wana porog nimiri Allahag molbatsiropne nenekona mikip sirikne wamlari, nimi yeplamsil.

17 Elia ponekona, nu mog so'oag nimi wamap saogne wamog. Elia ponekori wanaag agha, “Mag timban koma ebare mo wamlul,” aro Allahag molbaogti, hengkun wilindiap nen ma'aro wal no'opbareap talamogpa, mog so'o anekoag mag tinilamog kom. 18 Nen mololamogti, “Mag yalul,” aro Allahag mololamog andarina, imag agha mag tinilamogpa, mog so'o anekoag pongoroba pongolamogti, wana maulamog.

19-20 Nangkabo, a'un nimi nhondi sik senenne lilobi agha ekel ina palamnep aghana, yog nimi nhondi nimi eneko samoro ina walinge toman payanep tanena, el wali nembanep. Tam nene sembe el uro wamlulom. Nimi etneri ekel ina pirop nimi samoro ina walinge toman payanep tanena, malia urop nimi payale nimi eneko tebanepneag agha taulbaleri, malia uroba maikno nikniro luplul.