Ibrani
Nimiag Yesus Sembe
Tibin Nenero Wembahiogha
El nenerop yubu palilamap
Ibrani nimiag tibin nenero wembahiog yubu ene mome toro pibog nimina, nu olog ekon uro wamap. Nimi nhonneri Paulusti mome toro pibog sembanep aghana, nhonneri Lukasti to, Apolosti to, Barnabasti to mome toro pibog sembanep. Nimi etneri mome toro pibogne nu olog ekon aghana, sin Yahudi nimiri Kristusag wana palilamek nimi sembe yubu ene mome toro pibog. Yahudi nimiap Israel nimiap Ibrani nimi wamek. Sin Ibrani nimi pogto, “Yesus poneko Kristus wamla,” senelamekti elag sikne aro wana palilamek. Aghana Ibrani yog nimiri sin Yesusag wana palirop nimiag walamsiekti, yubu toraplamsiek. Yubu torapto walamsiekpa, Yesusag wana palirop nimi tanekori, “Yesus lilobi agha Musari yubu nen samoro saelbaukap to, kom to?” aro wanaag hail dalamek. Yubu nene mome toro pibogne enekori sin wenero, “Allah Yubu ni Yesus Kristusag tiptangkamlaba, Kristus lipseng kom,” aro wana mikip nenero ambarelamsiog.
Yubu tam wilindi taneag, “Kristus lipseng kom,” aro wenero ambatsiog. Yubu tam selek nena, Yesus Kristus Allah Elme ya'ag uropne wamlange poneko wana khapto seklelamog. Seklelamogne toman agha Allah Yubu sunsunum uro ul piropne sembe el talamog. Yesus Kristus Allah Elme wamla ane sembe, sin samenag Allah yubu silimu tiplamek nimiap, Allah arukna imagnang malaikatap, Musa ponekoap ni phelektopne wamlari, paliagne mo wamla. Yubu tam phendep nena, sin memnang samenag Allah sembe palirop nang wamek aghana, Allah eldamneri Yesus sekililamogti, “Phelektopne wamlari, na Allah sembe memne pail anepne ya'ag uropne wamla,” aro lag nenero ambatsiog. Yubu tam wilindip nena, samenag Allahri Yahudi nimiag salag lekto paliropneap, Allah sembe pham domba oro paliropneap ni abeneko Yesus anam mangap tan komag el amik yanepne sembe likipto ambatsiog. Yesusna memne ya'ag uro Allah sembe paliropne nubunge nhonog wamla ane sembe, nu mog so'oag nimiri Yesusag sikne aro wana palilamapne toman agha Yesusti nu saelbamsil. Nu saelbamsildi, nuri malia uropneap, log seneropneap, teptopneap ni tanekoag agha pelepto talulamsil.
Mome toro palilamog nimi enekori, samenag wamek nimiri Allahag wana palilamekne sembe pasal ko'olomneag mome toro ambatsiog. Ambatsiogti pasal aongeag, “Seklelapmunneag Kristusag sae limna koma elag tiro wana palilamlulom,” aro ambatsiog. Mome komobanebag sin wenehirop yubu komopto mome toro pibog.
Ibrani nimiag Yesus sembe tibin nenero wembahiog yubu lomag wamlange
1:1—2:4 - “Nimi taluro wendog nimi nembahilul,” aro Allahri Yesus webogne sembe ambatsiogha
2:5—4:13 - Musaap Yosuaap Allah arukna wamdek aghana, Yesus sin phelekto Allah Elme wamlange sembe ambatsiogha
4:14—6:12 - Yesusna memne Allah sembe paliropne paliag sirikne wamlange sembe ambatsiogha
6:13—10:39 - “Yesus eldamne Allah sembe paip taogne pere agha yubu nikne salag wendogne alnibaog,” aro tibin nembatsiogha
11:1—13:25 - Allahag sikne aro wana paliropne pere agha eldi kelmabo me tanepne sembe tibin nembatsiogha