Filemon 1

Filemon

Sembe

Paulusti Mome Toro Pibogne

Paulusti Filemonag kipto mome toro pibogha

1-2 Nangkabo! Na Paulusti mome neneag agha a'un kiplamsin. Na Paulusti nimiag ambarelamsin nena, Allahri wepto poghogne Kristus Yesus poneko sembe yubu ambarelamsin aghana, nimiri karongdi na sae kaupto kop aeag paiamneangba, mome nene a'un sembe palilamna. Nanap nungkae Yesusag sikne aro wana paliropne Timotiusap wamnamdi kiplamsinam. A'un kiplamsinam nimina, an Filemon sembe, “Nu babe awe nikne torop nimi wamap,” aro wanaagne wamlamba kiplangkenam. Allah elmabo andi aeag winil dalamang nimi babe kiplamsinam. Apna Yesusag sikne aro wana palirop kel Apfia sembe, “Nunipsa'el,” aro kiplamnam. Nungkae Arkhipus sembe, “Awe nikne wel tongolamapba, aisa nenep tangtop nangdi nu malia ulamsiangba, nik nimi wamap,” aro kiplamnam. 3 “Nuni Allahap, nu Saelba Uhiropne Yesus Kristusap abenekori wana a'unag yororo walia ulamsirikpa, wana aingniro wamlulom,” senelamnamdi a'un sembe molbarelamsinam.

Allah omekaogha

4-5 Nari an sembe ka'ebanoba, andi nu Saelba Uhiropne Yesus ponekoag sikne aro wana palilamlamdi, Allah eldamneri weptop mabo o'ona senero yeplamsilamne sembe ka'ebano. Ane sembe Allahag mololamnange abeneko pere andi ulamlamne sembe seneragto, “Naba naniong, wali uro yeplamlamba ulamla,” aro Nuni Allah kipto omeklamna. 6 Nari an sembe Allahag molona molbarelangken nena, “Yesus Kristus ponekoap ma'ap tangtopneag agha nunag wali-walia ulamsilne sembe ni el talulam. El talapmenba, Allahri an yeplangkele andarina, el talapmenne pere agha Yesusag wana palilamlamne sembe tibin uro nimiag yubu ambarelamsululam,” aro an sembe Allahag molbarelangken. 7 Filemon naba nangkae. Andi Allah eldamneri weptop mabo ni o'ona senelamsilamdi, yeplamsilamne neneri Allah elmabo maikno wana mikip nenelamsilam. O'ona senero yeplamsilamne nene yubu ka'ebanori, wana awi maikno uaneoba, nari babe ul panne mikip nembaneo.

Paulusti Filemonag, “An arukna Onesimus waban koma topsom,” aro molbaogha

8 Ane sembe, na Yesus Kristusti wepto pogneogne wamnari sang-sanga, “Andi undo unuanepneog wamlaba ualulam,” aro yubu mikip uro anag ambatkenep. 9 “Undo ualulam,” senep aghana, o'ona senehinne pere agha nari anag molona agha Onesimus sembe mololangken. Na Paulus wene sabal wamna aghana, Yesus Kristus poneko sembe awe toro ulamnaba, nimiri na salero sae kaupto kop aeag tobongkimneongba wamna. 10 Na sae kaupto kop aeag wamnoag anea Onesimus ponekori Yesusag sikne aro wana palilamoba, Onesimus ili saog tano. Ili saog tano ane sembe, wene nari name Onesimus sembe molona nhon mololangken. 11 Samenag el andi ae lomag awe toropne arukna sol malinge wamoba, el sembe teba'en senelamom. Samenag undo wamo agha wenena, wana wendogneag agha ulamlange neneri na sembe babe, an sembe babe wali yepsinep. 12-14 El poneko nari anag sae lipsene kom senelamna. Na Yesus yubu walinge ambatsinne sembe wene kop aeag tobongkiamneong aeag wamna. Undo wamnari, “Nangkae Filemon wamsenemeri yepnoho,” senelamnange agha, “Onesimus poneko nangkae Filemon lunumna wamla,” senelamna. Undo senelamna aghana, anam andi saekag lemna komag nari yubu karebanep kom. Na wana yeng nena anba andi, “Uanun,” senenne agha undo tanep. Nari anag, “Unualulam,” senun kom. Ane sembe el nimi na wanaag sirikne neneko anag samoro pogholaneba, “Andi ae lomag awe toplul to, nen nanag pogholalulam to,” aro anba, andi uamenne.

15 Wene abene Onesimus anap a'eptangto wamdom. Aghana, nari seneraglamnange undo. El samenag anag agha kolop tangto pionge Allahri libo. Onesimus pio aghana, anag samoro yaleba, a'un ya'ag ma'ap tangto wamturom. Ane sembe, “Samenag kolop taromne nene Allahri libo,” senelamna. 16 Onesimus poneko samenag andi arukna wamo aghana, samoro yale sum eneko andi arukna aghabog sembanep kom saog wamlaba, eldi Yesusag wana palilamlange sembe, “Naba nangkae walinge wanaagne,” sembalulam. Elna na Paulus sembe wanaag sirikne wamla aghana, an sembe walinge phelektopne wamla. Wene el wamlangena, an yepkerop nimi aghabog kom aghana, eldi Yesusag wana paliropne sembe anipsae taptopne wamloa saog wamla. 17 Nangkae, andi na sembe, “Nu Yesusag wana palirop nimiri awe nikne tolamnam,” sembamnelam tanena, Onesimus nen anag samoro yaleba, na salero tomnohom saog uro, Onesimus yaleba toplulam. 18 Eldi anag malia uaori, andinge sae kareploroba wamo agha laploa yao tanena, eldi kamna samoro tatkenepne ni ane nanag timbalul. 19 Andinge kamna el sa'oag kareploroba tatkenepne wamla tanena, “Nari lumbanun,” aro na Paulusti saeri mome ane anag palilamna. “Nari lumbanun,” aro salag palilangken aghana, nari yubu pere agha samenag Yesusag sikne aro wana palilamomdi, wene babe elag seneraglamlamdi, an nong ningki nanag tanepne sembe, “Hae tatnululam,” senun kom. 20 Ane sembe, nu Saelba Uhiropneap ma'al dalamapne toman agha nu naro naipsae nenel dalamap. Nu Kristusap ma'ap tangto wamapne sembe andi wana nanag yorolamnel tanena, na yepto wana yeng nembanululam. “Onesimus yaleba, omna koma wali uro toplulam,” aro mololangken. 21 Nari mome ane palilamnange nene, “Nari wanaag babe kembaleri ualul tiog,” sembamnari palilamna. Apna na el wamnangena, “Na molbaghen komne babe, nen phelekto walinge aghabog ualulam,” sembamna.

22 Nene sembe undo pimnarina, na kop aeag wamnange sembe, nangkabo, a'undi molona Allahag mololamlulom. Allahag mololapmun andarina, eldi wana nanag yorolamnelne toman agha na sae lopto anag payanelul. “Na sae lopto andi aeag poa yanele sum eneko anag yanun,” senelamnari nang-nangaro tilamna. Ane sembe andi aeag na sembe ae lom nhon kolbamlulam.

Mome komoptobag kipsiogha

23 Nungkae Epafras ponekona, el Kristus Yesusap ma'ap tangto wamlange sembe nimiri el kop aeag tobongkibongpa, nanap nikag wamnam. Eldi babe anag, “Nangkae,” aro kiplangkel. 24 Nanap awe nikne tolamap nimina, Markusap, Aristarkhusap, Demasap, Lukasapti babe an kiplangkeap. 25 Nari a'un sembe molbarelamsin nena, “Yesus Kristus nu Saelba Uhiropne ponekori wana a'unag yorolamsileba, a'un wana nong ningkiap paiamsilul,” aro elag molbarelamsin.

Abenda.