Titus
Sembe
Paulusti Mome Toro Pibogne
El nenerop yubu palilamap
Titus ponekona, Yunani nimi kere kon kareptop kom nimi wamogti, Kristusag sikne aro wana palilamog. Kristusag wana palilamogpa, Paulusti Yesus yubu walinge ambatto tongolamogpa, Titus elap ma'ap tangto ambatto tongolamek (Galatia 2:1-3). Yubu ambatto tongolamekti, Paulusti Titus poghogpa, as Korintus piogti, yubu ambarelamsiog (2 Korintus 7:6, 13-15; 8:6, 16-24).
Paulusti Titus sembe yubu ene mome toro pibog sum enekona, Titus mag kanero longorop mog so'o Kreta wamogpa, Paulusti yubu ene mome toro pibog. Anamag Paulusap Titusap Kreta so'oag yubu ambatto tongolamsirekti, Paulusti Titusag, “Na pineba, wapmendi as ni Kreta mog so'oag ubu paiamlange sunsunum uro Kristusag seneragtop nimi ambatto wembahinep nimi ebahimendi, toro seki-seki yabihilulam,” aro Paulus Kreta so'oag agha laploa piog (Titus 1:5). Mome nene Titus sembe mome toro pibog aghana, “Yesusag wana paliro winip tangtop nimi niri yubu nene ka'ebaukang,” aro mome toro pibog.
Paulusti Titus sembe mome toro pibog yubu eneagna, sin samenag wamek nimiri wendog Kristusag wana palilamekti, winil dalamek nimiri tam nubunge sin mamun hail dalamekne sembe yubu wenelamsiog. Sin mamun hail dalamek tam abenena, Kristusag wana paliro winip tangtop nimi saelba ulamsinep nimi sembe, Kristusag wana palirop nimiri ulamnepne sembe sin mamun hail dalamekpa, wenero ambatsiog. Paulusti Titusag wenelamogti, “Sa'a-sa'a ulapmenne abeneko pere andi, ‘Nimiri imneikti, nelepto ulamukang,’ senenneag agha walinge aghabog ulamlulam,” aro wembaog. Kreta nimi a'ero-a'ero wamek nimiag Titus ponekori tipto wenero ambarelamsinep yubu babe Paulusti ambarog. Kristusag wana palirop nimi wenero ambatsinep yubuna, sabal saog taek nimiri ulamnepne babe, kabuniap sabal tan kom kelaboap wenelamsinepne babe, arukna nenehirop nimiri ulamnepne babe Paulusti Titusag, “Nen tipto ambatsululam,” aro ambarog. Apna Paulusti wenelamsiogti, “Nimi yepsinep kom yubu nimi a'ep tanep yubu sarekerebaheng komdi, nimiap waptan koma wana mamleba, ‘Nangkae,’ aro ma'ap tangto wamlulom,” aro wembahiog.
Paulusti Titus sembe mome toro pibogha lomag wamlange
1:1-4 - Paulusti Titus kibogha
1:5-16 - Yesusag wana palirop nimi wenero paia uhirop nang sekitsinepne sembe ambatsiogha
2:1-15 - Nimi a'ero-a'ero Yesusag wana paliro winil dalamek nimiri ulamnepne sembe ambatsiogha
3:1-11 - Yesusag wana paliro winip tangtop nimi paia uhinepne sembe wembahiogha
3:12-15 - Mome komobanebag kipsiogha